Tịm Mbufa Owo Idem man Mmọ Ẹkeme Ndiyọ Ubiọn̄ọ
1 Satan esinen̄ede esịn ukeme ndibiọn̄ọ mbon oro ẹtọn̄ọde ndikpep Bible ẹnyụn̄ “ẹyomde ndidu uwem uten̄e Abasi.” (2 Tim. 3:12) Mme nsan̄autom, nsan̄a ufọkn̄wed, m̀mê mme mbọhọidụn̄ nnyịn ẹkeme ndibiọn̄ọ nnyịn. Isimemke inọ mbufa owo ke ini iman emi ẹmade mmọ ẹbiọn̄ọde mmọ.—Matt. 10:21; Mark 3:21.
2 Ẹma Ẹbem Iso Ẹtịn̄ Ẹban̄a Ubiọn̄ọ: Ana mbufa owo ẹfiọk nte ke ẹyekọbọ mmimọ, ye nte ke ukọbọ owụt ke mmimọ idi ata mbet Christ. (John 15:20) Ndusụk ini mme owo ẹsibiọn̄ọ nnyịn sia mmọ ẹnyenede ukwan̄ ekikere ẹban̄a Mme Ntiense Jehovah. Ti ete ke edi akwa n̄kpọ idatesịt owo ndisuene nnyịn ke ntak oro idide mme anditiene Jesus inyụn̄ ikopde uyo Abasi. (Utom 5:27-29, 40, 41) Nam mbufa owo ẹfiọk ke Jehovah eyebere ye mmọ ke ima ima usụn̄. (Ps. 27:10; Mark 10:29, 30) Mmọ ndika iso nsọn̄ọ nda owụt ke mmọ ẹda ke n̄kan̄ Jehovah ke eneni oro aban̄ade m̀mê anie enyene unen ndikara ofụri ekondo.—N̄ke 27:11.
3 Udeme Oro Nnennen Ifiọk Enyenede: Nam nditọ ukpepn̄kpọ Bible fo ẹfiọk ufọn edika iso n̄kọ nnennen ifiọk kpa ye mme idomo oro mmọ ẹkemede ndisobo. Satan odomo ndibiọn̄ọ mmọ mbak ukpep oro mmọ ẹbọde edidọn̄ n̄kam ke ndamban̄a esịt mmọ. (N̄ke 4:23; Luke 8:13) Ana mmọ ẹka iso ẹkọ nnennen ifiọk Ikọ Abasi man mmọ ẹkeme ndisọn̄ọ nda ke mbuọtidem.—Ps. 1:2, 3; Col. 2:6, 7.
4 Ufọn Edime Ime: Oyom owo eme ime ke ini osobode idomo ekededi, ndien emi ekeme ndinyene nti utịp. (Luke 21:16-19) Ke ini mbufa owo ẹyọde ubiọn̄ọ, emi esifọn ye mmọ onyụn̄ ọfọn ye mbon efen. Mmọ ẹsikụt ke Jehovah ekeme ndinen̄ede ndiọn̄ mbon oro ẹkade iso ndime ime.—Jas. 1:12.
5 Apostle Paul ama enem esịt aban̄a n̄kọri eke spirit oro nditọete esie ke Thessalonica ẹkenamde. Enye ama ọkọm Abasi aban̄a mmọ, emi enye Paul akan̄wamde ediwak ke otu mmọ ẹbọ akpanikọ. (2 Thess. 1:3-5) Nnyịn n̄ko imekeme ndikop ukem idatesịt ye uyụhọ oro edieke itịmde nditọ ukpepn̄kpọ Bible nnyịn idem ndiyọ ubiọn̄ọ nnyụn̄ n̄ka iso mme ime.