Nnyịn Imesibuana Idotenyịn Obio Ubọn̄ Nnyịn ye Mbon En̄wen
1 Ke ndiọkeyo eke mme akpatre usen emi, ediwak owo ke ererimbot inyeneke idotenyịn. (Eph. 2:12) Ke ntak unana eti ibuot, mbon en̄wen ẹkọn̄ mbuọtidem mmọ ke inyene obụkidem, mme andikara, ifiọk ntaifiọk eyomfịn, ye ntre ntre eken. Nnyịn ikop inemesịt didie ntem ndinyene ata idotenyịn kaban̄a ini iso, kpa idotenyịn emi edide “ukwak ubom ukpọn̄ nnyịn, emi mîdikpụhu onyụn̄ ọsọn̄ọde ada”!—Heb. 6:19.
2 Ke ukara Obio Ubọn̄ Abasi, ẹyenam isọn̄ akabade edi paradise. Ẹyenam mme iman ye mme ufan nnyịn oro ẹma ẹkekpan̄a ẹset. (Utom 24:15) Unana, ukwan̄ikpe, udọn̄ọ, usọn̄, ye n̄kpa ididụhe aba. (Ps. 9:18; Matt. 12:20, 21; Edi. 21:3, 4) Mmọ emi ẹdi ndusụk ke otu mme un̄wọn̄ọ Jehovah emi ẹdisude ke mîbịghike. Un̄wọn̄ọ ewe ke afo enen̄ede odori enyịn ndikụt osude?
3 Tan̄a Eti Mbụk: Ana nnyịn ibuana idotenyịn Obio Ubọn̄ ye mbon en̄wen. Ima oro imade Abasi ye mbọhọidụn̄ nnyịn esinam nnyịn ikpebe Jesus inyụn̄ ‘itan̄a eti mbụk inọ mme ubuene, ikwọrọ ubọhọ-ufụn inọ mbuotekọn̄ inyụn̄ ikwọrọ edifiak n̄kụt usụn̄ inọ mme nnan, inyụn̄ inọ mmọ emi ẹfịkde ẹnyọn̄ọ ke ifụre.’ (Luke 4:18) Apostle Paul ama atan̄a eti mbụk ke an̄waurua ye ke ebiet ekededi oro enye okokụtde mme owo. Enye ama esịn idem ọkpọsọn̄ ọkpọsọn̄ ke utom ukwọrọikọ. (Utom 18:5) Ndibuana ifịk ifịk ke an̄wautom ukem nte Paul idiyakke “editịmede esịt eke editịm n̄kpọ emi ye abian̄a abian̄a odudu inyene” anam nnyịn itre nditịm nnyene idotenyịn nte mme Christian.—Mark 4:19.
4 Nnyịn isisụk inyenyene idotenyịn Obio Ubọn̄ ke ini isobode mbon oro mînyeneke udọn̄, emi mîdaha etop Obio Ubọn̄ ke n̄kpọ, m̀mê ẹbiọn̄ọde nnyịn ke eferife. Nnyịn ‘isọn̄ọ itan̄a idotenyịn nnyịn an̄wan̄wa, inyụn̄ iyokke.’ (Heb. 10:23) ‘Bụt inamke nnyịn iban̄a eti mbụk.’ (Rome 1:16) Ekeme ndidi mbuọtidem ye ifịk oro inyenede oyonụk ndusụk owo ndikpan̄ utọn̄ ke akpatre.
5 Okposụkedi odotde nnyịn ndidụri ntịn̄enyịn n̄wụt mme idaha ererimbot oro ẹkade-ka iso ndidiọk, oro ẹsude mme ntịn̄nnịm ikọ Bible, nnyịn idịghe mme ọkwọrọ ubiomikpe. Utu ke oro, utom ukwọrọikọ nnyịn owụk ntịn̄enyịn ke idotenyịn Obio Ubọn̄ nnyịn, oro edi, eti mbụk Obio Ubọn̄ Abasi. Nnyịn ikpakam ida mbuọtidem ye ifịk ikwọrọ eti mbụk emi ‘man ikpenyene ọyọhọ nsọn̄ọ iban̄a idotenyịn tutu esịm utịt.’—Heb. 6:11.