Mbono District Mme Ntiense Jehovah eke Isua 2008
1. (a) Ntak emi item oro Paul ọkọnọde mme Christian emi ẹdide mme Hebrew enen̄erede ebehe nnyịn mfịn-e? (Kot Mme Hebrew 10:24, 25.) (b) Nso ifet ediberede ọnọ nnyịn ndinam item Paul?
1 Apostle Paul ama esịn udọn̄ ọnọ mme Christian emi ẹdide mme Hebrew ete ẹsisop idem ọtọkiet ẹnyụn̄ “ẹdọdiọn̄” ẹsịn udọn̄ ẹnọ kiet eken adan̄a nte mmọ ẹkụtde ẹte ke usen oro ke asan̄a ekpere. (Heb. 10:24, 25) Imokụt ediwak n̄kpọ emi ẹwụtde ke “usen oro” Paul eketịn̄de aban̄a enen̄ede asan̄a ekpere! Ke ntem, enen̄ede ọdọn̄ nnyịn ndisobo ye nditọete nnyịn man ibọ ukpep eke spirit, ndien emi ekeme ndikpeme nnyịn ke “mme akpatre usen” emi akade-ka iso ọdiọk mi. (2 Tim. 3:1) Nnyịn iyenyene utọ ifet emi ke mbono district eke 2008 emi osụk edide mi.
2. (a) Ntak emi edide akpan n̄kpọ ndidụk usen mbita ke mbono emi-e? (b) Didie ke nnyịn ikeme nditọn̄ọ ndiben̄e idem?
2 Dụk Usen Mbita: Nnyịn isịn udọn̄ inọ fi ndidụk usen mbita ke mbono emi. Edieke nnyịn ‘isopde idem ọtọkiet,’ nnyịn iditabake nti udia eke spirit oro ẹdinọde ke mbono emi. (Heb. 10:25) Tọn̄ọ ndiben̄e idem usọp usọp nte ekekeme. Afo ekpenyene ndibabak nsian eteutom fo man enye ekpekeme ndinam ndutịm oro oyomde ẹnam man afo ekpekeme ndidụk mbono. Edieke nditọ fo ẹdidude ke ufọkn̄wed ke ini mbono mbufo, sian mme andikpep mmọ ban̄a ndutịm mbono fo. Nam mmọ ẹdiọn̄ọ ke ndika mbono edi kiet ke otu akpan n̄kpọ oro esinamde ke ido ukpono fo. Jehovah iditreke ndidiọn̄ ukeme oro afo esịnde ndinịm mme n̄kpọ Obio Ubọn̄ akpa.—Matt. 6:33.
3. Tịn̄ mme usụn̄ oro ikemede ndikere mban̄a mbon en̄wen.
3 N̄wam Mbon En̄wen Ẹtiene Ẹdụk: Paul ama esịn udọn̄ ọnọ nditọete esie n̄ko ete ‘ẹkere ẹban̄a kiet eken.’ (Heb. 10:24) Nte odu nditọete ke Ukpepn̄kpọ N̄wed Esop mbufo emi ẹdiyomde un̄wam man ẹdụk mbono emi? Nte emekeme ndin̄wam nditọ ukpepn̄kpọ Bible fo ẹtiene fi ẹdụk mbono emi, idem ọkpọkọm usen kiet kpọt ke mmọ ẹdikeme ndidụk? Ke ini asiande mbonubon fo emi mînịmke ke akpanikọ aban̄a ndutịm fo, kot mmọ n̄ko ẹtiene fi ẹdi. Ukeme oro afo esịnde ekeme ndida edidiọn̄ oro mûkodorike enyịn edi.
4. Didie ke nnyịn ikeme ndifiọk usenọfiọn̄ ye ebiet emi ẹdinịmde mme mbono district?
4 Ndibụp N̄kpọ Mban̄a Mbono: Kpukpru isua, ediwak owo ẹsikot n̄kọk itieutom ke urụk ukopikọ ẹbụp ẹban̄a ini ye mme ebiet emi ẹdinịmde mbono. Nditọete nnyịn emi ẹma ẹkebọbọ ntọt emi ẹsiwak ndibụp mbụme emi. Ntre, mbemiso okotde n̄kọk itieutom, nnyịn inọ ekikere ite ebem iso ese page 5 ye 6 ke nsiondi Utom Obio Ubọn̄ Nnyịn emi.
5. Nso ke ikpanam edieke iyomde ntọt iban̄a ufọkidụn̄ ke mbono emi mîdịghe enye oro ẹdemede esop nnyịn ẹsịn?
5 Edieke oyomde ndidụk mbono emi mîdịghe enye oro ẹdemede esop mbufo ẹsịn, emekeme ndibọ ntọt aban̄ade ufọkidụn̄ ebe ke ndida adres oro ẹwetde ke edem obufa Room Request Form n̄wet kọmiti esede aban̄a ufọkidụn̄ ke obio mbono oro afo oyomde ndika. Ẹnọ babru emi ẹsọk mme ewetn̄wed esop. Kụt ete ke emesịn efọkn̄wed emi ewetde enyịn̄ ye nnennen addres fo onyụn̄ adian stamp man ẹkpenọ ibọrọ ẹsọk fi.
6. Nso idi ndusụk n̄kpọ oro ẹtide nnyịn ẹban̄a Room Request Form?
6 San̄asan̄a Un̄wam: Edieke asuanetop oyomde ẹn̄wam imọ ẹbọ ufọkidụn̄, Kọmiti Utom Esop enyene ndibiere m̀mê enye odot ndiwet n̄kpọ nyọhọ ikpehe “Special Needs” ke Room Request Form. Mbemiso ewetn̄wed esop ọnọde babru emi ẹsọk Itieutom Unọ Ufọkidụn̄ Mbono, ẹnyene ndidụn̄ọde ndausụn̄ oro ẹnọde ke babru emi.
7. Didie ke nnyịn ikeme ndibere ye ndutịm oro ẹnamde ẹban̄a ufọkidụn̄? (Se ekebe oro “Nte Ẹkpebọde Ufọkidụn̄.”)
7 Ufọkidụn̄: Man efere mbufo ke idem, ẹyenam ndutịm ndinọ ufọkidụn̄ ke mme obio mbono kiet kiet. Ufọk esidu ke ndusụk itiembono, edide ufọk ibio ini m̀mê dọmitri oro ẹbọpde man mme owo ẹsidụn̄. Mbọk ẹti ẹte ke esop Abasi idikemeke ndibọp ufọkidụn̄ nnọ kpukpru mme andidụk mbono. Mbon oro Itieutom Unọ Ufọkidụn̄ ọnọde unyịme kpọt ẹdidụn̄ ke ufọkidụn̄ emi. Edieke ẹnọde fi ufọkidụn̄ ke ebiet efen, afo ekpenyene ndibere ye Itieutom Unọ Ufọkidụn̄ onyụn̄ odu ke ufọkidụn̄ fo. Ti ke ekeme ndiyom ekpekpe usụn̄ aka itiembono kpukpru usen. Oyom n̄ko ẹtịp etịbe kaban̄a utom ofụri ererimbot. Edieke odụn̄de ke dọmitri ke an̄wa mbono, oyoyom ọnọ etịbe ke ndidu ke dọmitri oro. Ntem, oyom esịn emi ke ndutịm fo ke ini afamde okụk enịm ọnọ mbono. (1 Cor. 16:1-4; 2 Cor. 9:7) Mbemiso ewetde n̄kpọ ọyọhọ Room Request Form, dụn̄ọde mme akpan n̄kpọ oro ẹdude ke ekebe oro “Nte Ẹkpebọde Ufọkidụn̄.”
8. (a) Ke mme usụn̄ ewe ke ikeme ndinọ Jehovah ubọn̄ ke ini idụkde mbono nnyịn? (b) Ke ntak nti edu uwem nditọete nnyịn, nso ke mme anamutom ufọkisen ẹketịn̄?
8 Nti Utom: Ndisop idem ọtọkiet nte Jehovah etemede nnyịn esidoro nnyịn “udori.” Ata akpan n̄kpọ edi nte ke emi esinọ nnyịn mme ifet ndinọ enyịn̄ Jehovah ubọn̄. (Isa. 48:17) “Nti utom” nnyịn ‘ẹyarade an̄wan̄wa’ ẹwụt ediwak owo ke ini mbono district, ndien ndusụk mmọ ẹtịn̄ se mmọ ẹkekụtde. (1 Tim. 5:25) Ke obio kiet emi ẹsinịmde mbono nnyịn ke ediwak isua, andise n̄kpọ mban̄a ufọkisen kiet ọkọdọhọ ete: “Ediwak owo ke obio emi ke ẹtịn̄ n̄kpọ ẹban̄a Mme Ntiense Jehovah ye se mbono mbufo anamde ọnọ nnyịn. Imọfiọk nte mbio mbufo ẹsinamde an̄wambre asana, imonyụn̄ ikụt nte mbufo ẹnamde itie unịm ubomisọn̄ asana. Imenen̄ede ikop inemesịt mbio mbufo ndidu ye nnyịn ke ndaeyo emi. Imenịm ke mbufo ẹyesụk ẹka iso ndidi mi.” Ke andise n̄kpọ mban̄a ufọkisen efen ama eketịn̄ aban̄a mfịna oro mmọ ẹsinyenede ye mbon mbre ye mme otu eken, enye ama etịn̄ aban̄a edu edidianakiet ye ime oro nditọete nnyịn ẹkenyenede ke ini mmọ ẹkedude ke ufọkisen mmọ. Enye ọkọdọhọ ete: “Ubaha nte kpukpru isenowo nnyịn ẹkpetiede nte Mme Ntiense Jehovah!” Anaedi nti edu uwem nditọete nnyịn emi akanamde ẹtịn̄ mme ikọ emi ye mme utọ ikọ eke etiede ntem anam esịt adat Jehovah Abasi. Ke ebiet ekededi emi ẹdụn̄de, edide ke ufọkisen, ke ufọk owo, m̀mê ke dọmitri, mbọk ẹdu eti uwem ẹnyụn̄ ẹnịm n̄kann̄kụk oro asana.
9. Didie ke Matthew 4:4 owụt ufọn edinọ ọyọhọ n̄kpan̄utọn̄ ke ikpehe kiet kiet ke ndutịm mbono?
9 Jesus ọkọdọhọ ke nnyịn idida “kpukpru ikọ eke ẹwọrọde Jehovah ke inua” idu uwem. (Matt. 4:4) Jehovah esida “ofụn emi anamde akpanikọ onyụn̄ enyenede ọniọn̄” ọnọ “udia” eke spirit “ke edikem ini” ke mbono nnyịn eke isua ke isua. (Matt. 24:45) Ẹnam ekese man ẹnọ ọkpọmiọk udia eke spirit emi. Ẹyak nnyịn iwụt esịtekọm inọ Jehovah ke ndidụk nnyụn̄ nnọ ọyọhọ n̄kpan̄utọn̄ ke ikpehe kiet kiet ke ndutịm emi.
[Ekebe ke page 3]
Mme Ini Edinam:
Friday ye Saturday
9:20 usenubọk - 4:55 mbubịteyo
Sunday
9:20 usenubọk - 4:00 mbubịteyo
[Ekebe ke page 4]
Nte Ẹkpebọde Ufọkidụn̄:
1. Bọ ewetn̄wed esop mbufo Room Request Form.
2. Babak wet n̄kpọ yọhọ Room Request Form emi. Mbọk kụt ete ke ọmọnọ ọyọhọ ntọt aban̄a enyịn̄, isua emana, onyụn̄ owụt m̀mê owo oro oyomde itieidụn̄ edi eren m̀mê n̄wan, asiakusụn̄ m̀mê asuanetop. Ẹnyene ndiwet n̄kpọ ke mme Room Request Form ediye ediye ye nte ẹkemede ndikot.
3. Ewetn̄wed esop ekpenyene ndise nnyụn̄ nsịn ubọk ke Room Request Form onyụn̄ ọnọ enye aka itiembono, IDỊGHE N̄KỌK ITIEUTOM. Ntak edi nte ke ubiatini ekeme ndidu edieke ẹnọde babru emi aka n̄kọk itieutom mbemiso esịmde Itieutom Unọ Ufọkidụn̄.
4. Ẹkpenyene ndibabak nnọ mme Room Request Form ẹsọk Itieutom Unọ Ufọkidụn̄. Emi ọyọnọ Itieutom Unọ Ufọkidụn̄ ini oro ekemde ndiyom eti itieidụn̄ nnọ fi.
5. Itieutom Unọ Ufọkidụn̄ ayanam ọfiọk itie emi afo edidụn̄de mbemiso mbono ọtọn̄ọde, ndien ẹkeme ndidọhọ fi ebem iso ekpe okụk man enyene itieidụn̄ oro.
Mbọk
◼ Ẹnyịme ndibọ itieidụn̄ oro Itieutom Unọ Ufọkidụn̄ ọnọde. Ẹkûdụn̄ ke mme ufọkidụn̄ an̄wa mbono edieke Itieutom Unọ Ufọkidụn̄ mîdọhọke mbufo ẹdụn̄ do. Ẹkûyak ibat owo oro ẹdụn̄de do awak akan se ẹkenyịmede.
◼ Ẹkûdụk mme itie oro ẹdọhọde mme owo ẹkûdụk ke itieidụn̄ oro mbufo ẹdude. Ẹtem udia n̄kukụre edieke ẹnyịmede ẹnam oro ye ke itie oro ẹdọhọde ẹtem.
◼ Kûnọ enyene-ebiet okụk awak akan se Itieutom Unọ Ufọkidụn̄ ọkọnọde man afo enyene itieidụn̄.
◼ Ke anamde ọkpọkpọ ndutịm man enyene itieidụn̄, mbọk bụp Itieutom Unọ Ufọkidụn̄ mbak afo udubọ ukem ufọkidụn̄ oro owo efen ọkọbọde.