‘Nọ Ọyọhọ Ikọ Ntiense Ban̄a Eti Mbụk’
1. Ewe eti mbụk ke inyene ndibuana ye mme owo?
1 Nnyịn imenyene ifet “ndinọ ọyọhọ ikọ ntiense mban̄a eti mbụk mfọnido Abasi oro owo mîdotke” ke ererimbot oro eti mbụk mîwakke mi. (Utom 20:24) Emi abuana ndinam mme owo ẹfiọk ke “mme akpatre usen” emi ẹmọn̄ ẹsọp ẹbe ẹfep, man edinen obufa ererimbot Jehovah emi ‘mme akpa n̄kpọ ẹdibede ẹfep,’ akpada itie. (2 Tim. 3:1-5; Edi. 21:4) Udọn̄ọ ididụhe aba ini oro. (Isa. 33:24) Mbon oro ẹma ẹkekpan̄a ẹyewọn̄ọ ke udi editi ẹfiak ẹdisobo ubon ye mme ufan mmọ. (John 5:28, 29) Ofụri isọn̄ ayakabade edi ediye Paradise. (Isa. 65:21-23) Emi edi ibat ibat ke otu eti mbụk oro inyenede ndibuana ye mme owo.
2. Ntak emi ini Editi edide ata eti ini ndinọ ikọ ntiense mban̄a eti mbụk?
2 Iyenyene nti ifet nditan̄a eti mbụk emi ke ọfiọn̄ March, April, ye May. Eyo esiye, isinyụn̄ isọpke ikụt ke ndusụk ebiet ke mme ọfiọn̄ emi, ndien emi esinam mme owo ẹkeme ndidu ke an̄wautom mbịghi. Ke adianade do, ẹyenam akakan edinam eke isua emi, oro edi Editi, ke ofụri ererimbot ke utịn ama okosụhọde ke Saturday, March 22. Akpana itọn̄ọ idahaemi inam ndutịm oro edin̄wamde nnyịn inam ekese ke utom ukwọrọikọ.
3. Nso idin̄wam nnyịn inen̄ede ibuana ke utom ukwọrọikọ nte ubon?
3 Asiakusụn̄ Unọ Un̄wam: Nte emekeme ndinam ndutịm man anam utom usiakusụn̄ unọ un̄wam ke ọfiọn̄ kiet, iba, m̀mê ọfiọn̄ mbita oro? Ntak mûdaha ndusụk ini uneme n̄kpọ emi ini en̄wen oro ẹdinịmde ukpepn̄kpọ ubon-o? Edieke ẹnen̄erede ẹdiana kiet nte ubon, owo kiet m̀mê iba ke ubon ẹkeme ndinam utom usiakusụn̄ unọ un̄wam. (N̄ke 15:22) Ẹbọn̄ akam ẹban̄a emi, ẹnyụn̄ ẹse nte Jehovah edidiọn̄de ukeme oro ẹsịnde. (N̄ke 16:3) Idem edieke owo ndomokiet ke ubon mîkemeke ndinam utom usiakusụn̄ unọ un̄wam, kpukpru owo ke ubon ẹkeme ndibiere ndinen̄ede mbuana ke an̄wautom ke ini ẹsan̄ade ye mme asiakusụn̄.
4. Didie ke ikeme ndinam ndutịm man inam utom usiakusụn̄ unọ un̄wam edieke inamde utom idịbi udia uyọhọ ini?
4 Edieke esinamde utom idịbi udia uyọhọ ini, eti ndutịm ekeme ndin̄wam fi anam utom usiakusụn̄ unọ un̄wam. Iso-ọfọn emekeme ndida ubak ini udia uwemeyo n̄kwọrọ ikọ. Mîdịghe emekeme ndibọ ọkpọkpọ efakutom oro ekperede ufọk m̀mê itieutom fo onyụn̄ esibuana ke an̄wautom ke n̄kpọ nte hour kiet mbemiso utom ọtọn̄ọde m̀mê ke utom ama akasuana. Emekeme ndinyene ufan̄ n̄ko ke ndisịk mme n̄kpọ oro mînen̄ekede idi akpan n̄kpọ nnịm nnọ ọfiọn̄ en̄wen ye ke ndida ofụri usen ke mme utịturua mbuana ke an̄wautom. Ndusụk owo ẹsida usen nduọkodudu kiet m̀mê iba ẹwọrọ an̄wautom.
5. Didie ke afo ekeme ndin̄wam n̄kani owo m̀mê mbon n̄kpọnnam ẹnam utom usiakusụn̄ unọ un̄wam?
5 Edieke afo edide akani owo m̀mê owo n̄kpọnnam m̀mê enyenede esisịt ukeme, emekeme ndinam utom usiakusụn̄ unọ un̄wam ke ndiwọrọ an̄wautom esisịt ini kpukpru usen. Ben̄e Jehovah ọnọ fi “odudu eke ebede ukeme owo.” (2 Cor. 4:7) Eyenete an̄wan kiet ama anam utom usiakusụn̄ unọ un̄wam ke ini ekedide isua 106! Un̄wam oro iman ye mmọ eken ke esop ẹkesinọde enye ama anam enye esikeme ndikwọrọ ikọ ke ufọk ke ufọk, anam mfiakn̄ka, enịm mme ukpepn̄kpọ Bible, onyụn̄ esibuana ke mme ikpehe an̄wautom eken. Enye ama anam ẹkeme nditọn̄ọ ukpepn̄kpọ Bible ye owo duop. Enye ọdọhọ ete: “Mma n̄kere mban̄a utịbe utịbe ifet oro n̄kenyenede ndinam utom usiakusụn̄ unọ un̄wam, esịt mi ọyọhọ ye ima ye ekọm ọnọ Jehovah, Eyen esie, ye edima esop Esie. Jehovah sọsọn̄ọ etieti!”
6. Didie ke mme uyen oro ẹma ẹkena baptism, emi ẹdide nditọ ufọkn̄wed, ẹkeme ndinam utom usiakusụn̄ unọ un̄wam?
6 Edieke afo edide uyen emi ama akana baptism, emi edide eyen ufọkn̄wed, afo n̄ko emekeme ndinam utom usiakusụn̄ unọ un̄wam. Eyedi afo edinam ndutịm ndiwọrọ an̄wautom akpan akpan ke mme utịturua, kpa nte mbon oro ẹnamde utom idịbi udia uyọhọ ini. Afo emekeme ndiwọrọ an̄wautom n̄kpọ nte hour kiet ke ndusụk usen ke ufọkn̄wed ama akasuana. Nte odu ini nduọkodudu oro afo ekemede ndida mbuana ke an̄wautom? Edieke edimade ndinam utom usiakusụn̄ unọ un̄wam, neme ye ete ye eka fo.
7. Nso ke mbiowo ẹkeme ndinam man enen̄ede ọdọn̄ nditọete ndiwọrọ an̄wautom ke ini Editi?
7 Demede Nditọete Udọn̄: Uwụtn̄kpọ mbiowo ekeme ndinen̄ede ndemede udọn̄ nditọete ke esop. (1 Pet. 5:2, 3) Mmọ ẹkeme ndibiere ndinam ndutịm an̄wautom nnọ mbon oro ẹdibuanade ke an̄wautom tụhi-tụhi usenubọk, ke ufọkn̄wed ama akasuana, m̀mê ke utom ama akasuana. Esenyịn an̄wautom enyene ndikụt nte ke mme asuanetop oro ẹdotde ẹda usụn̄ ye nte ke efakutom, ọkọrọ ye mme magazine ye n̄wed ẹdu ndida nnam utom ke mme ọfiọn̄ oro ẹdinen̄erede ẹbuana ke an̄wautom mi.
8. Nso ke nnyịn ikpep ito esop kiet?
8 Ke esop kiet, mbiowo ẹma ẹda ediwak ọfiọn̄ ẹsịn udọn̄ ẹnọ nditọete ẹnam utom usiakusụn̄ unọ un̄wam. Idụhe urua oro mmọ mîkọtọtke esop ibat mme asuanetop oro ẹnyịmede ẹnam utom usiakusụn̄ unọ un̄wam. Emi ama anam mbon oro ẹyomde ndinen̄ede mbuana ke an̄wautom ẹfiọk ke iyenyene owo ndida nsan̄a ke an̄wautom. Ẹma ẹnam ndutịm an̄wautom tụhi-tụhi usenubọk n̄ko ye ke mbubịteyo. Emi ama anam asuanetop 53, emi edide n̄kpọ nte mbahade iba ke esop, ẹnam utom usiakusụn̄ unọ un̄wam ke April.
9. Ntak emi ini Editi edide ata eti ini ọnọ mbon oro ẹdotde nditọn̄ọ nditan̄a eti mbụk?
9 N̄n̄wam Mbon En̄wen Ẹkwọrọ Ikọ: Ke ini mbufa owo ye mme uyen ẹdotde ndiwọrọ an̄wautom, ẹkeme ndinam mmọ ẹsan̄a kiet ye mme asuanetop oro ẹnyenede mbufiọk. Utọ ifet oro ekeme ndidu ke ini Editi, emi ediwak owo ke esop ẹdimade ndinen̄ede n̄wọrọ an̄wautom. Nte emenyene eyen ukpepn̄kpọ Bible emi osụk anamde n̄kọri, onyụn̄ odude uwem ekekem ye ndinen edumbet Jehovah? Nte emenyene nti nditọ oro ẹnamde n̄kọri edi mîdịghe kan̄a mme asuanetop? Edieke mmọ ẹdọhọde ke ikpama ndidi mme asuanetop oro mînaha baptism ndien afo okụt ke mmọ ẹdot, do nam ebiowo kiet ọfiọk. Esenyịn oro etiede ibuot ayanam ndutịm man mbiowo iba ẹneme n̄kpọ emi ye afo ye eyen m̀mê eyen ukpepn̄kpọ fo.
10. Nso ke mbiowo ẹkeme ndinam man ẹn̄wam mbon oro mîsiwọrọke an̄wautom aba?
10 Mme ọfiọn̄ oro ẹdide ẹdinyụn̄ ẹnen̄ede ẹdi ata eti ini ọnọ mbon oro mîsiwọrọke an̄wautom aba ndifiak ndibuana ye esop nnam utom. Mme esenyịn Ukpepn̄kpọ N̄wed Esop ye mbiowo eken ẹnyene ndisịn ifịk nsan̄a n̄kese utọ mme owo oro nnyụn̄ nnen̄ede nnọ mmọ ọkpọkpọ ikot ndisan̄a ye mmọ ke an̄wautom. Edieke edide mmọ ẹma ẹtre ndisiwọrọ an̄wautom ke anyan ini, mbiowo iba ẹnyene ndibem iso nnyene nneme ye mmọ man ẹfiọk m̀mê mmọ ẹdot ndiwọrọ an̄wautom.—km-EF 11/00 p. 7.
11. Nso idi akakan n̄kpọ oro owụtde “mfọnido Abasi oro owo mîdotke”?
11 Tịm Idem Nọ Editi: Ufak edi akakan n̄kpọ oro owụtde “mfọnido Abasi oro owo mîdotke.” (Utom 20:24) Ata ediwak owo oro ẹnyenede esịtekọm ẹyesop idem ọtọkiet ke ofụri ererimbot ke utịn ama okosụhọde ke Saturday, March 22, man ẹti n̄kpa Christ. Nnyịn iyom ndikot nnyụn̄ n̄n̄wam kpukpru mbon oro ẹnyenede esịt akpanikọ ẹdidụk ata akpan edinam emi owụtde mfọnido Jehovah oro owo mîdotke, emi enye ọfọnde ye ubonowo.
12. Mmanie ke nnyịn ikeme ndikot Editi?
12 Wet enyịn̄ mbon oro oyomde ndikot. Eyịghe idụhe nte ke mmọ ẹkeme ndisịne mme iman, mme mbọhọidụn̄, mme ufan fo ke ufọkn̄wed m̀mê ke itieutom, mbon oro ekesikpepde Bible ye mbon oro esikpepde Bible idahaemi, ye kpukpru mbon eken oro esikade ekese kpukpru ini. Edieke ndusụk mbon oro okotde ẹbụpde mbụme ẹban̄a Editi, se idude ke page 206-208 ke n̄wed Bible Ekpep, emi aban̄ade Udia Mbubịteyo Ọbọn̄, ekeme ndin̄wam fi ọbọrọ mbụme mmọ. Emi ekeme ndinam ọtọn̄ọ ukpepn̄kpọ Bible, sia emi ọyọnọ fi ifet ndiwụt n̄wed oro isidade inịm ukpepn̄kpọ Bible.
13. Didie ke Jehovah ọkọdiọn̄ ukeme oro asuanetop iba ẹkesịnde ndikot mme owo Editi?
13 Eyenete an̄wan kiet ama ewet enyịn̄ ubon 48 oro enye okoyomde ndikot. Enye ama odụri udịm ke enyịn̄ ubon oro enye okokotde onyụn̄ ewet usenọfiọn̄ oro enye okokotde mmọ. Ekenem enye didie ntem ndikụt owo 26 oro enye okokotde ẹdide Editi! Eyenete kiet emi enyenede ufọkurua ama okot eren emi akanamde utom ọnọ enye, emi ekesidide oku ufọkabasi. Eren oro ama odụk Editi ekem ọdọhọ ete, “Mmekpep n̄kpọ mban̄a Bible ke hour kiet emi n̄kan se n̄kekpepde ke ofụri isua 30 oro n̄kabiatde ke Ufọkabasi Catholic.” Ikebịghike ke Editi ama okokụre, enye ama enyịme ẹsidi ẹdikpep imọ n̄wed Bible Ekpep.
14. Ubịnikọt ewe ke ẹditọn̄ọ ke March 1 ke ofụri ererimbot?
14 Ubịnikọt: Ẹyesuan san̄asan̄a n̄wedikot Editi ke ofụri ererimbot ọtọn̄ọde ke Saturday, March 1 tutu esịm March 22. Kpukpru owo ẹyeyom ndibuana ke akpan ubịnikọt emi. Ọfọn ẹnọ enyeneufọk n̄wedikot ke ubọk akan ndifak ke enyịnusụn̄. Nte ededi, edieke efakutom mbufo okponde, mbiowo ẹkeme ndidọhọ ẹda mbufiọk ẹnịm n̄wedikot ke ufọk oro owo mîdụhe. Nnyịn iyọnọ mbufa magazine n̄ko ke mme utịturua.
15. Didie ke ikeme ndinọ n̄wedikot Editi?
15 Ọyọfọn inam nneme nnyịn edi ibio ibio sia inyenede esisịt ini ndisuan n̄wedikot emi. Tie ufan ufan nyụn̄ sịn ufiop ke nneme fo. Emekeme nditịn̄ n̄kpọ ntem: “Iwaha mi man ikụt ite ke ẹkot fi, mbonubon fo, ye mme ufan fo ẹdi ata akpan edinam oro ẹdinamde ke March 22. N̄wedikot fo edi emi. Ẹwet mme n̄kpọ ẹban̄a edinam oro ke n̄wedikot emi.” Enyeneufọk ekeme ndinyene mbụme. Mîdịghe enye ekeme ndibọ n̄wedikot oro onyụn̄ ọdọhọ ke iyedi. Wet mbon oro ẹnyenede udọn̄ nyụn̄ nam ndutịm ndifiak n̄ka.
16. Ewe ifiọkutom owụt ufọn ubịnikọt ndikot mme owo Editi ke efakutom nnyịn?
16 Owoekọn̄ ama okụt n̄wedikot Editi ke enyịnusụn̄ esie isua oko. Enye ama ebiere ke iyaka edi ekenyene ndibọ unyịme nto akwa owo esie. Ke ini enye okowụtde akwa owo oro n̄wedikot oro, enye ama odop, ekem ọdọhọ ke ete ye eka imọ ẹdi Mme Ntiense ye nte ke imọ ima isidụk mbono esop ye mmọ. Akwa owoekọn̄ oro ama ayak enye aka Editi oro onyụn̄ etiene enye aka!
17. Didie ke iwụt ke nnyịn itabake uduak mfọnido Abasi oro owo mîdotke?
17 Wụt Esịtekọm: Nte ini Editi isua 2008 asan̄ade ekpere, nnyịn owo kiet kiet ikpakam ikere iban̄a mfọnido oro owo mîdotke emi Jehovah ọfọnde ye nnyịn. Apostle Paul ekewet ete: “Nnyịn n̄ko imekpe mbufo ubọk ite ẹkûbọ mfọnido Abasi oro owo mîdotke edi ẹtaba uduak esie.” (2 Cor. 6:1) Didie ke iwụt ke nnyịn itabake uduak mfọnido Abasi oro owo mîdotke? Paul ekewet ete: “Edi ke kpukpru usụn̄ nnyịn itoro idem nnyịn nte mme asan̄autom Abasi.” (2 Cor. 6:4) Mmọdo, nnyịn ida eti ido nnyịn ye edibuana ifịk ifịk ke edikwọrọ eti mbụk iwụt esịtekọm inọ Jehovah ke enọ esie. Ini Editi emi ọyọnọ nnyịn ata eti ifet ndinen̄ede mbuana ke utom an̄wautom, inyụn̄ inọ ọyọhọ ikọ ntiense iban̄a eti mbụk.
[Ekebe ke page 3]
Mmanie Ẹkeme Ndinam Utom Usiakusụn̄ Unọ Un̄wam?
◼ Mme ubon
◼ Mbon oro ẹsinamde utom idịbi udia uyọhọ ini
◼ N̄kani owo ye mbon n̄kpọnnam
◼ Nditọ ufọkn̄wed
[Ekebe ke page 4]
Ke Ini Asuande N̄wedikot Editi:
◼ Tịn̄ ikọ ibio ibio; nam esịne ufiop
◼ Wet enyịn̄ mbon oro ẹnyende udọn̄ nyụn̄ fiak ka
◼ Nọ mme magazine ke mme utịturua oro