N̄wam Nditọ Ukpepn̄kpọ Bible Fo Ẹkabade Ẹdi Mme Atan̄a Eti Mbụk
1 Utom oro Jesus ọkọnọde mme mbet esie nte ẹwụtde ke Matthew 28:19, 20 ama enen̄ede okpon. Christ ọkọdọhọ mme mbet esie ẹnam mme mbet, ndien mbufa mbet emi ẹkenyene ndika iso ke utom emi. Ini oro ke ẹketọn̄ọ utom editan̄a eti mbụk Obio Ubọn̄ Abasi oro ẹnamde idahaemi ke ofụri ererimbot ke utịt ini oro nnyịn idude mi, ndien emi edi akpatre ini oro ẹdinamde utom emi.—Matt. 24:14.
2 Nditọ ukpepn̄kpọ Bible nnyịn ẹkeme ndisịne nditọ nnyịn m̀mê mbon en̄wen emi ẹnyịmede ndikpep Bible ye nnyịn. Enen̄ede ọdọn̄ nnyịn ndin̄wam mme utọ owo oro ẹfiọk ke obiomo mmimọ ndin̄wam mbon en̄wen ẹkabade ẹdi mbet Jesus Christ, nnyụn̄ n̄n̄wam mmọ ẹnam oro.—Luke 6:40.
3 Tịm Mmọ Idem Ndinọ Ikọ Ntiense: Sịn udọn̄ nọ nditọ ukpepn̄kpọ Bible fo ẹbuana se mmọ ẹkpepde ye mbon en̄wen. Bụk ndinem ifiọkutom an̄wautom nọ mmọ. Kpep nditọ fo toto ke uyen ẹtiene ẹbuana ifịk ifịk ke an̄wautom nte ukeme mmọ edide. (Ps. 148:12, 13) Yak ikọ ye se anamde ẹwụt ke emenen̄ede ama utom ukwọrọikọ.—1 Tim. 1:12.
4 Mbon oro ẹmade ndinen edumbet Jehovah ẹnyụn̄ ẹdade mmọ ẹdu uwem ẹdi n̄kukụre mbon oro enye esidọn̄de utom. Nte ededi, mbufa asuanetop inyeneke ifiọk nte n̄kani asuanetop Obio Ubọn̄, emi ẹma ẹkeyak idem ẹnọ ẹnyụn̄ ẹna baptism, edi ana mbufa owo ẹnịm mme akpan ukpepn̄kpọ Bible ke akpanikọ ẹnyụn̄ ẹkeme ndinam mmọ ẹn̄wan̄a. (Se Ẹtịm, page 79-82.) Ke mmọ ẹma ẹkedianarede idem ofụri ofụri ẹkpọn̄ “Akwa Babylon” ye mbre ukara, mmọ ẹkpenyene ndisidụk mme mbono esop kpukpru ini.—Edi. 18:2, 4; John 17:16; Heb. 10:24, 25.
5 Ama okụt ke eyen ukpepn̄kpọ Bible fo odot ndidi asuanetop oro mînaha baptism, afo ekpenyene ndisian esenyịn oro etiede ibuot. Enye ayanam mbiowo iba ẹsobo ye afo ye eyen ukpepn̄kpọ Bible fo man ẹbiere m̀mê enye odot ndisan̄a ye esop ntan̄a eti mbụk Obio Ubọn̄ nte asuanetop oro mînaha baptism. Do, edidi mbiomo fo ndika iso nnọ eyen ukpepn̄kpọ Bible fo ukpep nte enye asan̄ade ye afo ke an̄wautom.