Nen̄ede Kere Ban̄a Mbon Efen—Ebe ke Ndikwọrọ Ikọ ye Unana Asari
1 Apostle John ama okụt ke n̄kukụt nte angel efede ke ufọt enyọn̄ atan̄ade nsinsi eti mbụk ọnọ mme owo ke “kpukpru idụt ye esien ye usem ye obio.” (Edi. 14:6) Ndi nnyịn imekpebe uwụtn̄kpọ angel oro ke ndikwọrọ ikọ ye unana asari? Ye unana edifiọk, nnyịn imekeme ndisari asari. Nte nnyịn isede mme owo oro nnyịn isobode ekeme nditụk usụn̄ oro nnyịn ikwọrọde eti mbụk inọ mmọ. Ke ntre, oyom inen̄ede ikere iban̄a mbon en̄wen ke ini ikwọrọde ikọ inọ mme owo ẹtode nsio nsio itie.
2 Se Efakutom Mbufo: Ndi mme ododụn̄ m̀mê mme andifehe nyom ubọhọ ẹdu ke efakutom mbufo? Ẹkeme ndifụmi mmọ mmemmem mmemmem. Ka koyom mmọ, nyụn̄ domo ndinen̄ede ndiọn̄ọ mmọ. Nso idọn̄ inyụn̄ ibehe mmọ, nso ke mmọ ẹma ẹnyụn̄ ẹsua, nso isitịmerede mmọ esịt? Domo ndikpụhọde usụn̄ oro atan̄ade etop Obio Ubọn̄ man ekekem ye mme idaha. (1 Cor. 9:19-23) Ukem nte apostle Paul, nnyịn ikpenyene ndibiom mbiomo nnyịn ndikwọrọ eti mbụk nnọ kpukpru owo ke efakutom nnyịn, esịnede mbon oro ẹtode idụt efen, mbon oro ido unam n̄kpọ mmọ ẹdide isio, mbon oro ẹsemde usem efen, ye mbon oro ẹnen̄erede ẹnyene n̄kpọ.—Rome 1:14.
3 Ntem, didie ke afo ekeme ndikwọrọ ikọ nnọ owo oro esemde usem efen? Da ekpri n̄wed Good News for People of All Nations nam n̄kpọ ke eti usụn̄. Afo emekeme n̄ko ndikama mme tract m̀mê ndiye uduot n̄kpri n̄wed ke mme usem oro ẹnen̄ede ẹmehe ke efakutom mbufo. (Se Utom Obio Ubọn̄ Nnyịn eke July 2003, p. 8, ikp. eki. 2-3.) Ke adianade do, ndusụk mme asuanetop ẹmesịn ukeme ẹkpep nte ẹkọmde owo ye nte ẹnọde ibio ibio ikọ ntiense ke mme usem efen. Mme owo ẹsikop inemesịt ke ini ẹkopde nte owo odomode ndida usem mmọ ntịn̄ ikọ ye mmọ, ọkpọkọm ẹtịn̄ esisịt, ndien emi ekeme ndinam mmọ ẹkop eti mbụk.
4 Kpebe Jehovah: Ke ndika mbịne mme owo oro ẹtode nsio nsio idụt, nnyịn ikpebe Abasi nnyịn oro mînamke asari, kpa Jehovah “emi uduak esie edide nte kpukpru orụk owo ẹkpenyene edinyan̄a ẹnyụn̄ ẹsịm nnennen ifiọk akpanikọ.”—1 Tim. 2:3, 4.