Sịn Ifịk Kwọrọ Ikọ!
1. Ewe item Paul etịm odot ikere iban̄a ke eyo nnyịn?
1 “Kwọrọ ikọ, sịn ifịk nam emi.” (2 Tim. 4:2) Ntak emi ikọ Paul enen̄erede edi akpan n̄kpọ ke eyo nnyịn-e? Didie ke ikọ emi ekeme nditụk uwem nnyịn ye eke mbon en̄wen?
2. Ntak emi isisịnde ifịk iyom mbon oro mîkopke eti mbụk kan̄a?
2 Abuana Uwem Mme Owo: Ediwak miliọn owo ke ererimbot ikopke kan̄a eti mbụk oro edinamde ẹnyan̄a mmọ. (Rome 10:13-15; 1 Tim. 4:16) Ediwak mbon oro ẹnyenede esịt akpanikọ ẹdu ke efakutom oro ẹsikwọrọde ikọ ndien ndien. Imekeme ndikụt owo oro akanam nnyịn mîkwe edieke ikade ke usen m̀mê ini en̄wen. Ndisịn ifịk nyom mme owo ntre idiyakke esịt obiom nnyịn, iyonyụn̄ ibọhọ ubiomikpe iyịp.—Utom 20:26.
3. Didie ke ikeme ndida ini nnyịn nnam n̄kpọ ọniọn̄ ọniọn̄ ke an̄wautom?
3 Akpa mme Christian ‘ẹma ẹda ukpepn̄kpọ mmọ ẹyọhọ Jerusalem,’ kpa ye oro ẹkenen̄erede ẹkọbọ mmọ. (Utom 5:28) Ndi nnyịn n̄ko imebiere ‘ndinọ ọyọhọ ikọ ntiense’? (Utom 10:42) Ke ini idude ke an̄wautom, ndi imesida ini oro inyenede inam n̄kpọ ọniọn̄ ọniọn̄? Edieke ibetde nte mbon en̄wen ẹnamde mfiakn̄ka, ndi imesida ini oro itịn̄ ikọ inọ mbon oro ẹsan̄ade ẹbe?
4. Didie ke ndisịn ifịk n̄kwọrọ ikọ an̄wam nnyịn idu ke ukpeme?
4 Anam Inen̄ede Idu ke Edidemede: Sia utịt editịm n̄kpọ emi asan̄ade ekpere, ana idu ke edidemede, idu ke ukpeme. (1 Thess. 5:1-6) Ke ini inemede n̄kpọ iban̄a idotenyịn Obio Ubọn̄ kpukpru ini, editịm n̄kpọ emi idinamke esịt nnyịn odobi. (Luke 21:34-36) Ndien, nte nnyịn isọn̄ọde inyene usen Jehovah “ke ekikere,” emi ayanam inen̄ede isịn ifịk ke utom unyan̄a uwem emi.—2 Pet. 3:11, 12.
5. Ndiwụt ukpono nnọ uwem ekeme ndinam inam nso ke an̄wautom?
5 Ke ini isịnde ifịk ikwọrọ ikọ, nnyịn ise uwem nte Jehovah esede: “Enye [iyomke] owo ndomokiet atak edi oyom kpukpru owo ẹkabade esịt.” (2 Pet. 3:9; Ezek 33:11) Nnyịn ikpakam ibiere ndisịm adan̄a ediwak owo nte ikekeme ke efakutom nnyịn man Jehovah enyene itoro!—Ps. 109:30.