Ndi Enyịn Fo Enen̄ede Ese?
1. Owo ‘ndinam enyịn esie enen̄ede ese’ ọwọrọ nso?
1 Se nnyịn iwụkde enyịn ise esitụk se nnyịn inamde. Ntem se Jesus eketịn̄de mi enen: “Edieke enyịn fo enen̄erede ese, ofụri ikpọkidem fo ayayama”! (Matt. 6:22) Ke ini enyịn nnyịn “enen̄erede ese” nte Jesus ọkọdọhọde, enye owụhọ ke akpan n̄kpọ kiet—edinam uduak Abasi. Nnyịn iyenịm Obio Ubọn̄ akpa idinyụn̄ iyakke mme n̄kpọ obụkidem m̀mê mme edinam oro mînyeneke ufọn ẹbiọn̄ọ utom ukwọrọikọ nnyịn.
2. Nso ikeme nditịmede nnyịn ekikere, edi nso idin̄wam nnyịn?
2 Ntak Oyomde Idụn̄ọde Idem Nnyịn: Se ndutịm unyamurua ọdọhọde ke akpana nnyịn inyene m̀mê se mbon en̄wen ẹnyenede ẹkeme nditịmede ekikere nnyịn. Mbemiso itọn̄ọde ndinam n̄kpọ m̀mê idepde n̄kpọ oro ediyomde ekese ini, okụk, m̀mê odudu, ọkpọfọn “ibat se iditakde” ebe ke ndibụp idem nnyịn ise, ‘Ndi n̄kpọ emi ayayak mi nnam n̄kpọ Abasi m̀mê idiyakke?’ (Luke 14:28; Phil. 1:9-11) Ke ini ke ini, ọfọn ikere n̄ko nte ikpanamde uwem nnyịn etetịm emem man ikeme ndinam ekese ke utom ukwọrọikọ.—2 Cor. 13:5; Eph. 5:10.
3. Nso ke ikpep ito eyenete an̄wan kiet emi akanamde mme ukpụhọde man odu mmemmem uwem?
3 Ke ini eyenete an̄wan kiet ọkọtọn̄ọde usiakusụn̄ ofụri ini, enye okosụk ananam utom ofụri ini okposụkedi emi ndinam utom ibio ini okpokosụk ọnọde enye se enye oyomde man ese aban̄a idemesie. Ekem enye ama ọdọhọ ete: “Owo ikemeke ndidụk ufụn nnọ eteufọk iba. Akana n̄kpọn̄ se mmade man nnyene se nyomde. Mma ndikụt nte ke mme n̄kpọ obụkidem ẹsikani ndien ke ami ndidomo ndinyene mmọ ọwọrọ ndimia idem ufen.” Enye ama anam mme ukpụhọde man odu mmemmem uwem onyụn̄ okpụhọ utom, ndien emi ama an̄wam enye ekeme ndika iso ke utom usiakusụn̄.
4. Ntak oyomde inam enyịn nnyịn enen̄ede ese idahaemi?
4 Nte mme usen nnyịn ẹsọpde anam enen̄ede edi akpan n̄kpọ nnyịn ndinam enyịn nnyịn enen̄ede ese. Nte usen kiet kiet ebede ke ikam inen̄ede ikpere utịt editịm n̄kpọ emi ikan, ntre ke Obio Ubọn̄ Abasi onyụn̄ ekpere akan. (1 Cor. 7:29, 31) Ke ini iwụkde ntịn̄enyịn ke utom ukwọrọikọ, imekeme ndinyan̄a idem nnyịn ye mmọ eke ẹkopde uyo nnyịn.—1 Tim. 4:16.