N̄wed Bible Ekpep—Akpan N̄wed Un̄wam Ukpep Bible Nnyịn
1 Akaduai nnyịn idem didie ntem ndikụt nte ẹsiode n̄wed Nso ke Bible Enen̄ede Ekpep? ke Mbono District “N̄kopuyo Abasi”! Mme andidụk mbono ẹma ẹdat esịt ndibọ idem kiet ke ẹma ẹkesuana ndutịm eke Saturday. Didie ke ẹdida obufa n̄kpọutom emi ẹnam n̄kpọ? Ẹtịm enye man edi akpan n̄wed un̄wam ukpep Bible. Okposụkedi ẹdinọde obufa n̄wed emi ke March, ẹsịn udọn̄ ẹnọ mme asuanetop ndisọsọp nda enye ntọn̄ọ nnyụn̄ nnịm ukpepn̄kpọ Bible.
2 Ukpepn̄kpọ Bible Oro Ẹsụk Ẹnịmde ke Ubọk: Mme asuanetop oro ẹdade n̄wed Ifiọk m̀mê ediye uduot ekpri n̄wed Oyom ẹnịm ukpepn̄kpọ Bible ẹkpenyene ndida mbufiọk mbiere nte mmimọ ikpọtọn̄ọde ye ini oro ikpọtọn̄ọde ndida obufa n̄wed emi ntọn̄ọ ukpepn̄kpọ. Edieke ọkọtọn̄ọde ukpepn̄kpọ ke ndondo emi, akam ọfọn nditọn̄ọ ye obufa n̄wed oro inikiet. Edieke akade anyan ke n̄wed Ifiọk, afo emekeme ndika iso ke ibuot oro enyenede n̄kpọ ndinam ke n̄wed Bible Ekpep. Edieke ekperede ndikụre n̄wed Ifiọk, afo emekeme ndikpep enye mma.
3 Nte eyịghe mîdụhe, kpukpru nnyịn imọfiọk ediwak owo oro ẹdibọde ufọn ẹto edikpep n̄wed Bible Ekpep. Ntak mûdaha n̄wed un̄wam ukpep Bible emi unịm ukpepn̄kpọ Bible ye mme owo? Ke uwụtn̄kpọ, mbon oro ẹkekpepde ediye uduot ekpri n̄wed Oyom m̀mê n̄wed Ifiọk edi mîyakke idem inọ inyụn̄ ina baptism ẹkeme ndifiak ntọn̄ọ ukpepn̄kpọ ke obufa n̄wed emi. Mme ete ye eka ẹkeme ndida n̄wed emi n̄kpep nditọ mmọ nnennen ifiọk aban̄ade uduak Abasi.—Col. 1:9, 10.
4 Ndikpep N̄wed Efen: Ndi ẹnam ndutịm man eyen ukpepn̄kpọ Bible ekpep n̄wed efen ke ama okokụre n̄wed Nso ke Bible Enen̄ede Ekpep? Ih. Edieke uyarade odude nte ke eyen ukpepn̄kpọ ke anam n̄kọri, okposụkedi edide sụn̄sụn̄, ndien enye ke owụt esịtekọm aban̄a se enye ekpepde, ẹkeme ndika iso nda n̄wed Tuak Ibuot nọ Ata Abasi Kierakiet n̄kpep enye n̄kpọ. Nnyịn imodori enyịn ite ke n̄wed Bible Ekpep edidi okopodudu n̄kpọutom ndida nnam utom edinam mme mbet oro ẹdọn̄de nnyịn.—Matt. 28:19, 20.