Nte Afo Emenyene Ọkpọkpọ Efakutom?
1. Nso idi ọkpọkpọ efakutom?
1 Ọkpọkpọ efakutom edi efakutom oro ẹnọde fi. Enye ekeme ndidu n̄kpere fi man afo ekeme ndisọsọp nsịm do n̄kọkwọrọ ikọ ikpọn̄ m̀mê ye asuanetop efen. Okposụkedi ọfọnde ndibere ye ndutịm oro esop ẹnamde ẹban̄a unọ ikọ ntiense otu edieke ekemede, ndinam utom ke ọkpọkpọ efakutom ke mme ini efen ekeme ndin̄wam ke ndinọ ọyọhọ ikọ ntiense, akpan akpan ke mme esop oro ẹnyenede efakutom oro okponde.—Utom 10:42.
2. Nso idi ndusụk ufọn edinyene ọkpọkpọ efakutom?
2 Mme Ufọn: Ndusụk owo ẹsibọ ufọn efen efen ke ndikwọrọ ikọ ke ọkpọkpọ efakutom oro ekperede itieutom ke ini udia uwemeyo m̀mê ke ndondo oro utom asuanade. Ndusụk owo ẹsima ndinam utom nte ubon ke mbọhọ mmọ ke hour kiet m̀mê akande oro mbemiso Ukpepn̄kpọ N̄wed Esop. Utịp edi nte ke mme mfiakn̄ka ye ukpepn̄kpọ Bible mmọ ẹsikpere ufọk, isinyụn̄ iyakke ẹbiat okụk ye ini ẹkaha m̀mê ẹsọp ẹkpa mba. Sia ẹkemede ndinam ediwak n̄kpọ ke esisịt ini, ndinyene ọkpọkpọ efakutom ekeme ndin̄wam ndusụk owo ndinam usiakusụn̄ unọ un̄wam ke ini ke ini m̀mê ndinam utom usiakusụn̄ ofụri ini. Ke adianade do, ndinam utom ke ọkpọkpọ efakutom nnyụn̄ mmehe ye mme enyeneufọk ẹkeme ndin̄wam ke ndinam mmọ ẹnyene mbuọtidem ke idem nnyịn ye ke nnyịn ndikpụhọ nneme nnyịn ekekem ye mme udọn̄ mmọ, anamde utom ukwọrọikọ nnyịn etetịm enyene uforo.
3. Nso ifiọkutom ke asiakusụn̄ kiet oro ọkọbọde ọkpọkpọ efakutom ekenyene?
3 Asiakusụn̄ kiet emi esenyịn circuit ekesịnde udọn̄ ọnọ enye ọbọ ọkpọkpọ efakutom ọdọhọ ete: “Mma nnyịme nsịnudọn̄ emi ndien ibịghike mma nnen̄ede mmehe nnyụn̄ ndi ufan ye mme enyeneufọk ke efakutom mi. Mma nsikpụhọde n̄ka n̄kese mmọ ke mme ini oro ọfọnde ye mmọ. Nte utịp, mfiakn̄ka mi oro ekesidide 35 ke ọfiọn̄ ama ọdọk esịm 80, ndien ukpepn̄kpọ Bible oro nnịmde edi itiaba.”
4. Didie ke afo ekeme ndibọ nnyụn̄ nnam utom ke ọkpọkpọ efakutom?
4 Nte Ẹkpebọde Ọkpọkpọ Efakutom: Edieke afo oyomde ọkpọkpọ efakutom, nam asan̄autom esede aban̄a efakutom ọfiọk. Kûmen̄e ndidọhọ asuanetop efen asan̄a ye afo, nyụn̄ wet mme n̄kpọ nịm ndiwụt mbon oro mîdụhe ke ufọk. Afo ekpenyene ndidomo ndikụre efakutom emi ke ọfiọn̄ inan̄. Edieke ọsọn̄de fi ndinam ntre, emekeme ndidọhọ esenyịn Ukpepn̄kpọ N̄wed Esop mbufo m̀mê mbon en̄wen ẹn̄wam fi. Ke utịt ọfiọn̄ inan̄, afo emekeme ndikpọn̄ efakutom oro ama okokụre nnọ m̀mê ndidọhọ ẹyak imọ ifiak inam utom do. Nte ededi, afo ukpunyeneke ndikama efakutom emi ke nsinsi edi ekpenyene ndikpọn̄ enye nnọ man mbon efen ẹkeme ndibọ enye n̄ko. Edieke afo odude ke esop oro enyenede esisịt efakutom, ndien owo ikemeke ndibọ ọkpọkpọ efakutom, emekeme ndidọhọ esenyịn Ukpepn̄kpọ N̄wed Esop mbufo ọnọ fi ikpehe efakutom kiet.
5. Nso ke ẹyom man ikeme ndinam utom ukwọrọikọ oro ẹkedọn̄de nnyịn?
5 Utom oro ẹkedọn̄de nnyịn ndikwọrọ ikọ “ke ofụri isọn̄” edi akwa utom. (Matt. 24:14) Enye oyom ẹnen̄ede ẹsịn ukeme. Ke adianade ye unọ ikọ ntiense otu, ndikwọrọ ikọ ke ọkpọkpọ efakutom ekeme ndinam nnyịn ida eti mbụk isịm adan̄a ediwak owo nte ikekeme.