Ikpehe 12: Ndinịm Ukpepn̄kpọ Bible Oro Enyenede Uforo
Ndin̄wam Nditọ Ukpepn̄kpọ Ẹtọn̄ọ Ẹnyụn̄ Ẹnịm Mme Ukpepn̄kpọ Bible
1 Ke ini nditọ ukpepn̄kpọ Bible nnyịn ẹtọn̄ọde ndiwọrọ an̄wautom, ndịk ekeme ndinam mmọ ke ini mmọ ẹkerede ẹban̄a nte mmimọ iditọn̄ọde inyụn̄ ika iso ke ndinịm mme ukpepn̄kpọ Bible eke idemmọ. Didie ke nnyịn ikeme ndin̄wam mmọ ẹnyene uko ke akpan ikpehe an̄wautom emi?—Matt. 24:14; 28:19, 20.
2 Ke ini eyen ukpepn̄kpọ Bible odotde ndikabade ndi asuanetop oro mînaha baptism, ana edi enye ama ọbọbọ ufọn oto Ufọkn̄wed Utom Ukara Abasi. Ukpep oro enye ọbọde ke nditịm nnyụn̄ nnam se ẹnọde enye anam ke ufọkn̄wed emi ayan̄wam enye ndikọri mme usọ unọ ukpep oro ẹyomde ẹto “anamutom emi mînyeneke n̄kpọ eke anamde enye okop bụt, etịmde asiak ikọ akpanikọ.”—2 Tim. 2:15.
3 Nịm Eti Uwụtn̄kpọ: Jesus ekesinọ mme mbet esie ukpep ke ndinọ mmọ in̄wan̄-in̄wan̄ item ye ndinịm eti uwụtn̄kpọ nnọ mmọ. Enye ọkọdọhọ ete: “Owo ekededi eke ẹtịmde ẹkpep eyetie nte andikpep enye.” (Luke 6:40) Edi akpan n̄kpọ afo ndikpebe Jesus ke ndinịm eti uwụtn̄kpọ ke utom an̄wautom fo. Nte eyen ukpepn̄kpọ fo okụtde uwụtn̄kpọ fo ke an̄wautom, enye eyedifiọk ete ke uduak edinam mfiakn̄ka edi nditọn̄ọ mme ukpepn̄kpọ Bible.
4 Nam an̄wan̄a enye nte ke ini nnyịn iyomde ndinịm ukpepn̄kpọ Bible, isiyomke ẹtịn̄ ikọ awak akaha ẹban̄a ndutịm ukpepn̄kpọ emi. Esinen̄ede ọfọn ndida ikpehe kiet m̀mê iba ke n̄wed nnyịn nnam n̄wụt nte esinịmde ukpepn̄kpọ emi. Nti ekikere ke nte ẹkpenamde emi odu ke page 4 ke nsiondi Utom Obio Ubọn̄ emi, ye ke page 6 ke Utom Obio Ubọn̄ Nnyịn eke January 2002.
5 Ke ini odotde, dọhọ eyen ukpepn̄kpọ emi etiene fi mîdịghe etiene asuanetop efen oro enyenede mbufiọk aka mme ukpepn̄kpọ Bible efen. Enye ekeme nditiene nnọ ibọrọ ke ikpehe ekikere kiet mîdịghe etịn̄ n̄kpọ aban̄a akpan itie n̄wed Abasi kiet. Ntre, eyen ukpepn̄kpọ emi eyekpep ekese aban̄a ndinịm ukpepn̄kpọ Bible oro enyenede uforo ebe ke ndise se mbon efen ẹnamde. (N̄ke 27:17; 2 Tim. 2:2) Toro enye nyụn̄ wụt enye nte enye ekemede ndinam ọfọn akan oro ini en̄wen.
6 Ndinọ mbufa mme asuanetop ukpep man mmọ ẹkabade ẹdi mme andikpep Ikọ Abasi ayanam mmọ ẹdot ndinam “eti utom” eke editọn̄ọ nnyụn̄ nnịm mme ukpepn̄kpọ Bible eke idemmọ. (2 Tim. 3:17) Enen̄ede edi n̄kpọ inemesịt ndinam utom ye mmọ ke ndinọ mme owo ima ima ikot emi: “Yak owo eke amade ọbọ mmọn̄ uwem ọn̄wọn̄ ke mfọn”!—Edi. 22:17.