Obufa Ndutịm Mbono Circuit

Ererimbot oyom nnyịn inịm ke editịm n̄kpọ emi odude mi ayaka iso odu ke nsinsi. Nte ededi, Ikọ Abasi idọhọke ntre. (1 John 2:15-17) Enye an̄wam nnyịn ndikụt nte ke ‘ndibon n̄kpọuto ke isọn̄’ inyeneke ufọn. Man ẹsọn̄ọ ikọt Abasi idem, ndutịm mbono circuit eke isua utom 2007 ayatat ibuotikọ emi, “Ẹbon N̄kpọuto . . . ke Heaven.”—Matt. 6:19, 20.

Uma inyene obụkidem esịne ke otu n̄kpọ oro ẹwụtde ke Ephesus 2:2 nte “odudu ofụm, kpa spirit oro anamde utom ke emi ke esịt nditọ ntụtutọn̄.” Ukem nte ata ofụm odude ke kpukpru ebiet man mme owo ẹn̄wek, ntre ke “spirit ererimbot emi” ọyọhọ editịm n̄kpọ emi. (1 Cor. 2:12) Sia enye enen̄erede otụk owo, ẹdọhọ ke enye enyene “odudu.” Obufa ndutịm mbono circuit ayan̄wam nnyịn ndifep uma inyene ererimbot emi onyụn̄ anam nnyịn inen̄ede iwụk ntịn̄enyịn ke mme akpan n̄kpọ. (Matt. 6:33) Ke adianade do, ndutịm oro ayan̄wam nnyịn ndibuọt idem ke Jehovah nte nnyịn inamde utom ukwọrọikọ nnyịn kpa ye oro isobode mme mfịghe ye mme idomo.

Kụt ete ke omodu ke usen mbiba emi onyụn̄ ‘etịm ọnọ n̄kpan̄utọn̄.’ (Heb. 2:1) Wet mbio mbio akpan n̄kpọ oro edikemede ndida nsịn ke edinam ke uwem fo ye ke utom an̄wautom fo. Edieke odude toto ke ntọn̄ọ tutu esịm utịt akama-ufọn ndutịm eke spirit emi, afo ọyọbọ nsịnudọn̄ ye odudu ndika iso ‘mbọn n̄kpọuto ke heaven’!