Nịm Magazine ke An̄wautom
1, 2. Didie ke Enyọn̄-Ukpeme ye Awake! ẹtụk uwem mme owo?
1 “Ẹnem, ẹdi ekemini, ẹnyụn̄ ẹdemede owo udọn̄.” “Mmọ ẹnọ owo nsịnudọn̄ ẹkan ke otu magazine oro akanam n̄kotde.” Mme ikọ emi ẹtịm ẹnam an̄wan̄a nte mme andikot Enyọn̄-Ukpeme ye Awake! ke ofụri ererimbot ẹsede mmọ. Ke akpanikọ, magazine nnyịn ẹnen̄ede ẹdi ata nti n̄kpọutom ke ndida eti mbụk nsịm “kpukpru orụk owo.”—1 Tim. 2:4.
2 Anam mbubehe kiet ama ọbọ magazine Awake! oro ekenyenede ibuot nneme oro enye akamade. Ekem, enye ama okot nsiondi Enyọn̄-Ukpeme oro ẹkediande, emi ekesịnede ibuotikọ oro akanamde enye odụn̄ọde ukpepn̄kpọ Abasi-Ita-ke-Kiet oro enye ekenịmde ke akpanikọ ke ofụri eyo uwem esie. Emi ama edemede enye udọn̄. Ke ọfiọn̄ itiokiet ebede enye ama ana baptism. Eren efen ama esibọ mme magazine kpukpru ini edi akanam ikotke mmọ. Ke n̄kan̄ eken, n̄wan esie ikesimaha ndisobo ye Mme Ntiense oro edi ama esikot mme magazine oro ẹkesinọde ebe esie. Un̄wọn̄ọ Bible aban̄ade paradise isọn̄ oro ndinen owo ẹdidụn̄de ama otụk esịt esie. Nte ini akakade, enye, eyen esie eren, ye eyeneka esie an̄wan ẹma ẹkabade ẹdi mme asan̄autom Jehovah.
3. Nso idi ufọn edidian magazine ọtọkiet nnọ?
3 Dian Mmọ Kiet Nọ: Nte mme uwụtn̄kpọ oro ẹsụk ẹnọde mi ẹwụtde, nnyịn ikemeke ndidiọn̄ọ m̀mê mmanie ẹdikot magazine nnyịn, m̀mê nso ikeme ndidemede mmọ udọn̄. (Eccl. 11:6) Ke ntre, ọfọn ndidian Enyọn̄-Ukpeme ye Awake! ọtọkiet nnọ, idem okposụkedi nnyịn iditịn̄de ikọ iban̄a magazine kiet kpọt ke nneme nnyịn. Ke ndusụk idaha, ọkpọfọn ndinọ ediwak nsio nsio nsiondi magazine nnyịn ke ini kiet emi iwahade.
4. Didie ke nnyịn ikeme ndinam ndutịm nnọ utom magazine?
4 Ọfọn ndidiomi usen kiet kpukpru urua ndibuana ke utom magazine. Ke 2005 Calendar of Jehovah’s Witnesses, ẹwụt kpukpru Saturday nte “Usen Magazine.” Nte ededi, sia mme idaha n̄kann̄kụk ye idaha owo kiet kiet ẹdide nsio nsio, ndusụk owo ẹkeme ndisio usen efen nnịm ndisuan mme magazine nnyịn. Nte emi edi ubak ndutịm fo eke urua ke urua?
5. Nnyịn ikpọnọ ntịn̄enyịn ke mme ifet ewe emi ẹdude ndinịm magazine, ndien nso ikeme ndin̄wam nnyịn inam ntre?
5 Nịm Utịtmbuba nọ Idemfo: Ndinịm utịtmbuba nnọ idem nnyịn kaban̄a ibat magazine emi iyomde ndinịm kpukpru ọfiọn̄ ekeme ndin̄wam nnyịn inen̄ede iwụk ntịn̄enyịn ke ndinịm mme magazine. Nte afo emenyene afan̄ magazine? Nte afo emesinọ mbon oro osobode ke an̄wautom magazine? Nte afo emekeme ndinọ magazine ke utom efak, ke efakutom mbubehe, ye ke mme itie emi ẹkemede ndikụt ediwak owo? Nte afo emesikama magazine ke ini akade isan̄, akade urua, onyụn̄ akade ndisobo ye mme owo? Da kpukpru nti ifet oro ẹbererede n̄wam mbon efen ẹbọ ufọn ẹto Enyọn̄-Ukpeme ye Awake!
6. Didie ke nnyịn ikeme ndida n̄kani nsiondi magazine nnam n̄kpọ nte ọfọnde?
6 Imekeme ndinam edi utịtmbuba nnyịn n̄ko ndinịm n̄kani nsiondi oro inyenede. Idem ọkpọkọm owo inịmke magazine ke ufan̄ ọfiọn̄ kiet m̀mê iba tọn̄ọ nte ẹkesio, etop ẹdọn̄ọde ke mmọ ẹsụk ẹnyenyene ufọn. Deme mmọ nọ mbon oro ẹnyenede udọn̄. Mme magazine Enyọn̄-Ukpeme ye Awake! ẹdi “ikọ eke ẹtịn̄de ke ekem ini” ẹnọ ediwak miliọn owo. (N̄ke 25:11) Ẹyak nnyịn ida mmọ in̄wam ediwak miliọn owo efen efen ẹdi ẹdidiọn̄ọ ẹnyụn̄ ẹnam n̄kpọ Jehovah.