Ẹnen̄ede Ẹdori Nsọn̄uyo ke Bible!
1. Ke akpa, ẹkemịn̄ Enyọn̄-Ukpeme ẹnọ mmanie akpan akpan, ndien ẹkemịn̄ The Golden Age ẹnọ mmanie?
1 Ke October 1, 1919, ẹma ẹmịn̄ akpa nsiondi magazine oro The Golden Age. Enye ekedi ata eti n̄kpọutom ndida nnam utom ukwọrọikọ. Ntak-a? Sia ẹketịmde enye san̄asan̄a ẹnọ kpukpru owo. Ikedịghe ntre ye Enyọn̄-Ukpeme, emi ke ediwak isua ẹkesede nte magazine emi ẹtịmde ke ufọn “ekpri otuerọn̄.” (Luke 12:32) Mme asuanetop Obio Ubọn̄ ẹma ẹnen̄ede ẹkop inemesịt ndinyene obufa magazine emi. Ndien ke ediwak isua, ẹma ẹsuan The Golden Age awak akan ibat oro ẹsuande Enyọn̄-Ukpeme.
2. Nso idi enyịn̄ The Golden Age mfịn, ndien nso ikedi uduak esie toto ke editọn̄ọ?
2 Ẹkemịn̄ magazine The Golden Age ndiwụt mme owo nte ke edi Ukara Tọsịn Isua Christ edikọk mme mfịna ubonowo ofụri ofụri, onyụn̄ ada mfọnọn̄kpọ ọsọk mme owo. Ke mme isua oro ẹketienede, ẹma ẹnam ekese ukpụhọde ke The Golden Age man ẹkekem ye mme udọn̄ ini oro. Ke 1937, ẹma ẹkpụhọde enyịn̄ esie ẹkot Consolation. Ke 1946, ẹkedikot enye Awake!, kpa enyịn̄ oro nnyịn idiọn̄ọde enye mfịn.
3. Awake! edi okopodudu n̄kpọutom ke ndisu ewe ntịn̄nnịm ikọ?
3 Toto ke editọn̄ọ, magazine emi emetịp n̄kpọ akamba akamba esịn ke akwa ikọ ntiense oro ẹnọde ọtọn̄ọde ke 1919. (Matt. 24:14) Nte ededi, sia oyomde ẹnam n̄kpọ usọp usọp idahaemi, etie nte owụt ifiọk ndinam mme ukpụhọde en̄wen ke Awake!
4. (a) Nso ke oyom owo anam edieke enye oyomde ndibọhọ “usen iyatesịt Jehovah”? (b) Nte ekemde ye Ediyarade 14:6, 7, nso ke ‘angel emi efede ke ufọt enyọn̄’ ọdọhọ kpukpru owo ẹnam?
4 Ediwak miliọn owo ẹma ndikot Awake! sia enye esinemede nsio nsio ibuotikọ oro mîban̄ake ido ukpono ke inem inem usụn̄. Eyịghe idụhe ata ediwak mbon oro ẹsidụkde Editi kpukpru isua ẹdide mbon oro ẹsikotde Awake! kpukpru ini. Edi, edieke owo ekededi oyomde ndibọhọ “usen iyatesịt Jehovah,” enye oyoyom un̄wam man anam se ikande sụk edikot mme n̄wed nnyịn kpukpru ini.—Zeph. 2:3; Edi. 14:6, 7.
5. (a) Ọtọn̄ọde ye Awake! eke January 2006, nso ke ẹdinen̄ede ẹneme? (b) Nso ke emi edinụk ediwak owo ndinam, ke ndisu ewe ntịn̄nnịm ikọ?
5 Ntem, ọtọn̄ọde ke January 2006, Awake! edinen̄ede odori nsọn̄uyo ke Obio Ubọn̄ Abasi. Enye eyesịn udọn̄ ọnọ mme andikot nnennen nnennen ndiwọn̄ọde n̄ka Bible n̄koyom usọbọ kaban̄a mme mfịna oro mmọ ẹsobode oyonyụn̄ enen̄ede owụt nte Bible anamde mme n̄kpọntịbe idahaemi an̄wan̄a. Ke usụn̄ emi, mme andikot ẹyenen̄ede ẹnyene ifiọk ẹban̄a mme n̄kpọntịbe idahaemi ndien se mmọ ẹkotde ekeme ndinụk mmọ ndikpep n̄kpọ efen efen mban̄a Jehovah.—Zech. 8:23.
6, 7. (a) Didie ke Awake! edin̄wam mme owo ndida 1 Thessalonica 2:13 nsịn ke edinam? (b) Ikafan̄ ke ẹdimịn̄ Awake!, ndien ukpụhọde emi editụk usem ifan̄?
6 Awake! ayaka iso eneme mme ibuotikọ oro kpukpru owo ẹmade. Nte ededi, ẹdinen̄ede ẹdori nsọn̄uyo ke Bible. (1 Thess. 2:13) Sia Enyọn̄-Ukpeme esịnede ntotụn̄ọ ifiọk Bible ndien Awake! edinemede ediwak ibuot nneme oro ẹkọn̄ọde ke Bible, itiehe nte oyom ẹka iso ẹmịn̄ Awake! ikaba ke ọfiọn̄. Ke ntre, ọtọn̄ọde ye nsiondi esie eke January 2006, ẹdimịn̄ Awake! nte magazine ini kiet ke ọfiọn̄. Ke akamba udomo, emi oyosụhọde utom oro ẹnamde ke nditịm, ndikabade, nnyụn̄ nnọ mme n̄wed nnyịn ẹwọrọ.
7 Ukpụhọde emi oyotụk n̄kpọ nte mbahade 40 eke ikie ke otu mme usem oro ẹsidade ẹmịn̄ Awake! Ke ata ediwak usem, ẹsimịn̄ Awake! ini kiet ke ọfiọn̄ m̀mê ikanan̄ ke isua. Owo idinamke ukpụhọde ke magazine Enyọn̄-Ukpeme.
8. Didie ke mme asuanetop ẹdinịm Awake! ye Enyọn̄-Ukpeme?
8 Mme asuanetop ẹkeme ndimen Awake! eke ọfiọn̄ ke ọfiọn̄ ẹdian ye ekededi ke otu nsiondi Enyọn̄-Ukpeme eke ọfiọn̄ oro ẹnịm. Mbon oro ẹnịmde Awake! ẹyekeme ndikama nsiondi kiet ke ofụri ọfiọn̄ inyụn̄ ikpụhọkede ukot nneme mmọ ke ufọt ọfiọn̄, nte isinamde idahaemi.
9. Nso ufọn ke Awake! edika iso anam?
9 Toto ke akpa nsiondi esie ko-o ke 1919, magazine emi ẹkediọn̄ọde nte Golden Age, Consolation, ye idahaemi nte Awake!, emenyene akamba udeme ke utom ukwọrọikọ. Akam nnyịn edi yak Jehovah aka iso ọdiọn̄ nte ẹsuande magazine emi ẹsiode ke obufa usụn̄ mi, onyụn̄ an̄wam ediwak owo efen efen emi ẹtode “kpukpru idụt ye esien ye obio ye usem” ndiwọn̄ọde mbịne Obio Ubọn̄ Abasi nte n̄kukụre idotenyịn mmọ.—Edi. 7:9.