Nọ Mmọ eke Esịt Mmọ Obụn̄ọde Ndọn̄esịt
1 Idụhe ini ndomokiet ke mbụk ubonowo oro akanam mme owo ẹyomde ndọn̄esịt nte ẹyomde idahaemi. Ke nditiene uwụtn̄kpọ Edidem nnyịn Jesus Christ, nnyịn n̄ko ke ‘ibọp mmọ eke esịt mmọ obụn̄ọde.’—Isa. 61:1.
2 Usụn̄ Oro Ikpọnọde Ndọn̄esịt: Man idọn̄ mme owo esịt, ikpenyene ndinam ukwọrọikọ nnyịn ada ukem ukem onyụn̄ ọnọ nsịnudọn̄. Edieke nnyịn mîtịn̄ke n̄kpọ ikaha iban̄a ndiọi ido oro ẹyọhọde ererimbot ye mme nsunsu ukpepn̄kpọ, nnyịn iyekeme ndiwụk ntịn̄enyịn ke akpanikọ emi ẹdude ke N̄wed Abasi ye nyayama idotenyịn oro mme un̄wọn̄ọ Abasi emi ẹkamade ndọn̄esịt ẹnọde. Emi iwọrọke ke owo ikpetịn̄ke n̄kpọ iban̄a Armageddon. Se ẹdọn̄de nnyịn inam edi ‘ndikwọrọ isua mfọnido Jehovah, ye usen usiene Abasi nnyịn,’ ndinyụn̄ ‘nnọ idiọkowo item, ite enye ọkpọn̄ idiọk usụn̄ esie.’ Edi, ikpanaha iyak ntọt oro inọde mme owo iban̄a Armageddon ye nte nsobo esie editiede ẹda itie eti mbụk obio ubọn̄ Abasi.—Isa. 61:2; Ezek. 3:18; Matt. 24:14.
3 To ke Enyịnusụn̄ Sịm Enyịnusụn̄: Edi ọsọ n̄kpọ ndikụt mbon oro esịt mmọ obụn̄ọde ke ntak udọn̄ọ, n̄kpa owo oro mmọ ẹmade, ukwan̄ikpe, m̀mê nsọn̄ọn̄kpọ. Nte mme andikpebe Christ, nnyịn imesiwụt esịtmbọm inyụn̄ itua mme owo oro isobode ke an̄wautom “mbọm.” (Luke 7:13; Rome 12:15) Okposụkedi nnyịn idikotde itie N̄wed Abasi kiet m̀mê iba oro ẹtịn̄de n̄kpọ ẹban̄a mfịna esie, ana nnyịn ‘isọp ndikop ikọ,’ ntem iyakde owo oro etịn̄ se enye ekerede. (Jas. 1:19) Ima ibem iso ikpan̄ utọn̄ inọ enye, nnyịn iyenen̄ede ifiọk ndidọn̄ enye esịt.
4 Nte nneme oro osụk akade iso, nnyịn imekeme ndiyom ini oro ọfọnde idọhọ ite, “N̄kpama ndibuana ndusụk ikọ ndọn̄esịt oro odude ke Bible ye afo.” Ana inam n̄kpọ ye mbufiọk mbak nnyịn idifan̄a kpukpru se enye etịn̄de oro mînenke. Utu ke oro, nnyịn ikpowụk ntịn̄enyịn ke ndinọ nsịnudọn̄ ye ndọn̄esịt ebe ke ndida N̄wed Abasi ndọn̄ enye esịt. Man anam emi, emekeme ndikot ibuotikọ oro “Encouragement” ke page 117-121 ke Reasoning From the Scriptures. Mîdịghe, emekeme ndinọ enyeneufọk tract oro Ndọn̄esịt Ẹnọde Mbon Mfụhọ onyụn̄ eneme mme ikọ ndọn̄esịt emi ẹdude ke esịt.
5 Yom Mme Idaha Ndinọ Mbon En̄wen Ndọn̄esịt: Nte ọmọfiọk mbọhọidụn̄, nsan̄autom, nsan̄a ufọkn̄wed, m̀mê iman oro oyomde ndọn̄esịt? Ntak mûdomoke ukeme ndikese utọ mbon emi ke ufọk mmọ man ada N̄wed Abasi ọdọn̄ mmọ esịt-e? Ndifiọk ntak oro mmọ ẹyomde ndọn̄esịt eyenen̄ede an̄wam fi ọfiọk nte edidọn̄de mmọ esịt. Ndusụk owo ẹsiwet leta mîdịghe ẹsikot mme owo ke urụk ukopikọ man ẹdọn̄ mmọ esịt. Ata ima mbọhọidụn̄ oyonụk nnyịn ndiwụt edikere mban̄a nnyụn̄ nnọ mmọ ndọn̄esịt oro otode N̄wed Abasi.—Luke 10:25-37.
6 Ke akpanikọ, ẹdọn̄ nnyịn ẹte idọn̄ mbon oro ẹtuan̄ade esịt, inam mbon oro ẹfụhọde ẹkop inemesịt, inyụn̄ inam mmọ ẹdori enyịn ke nyayama ini iso. Emi edi ndọn̄esịt oro mme owo ke ererimbot ẹyomde. Nditịn̄ ikọ idara idara mban̄a ediwak nti n̄kpọ oro Abasi ọn̄wọn̄ọde ọyọnọ mbon esịt akpanikọ ndọn̄esịt ye idotenyịn. Nnyịn ikpakam iti kpukpru ini ndibọp mmọ eke esịt mmọ obụn̄ọde.