Bọ Ufọn to Edikpep San̄a Kpere Jehovah
1, 2. (a) Ewe n̄wed ke ẹdikpep ọtọn̄ọde ke May 5, 2009? (b) Ntak emi ikpabakde iben̄e idem inọ mbono esop emi-e?
1 Ukpọhọde Inemesịt Ubon oro nnyịn ikekpepde ama anam nnyịn ikụt ufọn edibọp nnyụn̄ n̄ka iso nnyene ubon oro ọsọn̄de idem. Obufa n̄wed ukpepn̄kpọ oro idikpepde ọtọn̄ọde ke urua May 5, 2009, edi n̄wed San̄a Kpere Jehovah.
2 Didie ke nnyịn ikeme ndinen̄ede mbọ ufọn nto ukpepn̄kpọ emi? Oyom ntịmidem. Esisịt ibat ikpehe ekikere oro ẹdidiomide ẹnọ ukpepn̄kpọ urua kiet kiet ayanam ekese ini odu afo ndinọ ibọrọ ofụri esịt oro ọkọn̄ọde ke se afo ekekpepde onyụn̄ etie ekere se ibuotikọ oro ẹnemede.
3, 4. (a) Didie ke ẹdineme se idude ke ekebe oro, “Mme Mbụme Nditie N̄kere”? (b) Mme udiana mbụme ewe ke ada ukpepn̄kpọ okpobụp? (c) Nso idi akpan uduak n̄wed San̄a Kpere Jehovah?
3 Ọtọn̄ọde ke ọyọhọ ibuot 2, ekebe oro ẹkotde “Mme Mbụme Nditie N̄kere” odu ekpere utịt ibuot kiet kiet. Ke ama ekeneme akpatre ikpehe ekikere ke ibuot kiet kiet, andinịm ukpepn̄kpọ Bible esop ayanam ẹneme se idude ke ekebe oro. Enye eyesịn udọn̄ ọnọ otuowo ndibọrọ mbụme, oyomde ndikop nti ibọrọ otode se mmọ ẹketiede ẹkere ke mme itie N̄wed Abasi. (N̄ke 20:5) Ke adianade ye mme mbụme oro ẹnọde ke ekebe oro, ndusụk ini enye ekeme ndibụp mme utọ mbụme nte: “Nso ke ntọt emi asian fi aban̄a Jehovah? Didie ke enye otụk uwem fo? Didie ke afo ekeme ndida enye n̄n̄wam mbon efen?” Uduak esie edidi ndinam mme owo ẹnọ ibọrọ ofụri esịt, idịghe ndibụp mmọ mme mbụme oro mîdịghe akpan n̄kpọ.
4 N̄wed San̄a Kpere Jehovah edi n̄wọrọnda n̄wed. Okposụkedi kpukpru n̄wed “asan̄autom emi anamde akpanikọ, onyụn̄ enyenede ọniọn̄” ẹnọde Jehovah ubọn̄, ofụri uduak n̄wed emi edi ndineme mban̄a mme edu Jehovah. (Matt. 24:45-47) Nso aduai-owo-idem ifet ana ebet nnyịn ntem! Nnyịn iyenen̄ede ibọ ufọn ito ntotụn̄ọ ukpepn̄kpọ aban̄ade edu Jehovah. Ukpepn̄kpọ emi akpakam an̄wam nnyịn ndinen̄ede nsan̄a n̄kpere Ete nnyịn eke heaven, ndien nnyịn ikpakam itetịm inyene uforo ke ndin̄wam mbon efen ẹnam ntre.