San̄asan̄a Mbono Ọnọ Jehovah Ubọn̄
1. Nso ufọn ke isibọ ito ikpọ mbono oro isidụkde ke isua ke isua?
1 Ikpọ mbono eke isua ke isua esinọ Mme Ntiense Jehovah obufa odudu ye nsịnudọn̄ eke spirit onyụn̄ anam mmọ ẹnyene inem inem itie ebuana nditọete. Ikpọ mboho ikọt Jehovah n̄ko esidi eti ifet ndinam ẹfiọk enyịn̄ Jehovah ẹnyụn̄ ẹtan̄a eti mbụk Obio Ubọn̄.
2. Nso ifet ke san̄asan̄a mbono esinọ nnyịn?
2 Ẹsidiomi mbono district kpukpru isua ke ofụri ererimbot ke ufọn kpukpru nditọete. Ndien ndusụk ini, ẹsinịm san̄asan̄a mbono ke ndusụk ebiet. Emi esidi ifet ndiwụt ke esop Abasi edi esop ofụri ererimbot, esinyụn̄ enen̄ede ọnọ ikọ ntiense.
3. (a) Ndi kpukpru owo ẹkeme ndidụk san̄asan̄a mbono? Nam an̄wan̄a. (b) Didie ke edumbet oro odude ke 1 Corinth 14:40 ekeme ndin̄wam nnyịn edieke owo mîmekke nnyịn man itiene idụk san̄asan̄a mbono?
3 Ndimek Mbon Oro Ẹdụkde: Ediwak tọsịn nditọete ẹma ẹdụk san̄asan̄a mbono. Nte ini akade, ekeme ndidi nditọete efen efen ẹyekeme ndidụk kiet ke otu mbono emi. Edi, man ẹnam se ẹketịmde san̄asan̄a mbono emi ẹnọ, man ẹnyụn̄ ẹnam kpukpru n̄kpọ ẹda itie ke nde ke nde, ẹsinam ndutịm man ndusụk n̄kọk itieutom ẹmek ibat mbon oro ẹdidụkde mbono emi ke obio mmọ. Emi esinam nditọete emi ẹtode nsio nsio idụt ẹka ẹkedụk mbono man ẹsịn udọn̄ ẹnọ nditọete n̄kann̄kụk ẹnyụn̄ ẹnọ mbonan̄wa ikọ ntiense. Nte ededi, emi ọwọrọ ke idịghe kpukpru mbon oro ẹsisịnde n̄wed emi Kọmiti Utom Esop ẹsitorode ke ẹsimek man ẹtiene ẹkedụk mbono emi. Ekeme ndidi esịt isinemke ndusụk mbon oro owo mîmekke, edi nnyịn imenịm ke ayan̄wan̄a kpukpru owo se inamde ẹnam utọ ndutịm emi.—1 Cor. 14:40.
4. Anie esibiere ibat mbon oro ẹdụkde san̄asan̄a mbono, ndien ntak-a?
4 Man ẹnọ eti ikọ ntiense, nnyịn iben̄e kpukpru owo ite ẹdiana ye ndutịm oro ẹnamde ẹban̄a san̄asan̄a mbono. Mfịna esidu edieke ndusụk nditọete ẹnamde ndutịm idemmọ man ẹkedụk san̄asan̄a mbono, kpa ye oro owo mîkemekke mmọ ite ẹtiene ẹdụk. N̄kọk itieutom esibiere ibat mbon oro ẹditode ndusụk idụt ẹdidụk san̄asan̄a mbono. Ẹsiyom ẹnam emi mbak owo ediwak akaha ke itie mbono. Edieke mme owo ẹwakde ẹkaha ke ebiet emi ẹnịmde mbono, emi idiyakke n̄kpọ asan̄a nte ọfọnde idinyụn̄ itịn̄ke eti n̄kpọ iban̄a nnyịn ke iso mbon ukara.
5. (a) Nso idiọk edinam ke ẹkekụt ke ini mbono ofụri ererimbot eke isua 2003? (b) Ewe edumbet N̄wed Abasi edin̄wam nnyịn ifep idiọk edinam emi?
5 Ke isua 2003, ẹma ẹkụt ibat ibat mbon oro ẹkemekde nte mme andidụk mbono emi ẹtode Nigeria ẹdụkde mbono ke Ghana ye nditọ mmọ oro mîkesịmke isua emana emi ẹkenịmde, kpa ye ofụri ntọt oro n̄kọk itieutom ọkọnọde ete owo okûnam oro. Emi ama enen̄ede afịna mbon en̄wen emi ẹkedụkde mbono oro, emi mîkọdiọn̄ọke ntak emi ẹkpeyakde ndusụk owo ẹsan̄a ye nditọ oro mîkesịmke isua emana emi ẹkenịmde ẹdi. (Se Mme Hebrew 13:17.) Ẹben̄e kpukpru nnyịn ẹte idiana ye ndutịm oro ẹnamde man ẹnịm mbono emi ke ido nte eyede. Edieke inịmde eti uwụtn̄kpọ inọ nditọete nnyịn, emi ayanam ima, edidianakiet, ye nsịnudọn̄ odu ke otu nnyịn.—1 Cor. 16:16; Phil. 2:1-4.
6, 7. Nso ke mbon oro ẹmekde nte mme andidụk mbono ẹkpenyene ke ekikere?
6 Mbon oro ẹmekde nte mme andidụk mbono ẹkpenyene nditi ke idụk mbono emi man inam mme n̄kpọ Obio Ubọn̄ ẹka iso. Ẹyenen̄ede ẹnam emi ke ini kpukpru mme andidụk ẹtienede ndutịm isan̄ ye mme ndutịm eken oro esop Abasi anamde utu ke ndinam ndutịm idemmọ.
7 Ke isua 2009, ẹyenịm san̄asan̄a mbono ke nsio nsio ebiet ke ofụri ererimbot. Ẹdọhọ mme owo ke Nigeria ẹdụk san̄asan̄a mbono emi ke Ghana. Ẹmemek mbon oro ẹdidụkde mbono emi. Mme Kọmiti Utom Esop ẹma ẹnọ n̄wed ẹben̄e mme asuanetop emi ẹma ẹkeyak idem ẹnọ ẹnyụn̄ ẹna baptism oro mmọ ẹnyịmede ẹdi. Ẹdori enyịn ke kpukpru mbon oro ẹmekde man ẹtiene ẹdụk ẹyediana kiet ye mme andidụk eken emi ẹtode mme idụt en̄wen ẹdomo kpukpru ukeme man ẹnọ eti ikọ ntiense.
8. Edide idụk akamba mbono ke n̄kann̄kụk nnyịn m̀mê idụk san̄asan̄a mbono, didie ke nnyịn ikpanam n̄kpọ?
8 Edide ẹmek nnyịn ndidụk san̄asan̄a mbono m̀mê idụk ikpọ mbono ke n̄kann̄kụk nnyịn, nte inamde n̄kpọ ke usen ke usen akpakam owụt ke ituak ibuot ke ofụri ukpọn̄ ye nte ke ọdọn̄ nnyịn ndikpono Jehovah ke ofụri se inamde!—1 Cor. 10:31; 1 Pet. 2:12.