Nnyịn Imama Mme Ifet Oro Nnyịn Inyenede!
1 Tọn̄ọ nte ẹkebot owo, Jehovah ọmọnọ ikọt esie nsio nsio ifet. Enye ọnọ mmọ ifet emi inamke n̄kpọ m̀mê mmọ ẹdi iren m̀mê iban, m̀mê nso idi isua emana mmọ, m̀mê nso inyụn̄ idi idaha mmọ ke uwem. (Luke 1:41, 42; Utom 7:46; Phil. 1:29) Nso idi mme ifet oro enye ọnọde nnyịn mfịn?
2 Ndusụk Ifet Oro Nnyịn Inyenede: Nnyịn imenyene ifet ndidi se Jehovah ọnọde ukpep. (Matt. 13:11, 15) Ifet efen oro nnyịn inyenede edi nditoro Jehovah ebe ke ndibọrọ mme mbụme ke mme mbono esop. (Ps. 35:18) Nnyịn imesibọrọ mbụme ye ọyọhọ idatesịt ke ini inyenede ifet ndinam ntre. Kpasụk ntre, edieke nnyịn idade utom oro ẹnọde nnyịn ke esop nte n̄kpọ ukpono, nnyịn iyada ofụri ukeme nnyịn inam enye. Nte nnyịn imesibuana kpukpru ini ke ifet edinịm Ufọkmbono Obio Ubọn̄ asana inyụn̄ itịm enye ikama?
3 Okposụkedi ediwak miliọn owo ẹyịkde m̀mê Abasi esikop akam mmimọ, nnyịn imenyene ifet edidi se ata akpan Owo ke ekondo okopde akam nnyịn. (N̄ke 15:29) Jehovah ke idemesie esikpan̄ utọn̄ ọnọ akam mme asan̄autom esie. (1 Pet. 3:12) Enye inịmke udomo ke adan̄a ibat ini oro nnyịn ikemede ndibọn̄ akam nnọ enye. Nso ọsọn̄urua ifet ke nnyịn inyene ntem ndikeme ndibọn̄ akam “kpukpru ini”!—Eph. 6:18.
4 “Nsan̄autom Abasi”: Kiet ke otu ata eti ifet oro nnyịn inyenede edi editan̄a eti mbụk Obio Ubọn̄ Abasi nte “nsan̄autom Abasi.” (1 Cor. 3:9) Enye edi utom oro ọnọde uyụhọ onyụn̄ anamde ikop inem uwem. (John 4:34) Ibiomoke Jehovah ndida owo nnam utom emi, edi enye ọnọ nnyịn utom emi ke ntak ima oro enye amade nnyịn. (Luke 19:39, 40) Nte ededi, Jehovah inọhọ owo ekededi ifet emi. Ana mbon oro ẹbuanade ke an̄wan̄wa utom ukwọrọikọ ẹsịm mme n̄kpọ oro ẹnamde mmọ ẹdot ke n̄kan̄ eke spirit ẹnyụn̄ ẹka iso ẹdu uwem ekekem ye mme n̄kpọ oro. (Isa. 52:11) Nte nnyịn imowụt ke imada ifet emi ke akpan n̄kpọ ebe ke ndinam utom ukwọrọikọ edi akpan ubak edinam nnyịn eke urua ke urua?
5 Mme ifet oro Jehovah ọnọde anam uwem nnyịn enyene uduak. (N̄ke 10:22) Kûdedei uda mmọ ke usụhọde! Edieke iwụtde ke imenen̄ede ima ifet oro nnyịn inyenede, nnyịn iyenem Ete nnyịn eke heaven esịt, kpa Andinọ “kpukpru nti enọ ye kpukpru enọ eke ẹfọnde ẹma.”—Jas. 1:17.