“Nnyeneke Udọn̄”
1 Se ediwak owo ẹsidọhọde edi oro ke ini ikade ukwọrọikọ ke ndusụk ebiet. Nso ke nnyịn ikeme ndinam man idem okûmem nnyịn ke ini isobode mbon oro mînyeneke udọn̄ ke efakutom? Didie ke nnyịn ikeme ndidemede udọn̄ mme owo nnọ eti mbụk?
2 Ka Iso Kop Idatesịt: Nditi ntak emi ediwak owo mînyeneke udọn̄ ayan̄wam nnyịn ika iso ikop idatesịt. Mbon oro ẹkebọde ukpepn̄kpọ edito ke unam mforo owo m̀mê mbon oro ẹmanade ẹdikop ke Abasi idụhe, ẹkeme ndikere ke Bible inyeneke ufọn. Mbon en̄wen ẹkeme ndikop idiọkesịt ke ntak mbubịk oro mmọ ẹkụtde ke ido ukpono. Ndusụk owo ẹkeme ndinana udọn̄ ke ntak oro mmọ ẹkụtde edikpu m̀mê ke ntak oro mmọ mînyeneke idotenyịn ke uwem. (Eph. 2:12) Ndusụk owo “ifiọkke” ke utịt ekpere sia editịmede esịt uwem emi anamde esịt mmọ odobi.—Matt. 24:37-39.
3 Inamke n̄kpọ m̀mê ndusụk owo inyịmeke ndikpan̄ utọn̄, nnyịn imekeme ndikop idatesịt ke an̄wautom sia ifiọkde ke utom nnyịn ada ubọn̄ ọsọk Jehovah. (1 Pet. 4:11) Ke adianade do, nnyịn imesisọn̄ọ mbuọtidem nnyịn ke ini inemede akpanikọ Bible ye mbon en̄wen, idem ọkpọkọm mmọ idiọn̄ọke ufọn esie kan̄a. Ẹyak nnyịn idomo ndise mme owo ke efakutom nnyịn nte Jehovah esede mmọ. Enye ama enyene mbọm aban̄a mbon Nineveh oro ‘mîkọdiọn̄ọke ubọk nnasia mmọ ye ufien mmọ.’ (Jonah 4:11) Mbon oro ẹdụn̄de ke efakutom nnyịn ẹyom eti mbụk. Ke ntre, nnyịn ikpenyeneke ndikpa mba, edi ikpenyene ndiyom mme usụn̄ oro ikpedemerede udọn̄ mme owo inọ etop Bible.
4 Neme Se Itịbede ke N̄kann̄kụk: Afo emekeme nditịn̄ se itịbede ke n̄kann̄kụk mbufo ke ntọn̄ọ ukwọrọikọ fo onyụn̄ obụp enyeneufọk se idide ekikere esie. Kpan̄ utọn̄ kop se enye etịn̄de, ekem wụt enye etop ndọn̄esịt oro odude ke Bible. Ke akamba unọmọ ama eketịbe ke ebiet kiet, Ntiense kiet ama ebem iso eseme aban̄a n̄kpọntịbe oro ke kpukpru ufọk emi enye akakade. Enye ọkọdọhọ ete: “Inikiet inikiet, mme owo ẹma ẹtọn̄ọ ndineme nneme. Mma nnyene inem inem nneme ye ediwak owo koro n̄kowụtde udọn̄ ke uwem mmọ.”
5 Obio Ubọn̄ Abasi ọyọkọk kpukpru mfịna ubonowo. Domo ndifiọk se inen̄erede ifịna enyeneufọk. Enye ekeme ndiyak fi eneme etop idotenyịn oro odude ke Bible. Mîdịghe, enye ekeme ndikpan̄ utọn̄ “ini en̄wen.”—Utom 17:32.