Nen̄ede Kere Ban̄a Mbon Efen—Ebe ke Ndibụp Mbụme Nnyụn̄ N̄kpan̄ Utọn̄
1 Ediwak owo ẹsima nditịn̄ ekikere mmọ, edi mmọ isimaha etie nte ke ẹkpekpep m̀mê ẹdodụn̄ọde mmimọ. Ke ntre, nte mme asan̄autom Christian, oyom nnyịn ikpep ndibụp mbụme man ifiọk se mme owo ẹkerede.—N̄ke 20:5.
2 Mbụme nnyịn ẹkpenyene ndidemede owo udọn̄, idịghe ndisịn owo ndịk ke idem. Ke ini ọkwọrọde ikọ ke ufọk ke ufọk, eyenete kiet obụp ete, “Ndi afo emekere ke tutu amama ini oyodu oro mme owo ẹdikponode kiet eken ẹnyụn̄ ẹda kiet eken ke n̄kpọ?” Etienede ibọrọ oro ẹnọde, enye esidian do ete, “Afo ekere ke nso ke ẹnyene ndinam man ẹdu ke utọ idaha emi?” mîdịghe, “Ntak emi afo ekerede ntre?” Ke ini eyenete efen ọnọde ikọ ntiense ido nneme onyụn̄ ọkwọrọde ikọ ke mme itie oro ẹkemede ndikụt ediwak owo, enye esibụp mbon oro ẹnyenede nditọ ete, “Nte ete m̀mê eka, nso ke afo enen̄ede ama?” Onyụn̄ adian do ete, “Nso isinen̄ede ifịna fi?” Tịm fiọk ke mme mbụme emi ẹsinam mme owo ẹtịn̄ ekikere mmọ utu ke ndinam mmọ ẹkop bụt. Sia idaha mme owo edide nsio nsio, ekeme ndiyom nnyịn ikpụhọde ibuotikọ inyụn̄ inam mme mbụme nnyịn ẹkekem ye mme owo ke efakutom nnyịn.
3 Ndinam Mme Owo Ẹtịn̄ Ekikere Mmọ: Edieke mme owo ẹnyịmede nditịn̄ ekikere mmọ nnọ fi, da ini kpan̄ utọn̄, kûbọ mmọ ikọ ke inua. (Jas. 1:19) Nen̄ede kọm mmọ ke se mmọ ẹtịn̄de. (Col. 4:6) Afo emekeme ndidọhọ: “Mmokop se etịn̄de. Amanam ke nditịn̄ n̄kpọ emi nnọ mi.” Toro mmọ ke ofụri esịt edieke ekemede ndinam ntre. Bụp mbụme en̄wen man ọfiọk se mmọ ẹkerede ye ntak emi mmọ ẹkerede ntre. Yom n̄kpọ oro mbufo mbiba ẹnyịmede. Ke ini oyomde ndidụri ntịn̄enyịn mmọ n̄wụt se N̄wed Abasi etịn̄de, afo emekeme ndidọhọ, “Ndi akanam emekere aban̄a emi?” Kûtie uyịre uyịre m̀mê nditie mfan̄a mfan̄a.—2 Tim. 2:24, 25.
4 Usụn̄ oro mbon efen ẹbọrọde mbụme nnyịn ekeme ndinen̄ede n̄kọn̄ọ ke nte nnyịn ikpan̄de utọn̄ inọ mmọ. Mme owo ẹkeme ndifiọk m̀mê nnyịn imenen̄ede ikpan̄ utọn̄. Esenyịn kiet oro asan̄ade-san̄a ọkọdọhọ ete, “Ke ini afo enen̄erede akpan̄ utọn̄ ọnọ mme owo, emi ayanam odụri mme owo adian idem, onyụn̄ owụt ke emenen̄ede ekere aban̄a mbon efen.” Ndikpan̄ utọn̄ nnọ mme owo ọnọ mmọ ukpono, ndien emi ekeme ndinam mmọ ẹkpan̄ utọn̄ ẹnọ eti mbụk oro iyomde ndikwọrọ nnọ mmọ.—Rome 12:10.