Se Ẹkenamde ke An̄wautom

Ke isua utom 2007 ye 2008, mme asuanetop 1,206 ke Nigeria ẹma ẹyere ikot Macedonia ndika n̄kọkwọrọ ikọ ke efakutom oro owo mîsinamke utom kpukpru ini. Ediwak mmọ ẹma ẹnyene inem inem ifiọkutom an̄wautom emi owụtde ke ẹyom mme anamutom efen efen. Eyenete kiet okobụk ete: “Ke mbono esop ama akasuana ke usen oro ikoyomde ndinyọn̄, ete kiet ke obio oro ama obụp ini emi nnyịn idifiakde idikwọrọ ikọ do. Nnyịn ima idọhọ enye ke nnyịn ifiọkke ini idifiakde idi. Ete oro ama ọdọhọ ete: ‘Ke ini n̄wan amande eyen, ana enye ọbọk eyen oro tutu eyen oro ekeme ndise mban̄a idemesie. Anam didie mbufo ẹnyọn̄ ẹkpọn̄ obufa nsekeyen emi ẹmande? Anie ndien edise obufa eyen emi enyịn tutu enye ekeme ndida ke idemesie? Mbọk ẹse se ẹdinamde ẹnọ nnyịn.’” Ndi afo emekeme ndiyere ikot emi isua emi?—Utom 16:9.