Mbono District “N̄kopuyo Abasi” eke Mme Ntiense Jehovah eke 2005
1 Nte Akwa Anditeme nnyịn, Jehovah Abasi anam ndutịm nnyịn ndisop idem ọtọkiet man ẹkpep nnyịn usụn̄ esie. (Isa. 30:20, 21; 54:13) Enye ada otu ofụn emi anamde akpanikọ onyụn̄ enyenede ọniọn̄ etịm utọ mme mboho nte mme mbono district nnyịn eke isua ke isua. (Matt. 24:45-47) Ekikere nnyịn edi ukem ye eke David andiwet psalm emi ọkọkwọde ete: “Nyọkọm Jehovah ke otu mbon-esop.” (Ps. 26:12) David ama etịm ọfiọk ufọn edibọ ukpep nto Jehovah ndien enye ama ebiere ndidu ke otu ikọt Esie ini ekededi oro mmọ ẹsopde idem ọtọkiet.
2 Ndi afo eyesịne ke otu “mbon-esop” emi ẹdidụkde Mbono District “N̄kopuyo Abasi” eke isua emi? Edieke edide ntre, se itienede mi ayan̄wam fi ke nditịm idem man odụk mbono oro.
3 Nam Ndutịm Idahaemi Man Odụk Kpukpru Usen: “Ekikere mme ọsọp-ubọk ẹkọ uwak ikpọn̄-ikpọn̄.” (N̄ke 21:5) Ndi mme ikọ emi iwụtke ke ọfọn ndisọsọp nnam ndutịm ndidụk mbono oro? Mbak udutaba ndomokiet ke otu inem inem ndutịm eke spirit emi, ọfọn nditọn̄ọ idahaemi nnam ntịmidem ekededi oro ẹdiyomde man odụk kpukpru usen mbita. Edieke anade afo eben̄e eteutom fo ini ndida ndụk mbono emi, nam oro iwiwa. Edieke anade eneme ye nsan̄a ndo fo oro mînịmke ke akpanikọ aban̄a ndutịm emi afo anamde, kûbet tutu ini ebe ama. Bọn̄ akam nọ Jehovah ban̄a mfịna ekededi oro afo osobode nyụn̄ nyene mbuọtidem nte ke enye ayanam ‘uduak fo ọsọn̄ọ ada.’ (N̄ke 16:3) Ke adianade do, ọkpọfọn ndin̄wam nditọ ukpepn̄kpọ Bible fo ẹtịm idem man ẹdụk kpukpru ikpehe edinam emi.
4 Itieidụn̄: Man efere mbufo ke idem, ẹyenam ndutịm ndinọ ufọkidụn̄ ke mme obio mbono. Ufọk esidu ke ediwak itie mbono, edide ufọk ibio ini m̀mê ufọkidụn̄ oro ẹbọpde man ediwak owo ẹdụn̄. Mbọk ẹfiọk ẹte ke esop Abasi idikemeke ndibọp ufọkidụn̄ nnọ kpukpru mme andidụk mbono. Mbon oro Itieutom Unọ Ufọkidụn̄ ẹnọde unyịme kpọt ẹdidụn̄ ke ufọkidụn̄ emi. Edieke ẹnọde fi ufọkidụn̄ ke ebiet efen, afo ekpenyene ndibere ye Itieutom Unọ Ufọkidụn̄ onyụn̄ odu ke ufọkidụn̄ fo. Ti ke ekeme ndiyom ẹkpekpe usụn̄ ẹka itie mbono kpukpru usen. Oyom esịn emi ke ndutịm fo ini afamde okụk enịm ọnọ mbono. Mbemiso afo ewetde n̄kpọ ọyọhọ babru Room Request, dụn̄ọde mme akpan n̄kpọ oro ẹdude ke ekebe oro “Nte Mbufo Ẹkemede Ndibere ye Ndutịm Unọ Ufọkidụn̄.” Ekem nam se ẹdọhọde ke ekebe oro “Nso Idi Mfọnn̄kan Usụn̄ Ndibọ Ufọkidụn̄?”
5 San̄asan̄a Un̄wam: Apostle Paul okokot ndusụk nditọete ‘mme andin̄wam emi ẹsọn̄ọde imọ idem.’ (Col. 4:7-11) Usụn̄ kiet oro mmọ ẹken̄wamde Paul ekedi ndinam n̄kpọ nnọ enye. Didie ke afo ekeme ndidi ‘andin̄wam emi ọsọn̄ọde mme owo idem’ ke mbono emi? Ekeme ndidi oyoyom ẹn̄wam mme asuanetop oro ẹma ẹkesọn̄, mbon n̄kpọnnam, mbon oro ẹnamde utom uyọhọ ini, ye mbon efen kaban̄a nte mmọ ẹdisan̄ade idisịm m̀mê ndinyene ebietidụn̄. Mme iman ẹnyene akpan mbiomo ndise mban̄a mbon emi. (1 Tim. 5:4) Nte ededi, edieke mmọ mîkemeke ndinam emi, ekemmọ mme andinịm ke akpanikọ ẹkeme ndin̄wam. (Jas. 1:27) Mme esenyịn ukpepn̄kpọ n̄wed esop ẹkpenyene ndika mbịne mbon oro ẹdude ke otu mmọ, emi ẹyomde san̄asan̄a un̄wam man ẹkụt ke mmọ ẹnam ndutịm ke eti ini mbemiso mbono.
6 Ẹnam ndutịm emi ẹnọ sụk mbon oro ẹyomde san̄asan̄a un̄wam ẹto mbon en̄wen ke ndinam ndutịm mbono mmọ, akpan akpan ndutịm itieidụn̄. Mmọ ẹkeme n̄ko ndiyom un̄wam ke mme usụn̄ efen, etienede san̄asan̄a idaha mmọ. Sụk mme asuanetop ye mme asiakusụn̄ emi ẹnịmde eti uwụtn̄kpọ, esịnede nditọ mmọ oro ẹdude eti uwem, emi ẹyomde san̄asan̄a un̄wam, oro Kọmiti Utom Esop onyụn̄ ọnọde unyịme, ẹdot ndibọ ufọn nto ndutịm San̄asan̄a Un̄wam emi. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbono esop, utu ke ndiyak mbiomo emi nnọ ndutịm mbono.
7 Ndidụk Mbono Efen: Man ẹkụt ke n̄kpọitie, n̄wed, ufọkidụn̄, ye mme n̄kpọ eken ẹdu ekem, ẹsịn udọn̄ ẹnọ mme asuanetop ndidụk mbono oro ẹdemede esop mmọ ẹsịn. Edieke mme idaha fo ediyomde afo odụk mbono efen, ndien afo oyom itieidụn̄, mbọk sobo ye ewetn̄wed esop mbufo man ọnọ fi babru Room Request. Nọ n̄wed eben̄e fo aka nnennen itie. Edieke ẹdinịmde mbono iba m̀mê awakde akan emi ke obio oro, kụt ete ke emewet usenọfiọn̄ mbono oro afo oyomde ndidụk ke n̄wed eben̄e fo.
8 Ẹyom Mme Anamutom Unyịmesịt: Jesus ekenịm mfọnn̄kan uwụtn̄kpọ ke ndisụhọde idem nnam n̄kpọ ke ufọn mbon efen. (Luke 9:12-17; John 13:5, 14-16) Mbon oro ẹsinọde idem mmọ unyịme unyịme ndinam utom ke mme itie mbono ẹsiwụt ukem edu oro. Man ẹtịm ẹse ẹban̄a utom oro ẹyomde mme itieutom ke an̄wa mbono ẹnam, idibịghike Mme Kọmiti Mbono eke n̄kann̄kụk ẹyetọn̄ọ ndikot mbon efen ẹditiene mmimọ ẹnam utom. Enen̄ede oyom mbiowo ẹnọ idem mmọ unyịme unyịme ndinam mme utom oro ẹnọde mmọ ẹnam. Mmọ ndinyịme ndinam utom edi eti uwụtn̄kpọ ọnọ mbon efen ke esop.—1 Pet. 5:2, 3.
9 Se Mbon Efen Ẹkụtde: Andise mban̄a unyam n̄kpọ ke ufọkisen kiet ọkọdọhọ ete: “Mbufo ẹmenen̄ede enyene ido. Edu mbufo ọfọn akan eke mbon efen ekededi. Nditọiban emi ẹnamde utom mi ẹtịn̄ nte mbufo ẹtịmde mmimọ ẹkama. Ke nditịm ntịn̄, kpukpru owo oro ẹnamde utom mi ẹsinyanyan̄a ndinam utom ke urua oro mbufo ẹdude mi!” Owo enwen ke ufọkisen efen ọkọdọhọ ete: “Emem utom ndinam n̄kpọ ye Mme Ntiense Jehovah akan ndinam ye mbon efen.” Ekeme ndidi eti edu uwem fo akanam ẹtịn̄ mme ikọ emi. Kam kere ise nte esịt edinemde Jehovah ke ini enye okụtde nte nnyịn inamde n̄kpọ ke usụn̄ oro adade utọ itoro emi edi!—1 Pet. 2:12.
10 Jehovah Abasi ada “akama-ukpọhọde emi anamde akpanikọ” anam ndutịm man ikọt esie ẹsop idem ọtọkiet ẹbọ item eke spirit ke isua emi. (Luke 12:42) Okposụkedi ediyomde ukeme nditịm idem man idụk kpukpru usen mbono mbita emi, nnyịn iyenen̄ede ibọ ufọn. Ke akpanikọ, Mbono District “N̄kopuyo Abasi” eke isua emi ayanam nnyịn isọn̄ọ ibiere ndinam n̄kpọ Jehovah idahaemi ye ke nsinsi. Nnyịn ikpakam ibiere nditiene item andiwet Psalm emi: “Mbufo ẹkọm Abasi ke otu mbon-esop.”—Ps. 68:26.
[Ekebe ke page 3]
Mme Ini Edinam
Friday ye Saturday
9:20 a.m. - 4:50 p.m.
Sunday
9:00 a.m. - 3:20 p.m.
[Ekebe ke page 4]
Nte Mbufo Ẹkemede Ndibere ye Ndutịm Unọ Ufọkidụn̄
◼ Ẹnyịme ndibọ itieidụn̄ oro Itieutom Unọ Ufọkidụn̄ ọnọde. Ẹkûdụn̄ ke mme ufọkidụn̄ an̄wa mbono edieke Itieutom Unọ Ufọkidụn̄ mîdọhọke mbufo ẹdụn̄ do. Ẹkûyak ibat owo oro ẹdụn̄de do awak akan se ẹkenyịmede.
◼ Ẹkûdụk mme itie oro ẹdọhọde ẹkûdụk ke itieidụn̄ oro mbufo ẹdude. Ẹtem udia n̄kukụre edieke ẹnyịmede ẹnam oro ye ke itie oro ẹdọhọde ẹtem.
◼ Ẹkpenyene ndibabak nnọ babru Room Request ẹsọk Itieutom Unọ Ufọkidụn̄. Emi ọyọnọ Itieutom Unọ Ufọkidụn̄ ini oro ekemde ndiyom eti itieidụn̄ nnọ fi.
◼ Ẹnyene ndiwet n̄kpọ ke babru Room Request ediye ediye ye nte ẹkemede ndikot.
[Ekebe ke page 4]
Nso Idi Mfọnn̄kan Usụn̄ Ndibọ Ufọkidụn̄?
1. Bọ babru Room Request to ewetn̄wed esop mbufo.
2. Babak wet n̄kpọ yọhọ babru Room Request emi. Mbọk kụt ete ke ọmọnọ ọyọhọ ntọt aban̄a enyịn̄, isua emana, nyụn̄ wụt m̀mê owo oro oyomde itieidụn̄ edi eren m̀mê n̄wan, asiakusụn̄ m̀mê asuanetop.
3. Ewetn̄wed esop ekpenyene ndise nnyụn̄ nsịn ubọk ke babru Room Request onyụn̄ ọnọ enye aka itiembono IDỊGHE ỌFIS N̄KỌK ITIEUTOM. Ntak edi nte ke ubiatini ekeme ndidu edieke ẹnọde babru emi aka n̄kọk itieutom mbemiso esịmde Itieutom Unọ Ufọkidụn̄. Ke uwụtn̄kpọ, ndusụk idaha nditọete ẹsitie ke Lagos ẹnọ mme babru emi edi ọfis n̄kọk itieutom man ẹnọ mmọ ẹka itie mbono kpa ke Lagos. Akpakam emem utom onyụn̄ ọsọp akan ndinọ mme utọ babru emi ẹka nennnen itie mbono ke Lagos akan ndinọ aka ọfis n̄kọk itieutom mbemiso akade itie mbono oro.
4. Kûnọ enyene-ebiet okụk oro awakde akan se Itieutom Unọ Ufọkidụn̄ ọkọnọde man afo enyene itieidụn̄.
5. Ke anamde ọkpọkpọ ndutịm man enyene itieidụn̄, mbọk bụp Itieutom Unọ Ufọkidụn̄ mbak afo udubọ ukem itieidụn̄ oro owo efen ọkọbọde.