Ikpehe 10: Ndinịm Ukpepn̄kpọ Bible Oro Enyenede Uforo
Ndikpep Nditọ Ukpepn̄kpọ Utom eke Ufọk ke Ufọk
1 Ke ini mbiowo ẹbierede ke eyen ukpepn̄kpọ Bible odot ndidi asuanetop oro mînaha baptism, enye ekeme nditọn̄ọ mbuana ye esop ke an̄wan̄wa utom ukwọrọikọ. (Se Ẹtịm Man Inam Uduak Jehovah, p. 79-81.) Didie ke nnyịn ikeme ndin̄wam eyen ukpepn̄kpọ oro akan n̄kpọ-ata eke edikwọrọ ikọ ke ufọk ke ufọk?
2 Nditịm Idem Ọtọkiet: Edinen̄ede ntịm idem edi ata akpan n̄kpọ. Wụt eyen ukpepn̄kpọ ebiet emi enye ekemede ndikụt mme ekikere oro ẹnọde ke Utom Obio Ubọn̄ Nnyịn, n̄wed Reasoning, ye ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible, nyụn̄ n̄wam enye emek mmemmem usụn̄ ndida ntọn̄ọ nneme oro odotde ye efakutom n̄kann̄kụk. Toto ke ntọn̄ọ, sịn udọn̄ nọ enye ndikot Bible ke ini ọkwọrọde ikọ.—2 Tim. 4:2.
3 Mme ini ndomonse ẹsinen̄ede ẹnyene ufọn ẹnọ obufa asuanetop. Nte eyen ukpepn̄kpọ anamde emi owụt, wụt enye nte akpadade usọ ese aban̄a se ẹsitịn̄de ke efakutom. (Col. 4:6) Nam enye ọfiọk nte ke iyomke mme Christian asan̄autom ẹfiọk ibọrọ kpukpru mbụme oro enyeneufọk ekemede ndibụp. Ediwak ini esifọn ẹdọhọ ke ẹyenam ndụn̄ọde ndien ẹfiak ẹdineme n̄kpọ oro.—N̄ke 15:28.
4 Ndisan̄a Ntre N̄kwọrọ Ikọ: Akpa ini oro eyen ukpepn̄kpọ anamde utom eke ufọk ke ufọk, yak enye ese nte afo ọkwọrọde se mbufo mbiba ẹketiede ntre ẹtịm. Ekem nam enye etiene abuana. Ke ndusụk idaha, ekeme ndifọn ẹdọhọ obufa asuanetop oro etịn̄ ndusụk ikọ, utọ nte ndikot nnyụn̄ ntịn̄ mban̄a itie N̄wed Abasi. Kere ban̄a edu ye ukeme eyen ukpepn̄kpọ oro. (Phil. 4:5) Toro enye ke ofụri esịt, nte afo akade iso ọnọ enye ukpep ke nsio nsio ikpehe utom ukwọrọikọ.
5 Enen̄ede ọfọn ndin̄wam obufa asuanetop anam ndutịm man akpabuana ke utom ukwọrọikọ ofụri ini, anamde ntre ke urua ke urua edieke ekemede. (Phil. 3:16) Nam akpan ndutịm ndisan̄a ye enye ke an̄wautom, nyụn̄ sịn udọn̄ nọ enye ndisan̄a ye mme ifịk ifịk asuanetop eken. Enye ndisan̄a ye mmọ nnyụn̄ ntiene uwụtn̄kpọ mmọ ayan̄wam enye ndinyene usọ nnyụn̄ n̄kop inemesịt ke ndikwọrọ ikọ ke ufọk ke ufọk.