Nọ Ukpep ke Mmemmem Usụn̄
1. Nso idi akpan usụn̄ kiet oro ikemede ndikpep mme owo n̄kpọ an̄wan̄a?
1 Ndikpep mme owo n̄kpọ ke mmemmem usụn̄ ayanam se ikpepde ọsọp an̄wan̄a mmọ. Ndikpebe usụn̄ oro Jesus, kpa Akwa Andikpep, ekesikpepde mme owo n̄kpọ ayanam inen̄ede inyene “usọ unọ ukpep.”—2 Tim. 4:2; John 13:13.
2. Didie ke ikeme ndinọ mme owo ukpep ke mmemmem usụn̄, ndien nso ufọn ke emi enyene?
2 Tịn̄ Se In̄wan̄ade Owo: Ukwọrọikọ Jesus Oro ke Obot ọdọn̄ọ ndusụk ke otu ntotụn̄ọ Ikọ Abasi oro akanam ẹkwọrọde, kpa ye oro, enye an̄wan̄a owo. (Matt., ib. 5-7) “Idem ama akpa otuowo aban̄a usụn̄ ukpepn̄kpọ” Jesus. Se Jesus eketịn̄de ama otụk mme asan̄autom oro ẹkesiode ẹdọn̄ ẹkemụm enye tutu mmọ ẹdọhọ ẹte: “Akananam owo ndomokiet itịn̄ke ikọ ntem.” (Matt. 7:28, 29; John 7:46) Iyomke itịn̄ ikpọ m̀mê awak-n̄kukọhọ ikọ, mîdịghe inọ nnyan mbụk mbemiso inam mme owo ẹdiọn̄ọ ke ikpep mmọ ata akpanikọ. Imekeme ndida ikọ oro mme owo ẹdiọn̄ọde ikpep mmọ akpanikọ ke usụn̄ oro enen̄erede an̄wan̄a.
3. Nso ikeme ndinam ndusụk owo ẹn̄wan̄a ikọ ẹfụk mbon oro ẹkpan̄de utọn̄ ẹnọ mmọ, ndien nso ke ikpanam man emi editịbe?
3 Diọn̄ọ Adan̄a Ikọ Oro Editịn̄de: Jesus ama ọdiọn̄ọ ukeme mbon oro enye ọkọkwọrọde ikọ ọnọ onyụn̄ ọdiọn̄ọ adan̄a ikọ oro enye ekpetịn̄de ọnọ mmọ ke ebe kiet. (John 16:12) Ana nnyịn n̄ko idiọn̄ọ ukeme owo oro nnyịn ikwọrọde ikọ inọ ye adan̄a ikọ oro nnyịn ikpetịn̄de inọ enye ke ebe kiet, akpan akpan ke ini ikwọrọde ikọ inọ iman nnyịn, mbon oro ẹtọn̄ọde-tọn̄ọ ndikpep Bible, m̀mê nditọwọn̄. Inaha in̄wan̄a ediwak ikọ ifụk mmọ, idem ke ini etiede nte ke mmọ ẹnen̄ede ẹkpan̄ utọn̄. Mbon oro ẹnyenede eti esịt ẹyeka iso ẹkpep n̄kpọ ẹban̄a ata Abasi, Jehovah.—John 17:3; 1 Cor. 3:6.
4. Ntak ọfọnde isọn̄ọ itịn̄ mme akpan n̄kpọ utu ke ndinọ nnyan mbụk-e?
4 Sọn̄ọ Tịn̄ Se Idide Akpan N̄kpọ: Jesus ikọnọhọ nnyan mbụk oro akpakanamde ikọ esie okûn̄wan̄a mme owo. Ini oro enye ọkọdọhọde ete: “Kpukpru mme andidu ke udi editi . . . [ẹyewọrọ] ẹdi,” ikedịghe nnennen ini enye nditịn̄ ekese n̄kpọ mban̄a mbon oro ẹdisetde ẹdụk uwem ye mbon oro ẹdisetde ẹdụk ikpe. (John 5:28, 29) Ke ini ikpepde mme owo Bible, akpana isọn̄ọ itịn̄ mme akpan n̄kpọ oro ẹdude ke n̄wed oro isụk ikpepde utu ke nditịn̄ mban̄a mme n̄kpọ oro mîdụhe do.
5. Nso edidiọn̄ ke nnyịn ikeme ndinyene edieke inọde mme owo ukpep ke mmemmem usụn̄?
5 Imenen̄ede ikop inemesịt ke ntak emi Jehovah ekpepde nnyịn n̄kpọ ke usụn̄ oro an̄wan̄ade nnyịn. (Matt. 11:25) Nnyịn ikpakam isịn idem inọ mme owo ukpep ke mmemmem usụn̄ man utom nnyịn on̄wụm mfri onyụn̄ ọnọ nnyịn inemesịt.