Nnyịn Imama Ndisịn Idem Nnam N̄kpọ Jehovah!
1 Apostle Paul ama enyịme ‘ndiyak idemesie ofụri ofụri’ nsịn ke utom Christian. (2 Cor. 12:15) Kpasụk ntre mfịn, ediwak mme Christian ke ẹsịn idem ẹnam utom usiakusụn̄. Mbon oro ẹnyenede ikpọ mbiomo ke ubon ẹsidiomi ini mmọ man ẹtiene ẹbuana ke utom ukwọrọikọ kpukpru urua. Ndusụk mbon oro idem mîsọn̄ke ẹsisịn ekpri ukeme oro mmọ ẹnyenede ke utom Obio Ubọn̄. Esinem didie ntem ndikụt nte ikọt Jehovah ẹsịnde idem ẹnam n̄kpọ esie, inamke n̄kpọ m̀mê nso idi isua emana m̀mê idaha mmọ!
2 Ndima Mbọhọidụn̄: Esịt idibiomke nnyịn edieke idade ofụri ukeme nnyịn inam n̄kpọ Jehovah ke ntak oro imade enye ye mbọhọidụn̄ nnyịn. Sia Paul akayakde idemesie ofụri ofụri esịn ke ndikwọrọ eti mbụk, enye ama ekeme nditịn̄ ye ọyọhọ inemesịt ete: “N̄kot mbufo ẹdidi ntiense mfịn emi nte ke mmasana ke iyịp kpukpru owo.” (Utom 20:24, 26; 1 Thess. 2:8) Ndisịn ofụri ukeme nnyịn ke utom ukwọrọikọ ayanam ibọhọ ubiomikpe iyịp.—Ezek. 3:18-21.
3 Ndisịn idem nnam n̄kpọ nnọ mbon en̄wen esinam nnyịn ikop inemesịt. (Utom 20:35) Eyenete kiet ọkọdọhọ ete: “Ke akpanikọ, idem esimem mi ke mbubịteyo ke ini nnyọn̄de ufọk ke mma n̄kokụre utom Jehovah. Edi mmesikọm Jehovah ke ndinam mi n̄kop idatesịt oro owo ndomokiet mîkemeke ndimen mfep.”
4 Ndima Abasi: Akakan ntak oro anamde inen̄ede isịn idem inam n̄kpọ Jehovah edi koro emi esinemde Ete nnyịn eke heaven esịt. Ima oro imade Abasi anam nnyịn inịm mbet esie, emi esịnede edikwọrọ ikọ ye edinam mbet. (1 John 5:3) Idem ke ini mme owo mînyeneke udọn̄ m̀mê ẹbiọn̄ọde nnyịn, nnyịn imesinem esịt ndika iso nsịn idem ke utom Jehovah.
5 Idịghe ini nditek ke ifịk edi emi! Nnyịn idu uwem ke ini idọk. (Matt. 9:37) Ọtọin̄wan̄ esinen̄ede esịn idem anam utom ke ini idọk koro ana enye ọsọsọp ọdọk mme n̄kpọ oro enye ọkọtọde mbak ẹdibiara. Ini oro osụhọde ndida ndọk idọk eke spirit iniọn̄ke. Sia idiọn̄ọde ini oro nnyịn idude, ẹyak kpukpru nnyịn ika iso ndinen̄ede nsịn idem ke utom ukwọrọikọ.—Luke 13:24; 1 Cor. 7:29-31.