Ikpehe 4: Ndinịm Ukpepn̄kpọ Bible Oro Enyenede Uforo
Ndikpep Nditọ Ukpepn̄kpọ nte Ẹtịmde Idem
1 Eyen ukpepn̄kpọ oro ebemde iso okot se edikpepde, esịnde idiọn̄ọ ke mme ibọrọ, onyụn̄ ekerede nte ọkpọbọrọde ke ikọ idemesie ayanam n̄kọri eke spirit usọp usọp. Ke ntre, ke ama ọkọtọn̄ọ ukpepn̄kpọ Bible, da ibuot ukpepn̄kpọ kiet wụt eyen ukpepn̄kpọ nte enye ekpetịmde idem. Ye ata ediwak nditọ ukpepn̄kpọ, ọyọfọn ndida ofụri ibuot m̀mê ikpehe ukpepn̄kpọ kiet n̄wụt nte ẹtịmde idem.
2 Ndisịn Idiọn̄ọ Nnyụn̄ N̄wet N̄kpọ: Nam an̄wan̄a nte ẹkpekụtde nnennen ibọrọ mbụme oro ẹmịn̄de-mịn̄ ke n̄wed oro. Wụt enye n̄wed ukpepn̄kpọ fo emi afo esịnde idiọn̄ọ ke mme ọkpọ ikọ m̀mê mme ubak udịmikọ kpọt. Nte mbufo ẹnemede ibuotikọ oro, enye ekeme ndiyom nditiene uwụtn̄kpọ fo, esịnde idiọn̄ọ ke mme ikọ oro oyomde man an̄wam enye nditi ibọrọ. (Luke 6:40) Ekem dọhọ enye ọnọ ibọrọ ke ikọ idemesie. Emi ayan̄wam fi ndifiọk adan̄a nte ukpepn̄kpọ oro an̄wan̄ade enye.
3 Nditịm ndụn̄ọde mme itie N̄wed Abasi oro owo mîkotke-kot isịn edi akpan ikpehe ntịmidem oro anade eyen ukpepn̄kpọ anam. (Utom 17:11) N̄wam enye okụt ke itien̄wed kiet kiet oro ẹsiakde ẹsịn ọsọn̄ọ akpan n̄kpọ ke ikpehe ekikere. Wụt enye nte ẹkemede ndiwet n̄kpọ mbio mbio ke mben n̄wed ukpepn̄kpọ esie. Sọn̄ọ wụt enye nte ke se enye ekpepde ọkọn̄ọ ke Bible. Sịn udọn̄ nọ enye ndibuan mme itien̄wed oro ẹsiakde ẹsịn ke ibọrọ esie.
4 Tịn̄ Ibio Ibio Se Idude Nyụn̄ Nam Ndụn̄ọde: Mbemiso eyen ukpepn̄kpọ ọtọn̄ọde ndinam ọyọhọ ntịmidem nnọ ukpepn̄kpọ oro, ọyọfọn enye ebemiso ọfiọk se ibuotikọ oro etịn̄de aban̄a. Wụt ke enye ekeme ndibem iso ndụn̄ọde ukpepn̄kpọ oro ke ndise ibuotikọ, n̄kpri ibuotikọ, ye mme ndise. Nam an̄wan̄a ke ọyọfọn enye ada ekpri ini odụn̄ọde mme akpan n̄kpọ oro ẹnemede ke ukpepn̄kpọ oro, iso-ọfọn, adade mme mbụme ndụn̄ọde edieke ẹdude. Utọ edifiak ndụn̄ọde oro ayan̄wam enye eti se ekpepde.
5 Ndikpep eyen ukpepn̄kpọ nte ẹtịmde idem mfọn mfọn ẹnọ ukpepn̄kpọ ayan̄wam enye ndinọ mme ibọrọ oro ẹsịnede ifiọk ke mme mbono esop. Emi n̄ko ayan̄wam enye ndikọri edu ukpepn̄kpọ oro edifọnde ye enye ke anyan ini ke ẹma ẹkekụre ukpepn̄kpọ Bible esie.