‘Tịn̄ Ikọ Abasi ye Unana Edifehe Ndịk’
1 Nte afo emesimen̄e ndusụk ini ndineme se afo enịmde ke akpanikọ ke ufọkn̄wed m̀mê ke itieutom ke ini ifet eberede? Nte esisọn̄ fi ndineme ikọ Abasi ke ido nneme ye iman ye mbọhọidụn̄, mîdịghe ye mbon oro afo mûfiọkke? Nso idin̄wam kpukpru nnyịn ndida nti ifet oro inyenede ‘ntịn̄ ikọ Abasi ye unana edifehe ndịk’?—Phil. 1:14.
2 Kûtre Nditịn̄ Ikọ: Nte afo ekpemen̄e nditịn̄ ikọ nnyan̄a akpan ufan m̀mê iman oro ẹkesude nsu ẹdian? Ke ofụri mbụk ubonowo, ẹmetịn̄ ediwak ikọ ẹdian Jehovah, kpa ata akpan Ufan nnyịn. Nnyịn imenyene san̄asan̄a ifet ndinọ ikọ ntiense mban̄a akwa Abasi nnyịn! (Isa. 43:10-12) Edieke inen̄erede ima Jehovah, nnyịn idiyakke bụt m̀mê ndịk anam nnyịn itre ndida ifet ekededi ntịn̄ ikọ Abasi uko uko.—Utom 4:26, 29, 31.
3 Ti ke etop nnyịn edi eti mbụk. Mbon oro ẹdade etop emi ẹsịn ke edinam ẹyebọ nsinsi ufọn. Ndiwụk ntịn̄enyịn ke ufọn utom ukwọrọikọ utu ke ndiwụk ke idem nnyịn m̀mê ke mme andibiọn̄ọ nnyịn ayan̄wam nnyịn ndikwọrọ ikọ uko uko.
4 Uwụtn̄kpọ Mbon En̄wen: Nti uwụtn̄kpọ mbon en̄wen oro ẹketịn̄de ikọ Abasi ye unana edifehe ndịk ẹkeme ndisọn̄ọ nnyịn idem. Ke uwụtn̄kpọ, Enoch ama atan̄a ubiereikpe Jehovah uko uko ọnọ mme anamidiọk oro mîketen̄eke Abasi. (Jude 14, 15) Noah ama aka iso ọkwọrọ ikọ ọnọ mbon oro mîkenyeneke udọn̄. (Matt. 24:37-39) Mme Christian akpa isua ikie oro ‘mîkọfiọkke n̄wed’ ẹkenyụn̄ ẹdide “mme usụhọde owo” ẹma ẹka iso ẹkwọrọ ikọ kpa ye ọkpọsọn̄ ukọbọ. (Utom 4:13, 18-20) Ẹsiwet mbụkuwem eyomfịn ke Enyọn̄-Ukpeme ye Awake! ẹban̄a mbon oro ẹken̄wanade ẹbiọn̄ọ edifehe owo enyịn, ẹkenyụn̄ ẹkabarede ẹdi ifịk ifịk mme ọkwọrọ eti mbụk ebe ke ndibuọt idem ke Jehovah.
5 Nnyịn imekeme ndinyene uko ebe ke nditiene uwụtn̄kpọ mme anam-akpanikọ asan̄autom Jehovah eke eset oro ẹkesobode n̄kpọsọn̄ idaha. (1 Ndi. 19:2, 3; Mark 14:66-71) Mmọ ẹma ẹda “uko ke Abasi nnyịn” ẹtịn̄ ikọ ye unana edifehe ndịk. Nnyịn imekeme ndinam ntre n̄ko.—1 Thess. 2:2.