N̄kponn̄kan Ndutịm Utom Ukwọrọikọ Oro Akanam Ẹnamde ke Ererimbot!
Ke se ikande isua 100 idahaemi, ẹmetịm Mme Ntiense Jehovah nditan̄a eti mbụk. (1 Cor. 9:23) Etop oro nnyịn itan̄ade mi ke ata ediwak usem edi n̄kponn̄kan utom ukwọrọikọ oro akanam ẹnamde ke ererimbot. Nnyịn itan̄a enye ke se ikande idụt 230. (Matt. 24:14) Edi ntak oro utom emi edide akpan n̄kpọ? Ndien didie ke ẹnam enye ke ofụri ererimbot?
Ọyọhọ ntọt emi vidio oro Jehovah’s Witnesses—Organized to Share the Good News ọnọde aban̄a ediwak ikpehe utom oro nnyịn inamde ke ofụri ererimbot ọbọrọ mme mbụme emi. Nte afo esede vidio emi, kere ban̄a mme mbụme emi: (1) Didie ke ẹtịm ẹnyụn̄ ẹnọ ndausụn̄ ke utom nnyịn? (2) Didie ke Itieutom Uwetn̄wed, Itieutom Esede Aban̄a Ukabade N̄wed, Itieutom Esede Aban̄a Ndise, ye Itieutom Esede Aban̄a Ọkpọ Umụmikọ ye Vidio ẹn̄wam ke ndisuan eti mbụk? (3) Nso idi uduak ekese n̄wed oro imịn̄de inyụn̄ inọde ọwọrọ? (John 17:3) (4) N̄wed ifan̄ ke ẹsimịn̄ ke isua kiet? (5) Nso ufọn ke mme n̄wed nnyịn oro ẹkọn̄ọde ke Bible ẹnam? (Heb. 4:12) (6) Nso ke ẹnam man ẹnọ mbon oro mîkemeke ndikop m̀mê ndikụt n̄kpọ ọfọn un̄wam ke n̄kan̄ eke spirit? (7) Ẹda okụk ke m̀mọ̀n̄ ẹse ẹban̄a utom emi? (8) Didie ke nnyịn ibọ ufọn ito utom oro Itieutom Utịm Ntọt Ufọkibọk, Itieutom Utịmutom, ye Itieutom Utịm Mbono ẹnamde? (9) Nte kiet ke otu Mme Ntiense Jehovah, didie ke vidio emi etịp esịn ke esịtekọm oro afo enyenede aban̄a (a) ukeme oro esop Jehovah esịnde man ẹkwọrọ eti mbụk? (b) ubon Bethel oro awakde ebe 100 ke ofụri ererimbot? (c) ukpep oro ẹnọde mme esenyịn ye mme isụn̄utom? (d) ufọn oro odude ke ndikot itie N̄wed Abasi kpukpru usen mbemiso inamde n̄kpọ ekededi ye ke nditịm idem kpukpru urua nnọ mme mbono esop? (e) mme ufọn oro ẹdude ke ndidụk mme mboho Christian nnyịn? (f) se Paradise isọn̄ ediwọrọde? (Isa. 11:9) (g) nditiene mbuana ọkpọkpọ ke utom idọk oro osụk akade iso?—John 4:35.
Nso nti ikọ ke mme iman, mme ọdiọn̄ọ, mbon oro esifiakde ekese, ye nditọ ukpepn̄kpọ Bible fo ẹketịn̄ ke ẹma ẹkese vidio emi? Ntak mûsọpke unam owo efen etiene ese vidio emi unyụn̄ ubuana eti mbụk ye enye?—Matt. 28:19, 20.