Mbono District “Ẹtiene Christ!” eke Mme Ntiense Jehovah eke 2007
1, 2. (a) Didie ke Moses ekesịn udọn̄ ọnọ nditọ Israel ẹbọ ufọn ẹto edisop idem ọtọkiet? (b) Nso mben̄eidem ke nnyịn inyene nditọn̄ọ idahaemi nnam?
1 Moses ama owụk kpukpru nditọ Israel ye isenowo ete ẹsop idem ọtọkiet kpukpru isua itiaba man ẹkot Ibet ẹnọ mmọ. Ntak-a? ‘Man mmọ ẹkop, man mmọ ẹnyụn̄ ẹkpep n̄kpọ.’ (Deut. 31:10-12) Jehovah ama okụt ke ọfọn ndikot ikọt esie mbok ke akwa otu. Ibịghike, ikọt Jehovah ẹyefiak ẹsop idem ọtọkiet ke usen ita ke Mbono District “Ẹtiene Christ!”
2 Nte ọmọtọn̄ọ ndiben̄e idem? Nte oyoyom eben̄e eteutom fo ini nduọkodudu man ada odụk mbono emi? Nte afo ọmọtọn̄ọ ndisio okụk nnịm man afo ye ubon fo ẹkeme ndidụk ofụri usen ita? Nte emekeme ndin̄wam nditọ ukpepn̄kpọ Bible fo m̀mê mbonubon fo oro mînịmke ke akpanikọ ẹtiene fi ẹdụk mbono emi? Nte odu mme owo ke esop emi ẹdiyomde un̄wam man ẹkpekeme ndidụk? Nte amanam ndutịm ndidụk mbono oro mîdịghe enye oro ẹdemede esop mbufo ẹsịn? Nte oyoyom ufọkidụn̄? Se ẹwetde ke idak emi ayan̄wam fi ndiben̄e idem.
3. (a) Didie ke Isaiah 25:6 osu mfịn? (b) Nso ke ẹsikụt ke ibat mbon oro ẹsidụkde mbono ke Friday, ndien nso ke nnyịn owo kiet kiet ikpanam?
3 Dụk Ofụri Usen Ita: Jehovah esinọ ikọt esie akpakịp udia eke spirit. (Isa. 25:6) Emi esịne udia eke spirit oro ẹsinọde ke ikpọ mbono nnyịn eke isua ke isua. Ẹsikụt ke ibat mbon oro ẹsidụkde mbono ke Friday esinen̄ede osụhọde akan eke Saturday ye Sunday. Nam edi utịtmbuba fo ndidụk kpukpru inem inem mbono usen ita emi esop Jehovah etịmde mi ọnọ nnyịn! Edieke anade eben̄e ini nduọkodudu oto eteutom fo, sịn emi ke akam. Ekem da “uko” tịn̄ ikọ ye eteutom fo ke ndondo oro ẹsiakde usenọfiọn̄ mbono mbufo. (1 Thess. 2:2; Neh. 2:4, 5) Ọkpọfọn ndinam enye ọdiọn̄ọ ke ndika mbono kpukpru isua edi akpan n̄kpọ ke utuakibuot fo. Ndibabak nnam emi ekeme ndinam emem utom ọnọ eteutom fo ndinam n̄kpọ mban̄a eben̄e fo.
4. Didie ke ikeme ndinam nditọ ukpepn̄kpọ Bible nnyịn ye mbonubon nnyịn oro mînịmke ke akpanikọ ẹben̄e idem ẹnọ mbono emi?
4 Ndinam Nditọ Ukpepn̄kpọ Bible Fo ye Ubon Fo Ẹben̄e Idem: Ekpenem didie ntem ndikụt nditọ ukpepn̄kpọ Bible fo ẹtienede fi ẹdụk mbono emi ẹnyụn̄ ẹkụtde ke idemmọ nte nditọete nnyịn ẹnyenede ufiop ufiop ima “ke akamba esop”! (Ps. 22:25) Babak dọhọ mmọ man mmọ ẹkeme ndinam ndutịm ndidụk. Tịn̄ ntak emi afo esimade ndidụk mbono nọ mmọ. Emekeme ndinam mmọ ẹfiọk se mmọ ẹdikụtde ke itiembono ebe ke ndinam mmọ ẹse mme vidio emi ẹwụtde nte ẹsinịmde mbono, akpan akpan vidio oro United by Divine Teaching. Nam mbonubon oro mînịmke ke akpanikọ ẹdiọn̄ọ ndutịm oro afo anamde. Iso-ọfọn mmọ ẹkeme ndidiomi ndidi ndise drama m̀mê ndidụk mbono ke usen kiet ke nsụhọde n̄kaha.
5, 6. (a) Didie ke nnyịn ikeme ndiwụt ke imenyene edu ntatubọk oro ẹtịn̄de ẹban̄a ke 1 Timothy 6:18? (b) Nso ndutịm ke ẹnam man ẹn̄wam ndusụk mbon oro ẹyomde ẹn̄wam mmimọ ẹbọ ufọkidụn̄?
5 Ndin̄wam Nditọete Fo: Apostle Paul ọkọdọhọ mme Christian oro ẹnyenede inyene obụkidem “ete ẹfọn ido, ẹyọhọ ye nti utom, ẹtat ubọk, ẹnyịme ndibuana se mmọ ẹnyenede.” (1 Tim. 6:17, 18) Nnyịn imekeme ndinyene edu ntatubọk oro Paul ekesịnde udọn̄ ọnọ mi edieke nnyịn ikerede iban̄a mbon oro ẹma ẹkesọn̄ ẹnyụn̄ ẹkopde mmemidem, mbon oro ẹnamde utom uyọhọ ini, mme ubon emi ete m̀mê eka ikpọn̄ ẹsede enyịn, ye mbon eken ke esop oro ẹdiyomde un̄wam man ẹkeme ndidụk mbono emi. Edi mbiomo iman emi ẹdude ke akpanikọ ndin̄wam utọ mmọemi, edi mbiowo ye mbon eken ẹkeme ndida mbufiọk nnọ un̄wam nte oyomde.—Gal. 6:10; 1 Tim. 5:4.
6 Edieke owo ke esop oyomde ẹn̄wam imọ ẹbọ ufọkidụn̄, Kọmiti Utom Esop ẹnyene ndibiere m̀mê asuanetop emi odot ndiwet n̄kpọ nyọhọ ikpehe oro aban̄ade Special Needs ke babru Room Request.
7. Nso idi mme n̄kpọ oro anade inam edieke iyomde ndidụk mbono oro mîdịghe enye oro ẹdemede esop nnyịn ẹsịn?
7 Ndidụk Mbono Efen: Idaha fo ekeme ndinam oyom ndidụk mbono oro mîdịghe enye oro ẹdemede esop mbufo ẹsịn. Edieke ediyomde ufọkidụn̄, mbọk sobo ye ewetn̄wed esop mbufo man ọnọ fi babru Room Request. Nọ babru oro aka nnennen adres. Edieke ẹdinịmde mbono iba m̀mê awakde akan oro ke obio oro, kụt ete ke emewet usenọfiọn̄ mbono oro oyomde ndidụk.
8. Nso idi mme akpan n̄kpọ oro nnyịn ikpetide ke ini iyomde ndibọ ufọkidụn̄, ndien ntak-a? (Sịn ekebe oro odude ke page 4.)
8 Ufọkidụn̄: Man efere mbufo ke idem, ẹyenam ndutịm ndinọ ufọkidụn̄ ke mme obio mbono kiet kiet. Ufọk esidu ke ndusụk itiembono, edide ufọk ibio ini m̀mê ufọkidụn̄ oro ẹbọpde man ediwak owo ẹdụn̄. Mbọk ẹti ẹte ke esop Abasi idikemeke ndibọp ufọkidụn̄ nnọ kpukpru mme andidụk mbono. Mbon oro Itieutom Unọ Ufọkidụn̄ ọnọde unyịme kpọt ẹdidụn̄ ke ufọkidụn̄ emi. Edieke ẹnọde fi ufọkidụn̄ ke ebiet efen, afo ekpenyene ndibere ye Itieutom Unọ Ufọkidụn̄ onyụn̄ odu ke ufọkidụn̄ fo. Ti ke ekeme ndiyom ekpekpe usụn̄ aka itiembono kpukpru usen. Oyom n̄ko ẹtịp etịbe kaban̄a utom ofụri ererimbot. Ntem, oyom esịn emi ke ndutịm fo ke ini afamde okụk enịm ọnọ mbono. (1 Cor. 16:1-4; 2 Cor. 9:7) Mbemiso ewetde n̄kpọ ọyọhọ babru Room Request, dụn̄ọde mme akpan n̄kpọ oro ẹdude ke ekebe oro “Nte Ẹkpebọde Ufọkidụn̄.”
9, 10. (a) Mme ndutịm ewe ke ẹsinam ẹnọ nnyịn mbemiso isịmde itiembono? (b) Didie ke ikeme ndiwụt ke imama inyụn̄ iwụt esịtekọm iban̄a kpukpru utom oro ẹnamde ke ufọn nnyịn? (Kot Hebrew 13:17.)
9 Bere ye Mme Ndutịm Oro Ẹnamde: Ke ini isịmde itiembono, nnyịn iyokụt ekese utom oro ẹnamde ẹben̄e nnyịn. Ndima nditọete emi ẹdide mme adaidaha ẹyekọm nnyịn, ẹnọ nnyịn n̄wed ndutịm, ẹnyụn̄ ẹnọ nnyịn itie. Nditọete iren ye iban ẹmenam an̄wa mbono asan̄a ẹnyụn̄ ẹnam mbot utịn̄ikọ eye. Ẹma ẹnyụn̄ ẹnam mme akpan utom efen emi afo mûkwe man ẹtịm idem ẹnọ mme ikpehe edinam, ẹkụt mme andinyene ufọkidụn̄, ẹnyụn̄ ẹse ẹban̄a ediwak n̄kpọ eken.
10 Ke kpukpru mbono, ekese owo ẹsinam utom ke ediwak ọfiọn̄ man ẹnam ndutịm oro oyomde, ndien ubon mmọ n̄ko ẹsitịp ẹsịn ebe ke ndinọ mmọ ini ẹda ẹse ẹban̄a akpan ndutịm emi. Nte nnyịn imaha n̄waidem oro ẹsinamde ke ufọn nnyịn? Nnyịn imekeme ndiwụt esịtekọm ebe ke ndinam mme item oro ẹnọde ke ibuotikọ emi ye ndausụn̄ ekededi oro nnyịn idibọde mbemiso ini mbono nnyịn. (Heb. 13:17) Edieke kpukpru owo ẹnyịmede ndibere ye mme ndutịm oro ẹnamde, kpukpru n̄kpọ ‘ẹyeda itie ke ido nte eyede ye ke ndutịm.’—1 Cor. 14:40.
11. (a) Ntak emi mboho ikọt Jehovah enen̄erede edi akpan n̄kpọ ke ini nnyịn? (b) Nso ke nnyịn owo kiet kiet ikpanam idahaemi?
11 Nte nnyịn ‘ikụtde nte usen oro asan̄ade ekpere,’ mboho ikọt Abasi enen̄ede edi akpan n̄kpọ. (Heb. 10:25) Ke mbono Christian nnyịn, otu ofụn emi anamde akpanikọ onyụn̄ enyenede ọniọn̄ esinọ ntọt oro edin̄wamde nnyịn ‘ikpeme ndinịm kpukpru ikọ’ emi Jehovah oyomde nnyịn inam. (Deut. 31:12) Tọn̄ọ idahaemi ben̄e idem ndidụk Mbono District “Ẹtiene Christ!” emi edidide usen ita nyụn̄ bọ ufọn to kpukpru item Abasi ye inem inem ebuana nditọete!
[Ekebe ke page 3]
Mme Ini Edinam
Friday 9:00 a.m. - 4:35 p.m.
Saturday 9:00 a.m. - 4:35 p.m.
Sunday 9:00 a.m. - 3:40 p.m.
[Ekebe ke page 4]
Nte Ẹkpebọde Ufọkidụn̄
1. Bọ ewetn̄wed esop mbufo babru Room Request.
2. Babak wet n̄kpọ yọhọ babru Room Request emi. Mbọk kụt ete ke ọmọnọ ọyọhọ ntọt aban̄a enyịn̄, isua emana, nyụn̄ wụt m̀mê owo oro oyomde itieidụn̄ edi eren m̀mê n̄wan, asiakusụn̄ m̀mê asuanetop. Ẹnyene ndiwet n̄kpọ ke babru Room Request ediye ediye ye nte ẹkemede ndikot.
3. Ewetn̄wed esop ekpenyene ndise nnyụn̄ nsịn ubọk ke babru Room Request onyụn̄ ọnọ enye aka itiembono IDỊGHE N̄KỌK ITIEUTOM. Ntak edi nte ke ubiatini ekeme ndidu edieke ẹnọde babru emi aka n̄kọk itieutom mbemiso esịmde Itieutom Unọ Ufọkidụn̄.
4. Ẹkpenyene ndibabak nnọ babru Room Request ẹsọk Itieutom Unọ Ufọkidụn̄. Emi ọyọnọ Itieutom Unọ Ufọkidụn̄ ini oro ekemde ndiyom eti itieidụn̄ nnọ fi.
5. Itieutom Unọ Ufọkidụn̄ ayanam ọfiọk itie emi afo edidụn̄de mbemiso mbono ọtọn̄ọde ndien ẹkeme ndidọhọ fi ebem iso ekpe okụk man enyene itieidụn̄ oro.
Mbọk
◼ Ẹnyịme ndibọ itieidụn̄ oro Itieutom Unọ Ufọkidụn̄ ọnọde. Ẹkûdụn̄ ke mme ufọkidụn̄ an̄wa mbono edieke Itieutom Unọ Ufọkidụn̄ mîdọhọke mbufo ẹdụn̄ do. Ẹkûyak ibat owo oro ẹdụn̄de do awak akan se ẹkenyịmede.
◼ Ẹkûdụk mme itie oro ẹdọhọde ẹkûdụk ke itieidụn̄ oro mbufo ẹdude. Ẹtem udia n̄kukụre edieke ẹnyịmede ẹnam oro ye ke itie oro ẹdọhọde ẹtem.
◼ Kûnọ enyene-ebiet okụk oro awakde akan se Itieutom Unọ Ufọkidụn̄ ọkọnọde man afo enyene itieidụn̄.
◼ Ke anamde ọkpọkpọ ndutịm man enyene itieidụn̄, mbọk bụp Itieutom Unọ Ufọkidụn̄ mbak afo udubọ ukem ufọkidụn̄ oro owo efen ọkọbọde.