Oyom Mme Asan̄autom Christian Ẹsibọn̄ Akam
1. Nso ke oyom inam man ikụt unen ke utom ukwọrọikọ nnyịn?
1 Nnyịn ikemeke ndinam utom ukwọrọikọ ke idem nnyịn. Jehovah esinọ nnyịn ukeme ndinam utom emi. (Phil. 4:13) Enye esida mme angel esie an̄wam nnyịn ikụt mbon mbieterọn̄. (Edi. 14:6, 7) Jehovah esinam mme n̄kpasịp akpanikọ oro itọde inyụn̄ ibọkde ke mmọn̄ ẹkọri. (1 Cor. 3:6, 9) Edi akpan n̄kpọ didie ntem mme asan̄autom Christian ndiberi edem ke Ete nnyịn eke heaven ke ndibọn̄ akam nnọ enye!
2. Nso idi ndusụk n̄kpọ oro ikpọbọn̄de akam iben̄e?
2 Oyom Ibọn̄ Akam Inọ Idem Nnyịn: Oyom ibọn̄ akam kpukpru ini oro ikwọrọde ikọ. (Eph. 6:18) Nso idi ndusụk n̄kpọ oro ikpọbọn̄de akam iban̄a? Imekeme ndibọn̄ akam mben̄e uko ye edinyene in̄wan̄-in̄wan̄ esịt mban̄a efakutom nnyịn. (Utom 4:29) Imekeme ndiben̄e Jehovah ite an̄wam nnyịn ikụt mbon eti esịt emi ikemede ndikpep Bible. Edieke enyeneufọk obụpde nnyịn mbụme, imekeme ndibọn̄ ibio ibio akam ke esịt inyụn̄ iben̄e Jehovah an̄wam nnyịn inọ nnennen ibọrọ. (Neh. 2:4) Imekeme ndiben̄e ọniọn̄ n̄ko man inam utom ukwọrọikọ edi akpan n̄kpọ ke uwem nnyịn. (Jas. 1:5) Ke adianade do, Jehovah esinem esịt ke ini ikọmde enye iban̄a ifet oro inyenede ndidi mme asan̄autom esie.—Col. 3:15.
3. Didie ke ndibọn̄ akam nnọ mbon en̄wen anam utom ukwọrọikọ aka iso?
3 Oyom Ibọn̄ Akam Iban̄a Mbon En̄wen: Nnyịn inyene n̄ko ‘ndibọn̄ akam mban̄a kiet eken,’ ikam isiakde ekemmọ mme asan̄autom ke enyịn̄ ke ini oro odotde. (Jas. 5:16; Utom 12:5) Ndi unana nsọn̄idem iyakke fi anam ekese ke utom ukwọrọikọ? Edieke edide ntre, bọn̄ akam nọ ekemmọ mme asan̄autom oro ẹkopde nsọn̄idem. Kûkere ke akam oro afo ọbọn̄de ke ibuot mmọ idinyeneke ufọn! Odot ibọn̄ akam iben̄e n̄ko ite mme andikara ẹyak inam utom ukwọrọikọ nnyin, man nditọete nnyịn ‘ẹka iso ẹdu uwem ifụre ye emem.’—1 Tim. 2:1, 2.
4. Ntak emi ikpọkọbọde ke akam-a?
4 Ndikwọrọ eti mbụk ke ofụri isọn̄ edi akamba utom. Edieke nnyịn ‘ikọbọde ke akam,’ Jehovah ayan̄wam nnyịn ikụt unen ke utom oro.—Rome 12:12.