Obufa Ndutịm Mbono Circuit

Odot ẹnọ Jehovah ubọn̄. Didie ke nnyịn inọ Jehovah ubọn̄? Nso idi mme n̄kpọ-ata oro ndusụk owo ẹsobode ke afan̄ emi? Didie ke ẹdiọn̄ mbon oro ẹnọde Abasi ubọn̄ idahaemi? Ndutịm mbono circuit eke isua utom 2008 ọyọbọrọ mme mbụme emi ke usụn̄ oro ọnọde uyụhọ. Ibuotikọ edi, “Ẹnam Kpukpru N̄kpọ Ẹnọ Abasi Ubọn̄.” (1 Cor. 10:31) Kere ban̄a se inade ibet nnyịn ke usen iba oro ẹdinọde nnyịn akpakịp item N̄wed Abasi.

Esenyịn district eyeneme mme ibuotikọ emi “Ntak Oro Ẹkpenọde Abasi Ubọn̄-ọ?” ye “Nịm Eti Uwụtn̄kpọ ke Ndinam Mme N̄kpọ Oro Abasi Oyomde.” Enye ọyọnọ utịn̄ikọ an̄wa emi, “Mmanie Ẹnọ Abasi Ubọn̄?,” onyụn̄ ọnọ akpatre utịn̄ikọ, “Ndidiana Kiet Nnọ Abasi Ubọn̄ ke Ofụri Ererimbot.” Enye n̄ko eyenịm Ufọkn̄wed Utom Ukara Abasi. Esenyịn circuit eyeneme mme ibuotikọ emi, “Dat Esịt ke Ndiwụt Ubọn̄ Abasi,” “Ndinọ Ntịn̄enyịn ke Mme Udọn̄ Circuit,” ye “Ka Iso ‘Sọn̄ọ Da ke Akpanikọ,’” emi ọkọn̄ọde ke 2 Peter 1:12. Adianade do, nnyịn iyekpep nte “Utom Usiakusụn̄ [Ọnọde] Abasi Ubọn̄.” Akpa ke otu utịn̄ikọ eke ikpehe ke ikpehe, oro anamde owo ekere n̄kpọ edidi “Ndinọ Abasi Ubọn̄ ke Kpukpru Ikpehe Uwem Nnyịn,” ndien enye oyodụn̄ọde se mme ikọ eke odudu spirit oro ẹkụtde ke 1 Corinth 10:31 ẹnen̄erede ẹwọrọ. Utịn̄ikọ Ikpehe Inan̄ emi, “Ndinam Edisana Utom Nnọ Jehovah Ubọn̄” eyeneme nsio nsio ikpehe utuakibuot nnyịn. Ẹyenọ utịn̄ikọ Enyọn̄-Ukpeme ẹnyụn̄ ẹneme itie N̄wed Abasi eke usen ke usen ke Sunday. Ẹyenịm mme owo baptism n̄ko.

Ata ediwak owo inyịmeke ke Abasi odu. Mme uduak oro mme owo ẹduakde ẹnen̄ede ẹwọn̄ọde ediwak owo ntịn̄enyịn tutu mmọ ikereke iban̄a akwa ubọn̄ Jehovah. (John 5:44) Edi nnyịn imọfiọk ufọn edida ini n̄kere nte ‘ikpanamde kpukpru n̄kpọ inọ Abasi ubọn̄.’ Nam ndutịm ndidụk nnyụn̄ mbọ ọyọhọ ufọn nto kpukpru ikpehe edinam inan̄ emi.