Da Mme N̄wed Nnyịn Emi Ẹkọn̄ọde ke Bible Nam N̄kpọ Ọniọn̄ Ọniọn̄
1, 2. Didie ke ediwak owo ẹsise mme n̄wed nnyịn, ndien ewe mbụme ke emi edemede?
1 “N̄kọtọn̄ọ ndisikot n̄wed mbufo toto ke 1965. Mmesikot mme itie N̄wed Abasi oro ẹdude ke mme n̄wed oro ke ini n̄kotde mmọ, ndien kpukpru se ẹwetde ke n̄wed mbufo ẹsan̄a ẹkekem ye se ẹwetde ke Bible. Mmesiyom ndifiọk ata akpanikọ aban̄ade Abasi ye Jesus, ndien mmekeme ndidọhọ ke akpanikọ nte ke mmenyene ata ibọrọ nto n̄wed mbufo ye Bible.” Ntem ke ete kiet ekewet ọnọ ẹsọk ibuot itieutom eke Mme Ntiense Jehovah. Ke leta oro, enye ama oyom ukpepn̄kpọ Bible.
2 Ukem nte ete oro okowụtde esịtekọm do, ediwak miliọn owo ke ofụri ererimbot ẹma mme n̄wed un̄wam ukpep Bible oro “ofụn emi anamde akpanikọ onyụn̄ enyenede ọniọn̄” ọnọde. (Matt. 24:45) Kpukpru isua, ẹsimịn̄ ediwak n̄wed man ẹn̄wam mbon esịt akpanikọ “esịm nnennen ifiọk akpanikọ.” (1 Tim. 2:4) Didie ke nnyịn ikeme ndida mme n̄wed nnyịn emi ẹkọn̄ọde ke Bible nnam n̄kpọ ọniọn̄ ọniọn̄?
3. Didie ke nnyịn ikeme nditre ndibaha n̄wed?
3 Kûbaha N̄wed: Nte ini akade, nnyịn imekeme ndibọ n̄wed tutu mmọ ẹwak ẹkan se iyomde. Nso ke nnyịn ikeme ndinam man ikûbaha mme ọsọn̄urua n̄wed nnyịn? Oyom mbufiọk ke ini ibọde mme n̄wed oro ididade inam n̄kpọ ke an̄wautom. Utu ke ndibọ ediwak n̄wed oro idinọde ke an̄wautom, imekeme ndibọ kiet m̀mê iba, ekem ifiak ikọbọ efen ke ima ikenịm mbon oro ikọbọde. Emi idiyakke n̄wed ọyọhọ ufọk nnyịn. Ukem ntre, edieke inyenede ediwak magazine oro nnyịn mînịmke kan̄a, ọyọfọn ndisụhọde ibat oro isibọde.
4. Nso ke ẹkeme ndinam edieke mme n̄wed oro ẹdude ke esop ẹwakde ẹkaha?
4 N̄wed Oro Awakde Akaha: Edieke ndusụk n̄wed ẹwakde ẹkaha ke esop, anam-ndutịm n̄wed ekeme ndinyene nneme ye mme esop emi ẹdude ke n̄kann̄kụk oro man ese m̀mê mmọ ẹyeyom nyọhọ nsụhọ n̄wed oro. Mme asuanetop ẹkeme ndiyak n̄kani n̄wed nsịn ke ubọk mbonubon oro mînịmke ke akpanikọ, nditọ ukpepn̄kpọ Bible, ye mbon en̄wen. Mbon oro ẹbuanade ye esop obufa ẹkeme ndida n̄kani n̄wed emi nsịn ke itie ubon n̄wed mmọ.
5. Didie ke nnyịn ikeme ndiwụt esịtekọm mban̄a mme n̄wed nnyịn?
5 Nnyịn iyom n̄wed nnyịn anam uduak esie, oro edi, ndin̄wam mbon esịt akpanikọ ẹkpep ediwak n̄kpọ ẹban̄a mme utịbe utịbe uduak Jehovah. Ukem nte Jesus mîkabahake udia oro ọkọyọhọde osụhọ ke ini enye ọkọnọde otuowo udia ke utịbe utịbe usụn̄, utịtmbuba nnyịn ekpedi ndida mme ọsọn̄urua n̄wed nnyịn oro ẹkọn̄ọde ke Bible nnam n̄kpọ ke usụn̄ oro ọfọnde akan. (John 6:11-13) Etop unyan̄a uwem oro odude ke mme n̄wed nnyịn ikemeke nditụk esịt mbon oro ẹmade edinen ido edieke nnyịn mîmenke mmọ ke n̄kpọ udori n̄wed nnyịn m̀mê ndisio ke ẹkpat n̄wed nnyịn inọ mme owo. Ntre, ana nnyịn iwụt eti ibuot ke ini ibọde n̄wed ndikama ke an̄wautom, inyụn̄ ida enye inam n̄kpọ ọniọn̄ ọniọn̄ man mbon efen ẹbọ ufọn.—Phil. 4:5.