“Udia ke Edikem Ini”
1. Didie ke usen akpan mbono eke ndondo emi akan̄wam fi ye mbon en̄wen?
1 Ke ima ikodụk usen akpan mbono nnyịn, imesiwak ndidọhọ ite, “Se ikakam iyomde edi oro!” Esenyịn circuit kiet ọkọdọhọ ke ndusụk owo ke circuit imọ ẹma ẹdọhọ ke iyesịn idem ke utom an̄wautom ikan nte ikesisịnde, ke mmọ ẹma ẹkekop se ẹkenamde ke ndutịm mbono eke ndondo emi. Esenyịn kiet oro asan̄ade-san̄a ọkọdọhọ ẹte, “Mbono emi ama an̄wam nnyịn itịm ikere nte utịt enen̄erede ekpere ke adan̄aemi ifiakde idụn̄ọde mme ubiere nnyịn ke uwem.” En̄wen ama ọdọhọ ete, “Ediwak mme asuanetop ẹkedọhọ ke mbono emi ama eti mmimọ ndinen̄ede n̄wụk ntịn̄enyịn ke se idide akpan n̄kpọ ikan, kpa utom ukwọrọikọ.” Didie ke usen akpan mbono eke ndondo emi akan̄wam fi?
2. Nso ke ẹdineme ke usen akpan mbono eke isua 2011?
2 Ndutịm eke isua 2011 edinyụn̄ edi kpa se iyomde. Ibuotikọ esie edi “Nyene Jehovah ke Ebiet Ubọhọ,” emi ẹdade ẹto Psalm 118:8, 9. Ndusụk ibuotikọ oro ẹdinemede ẹdi: “Nte Jehovah Edide Ebiet Ubọhọ ke Ini Nnanenyịn,” “N̄wam Mbon En̄wen Ẹnyene Ubọhọ ke Idak Mba Jehovah,” “Kpebe Jehovah ke Ndidi Ebiet Ubọhọ,” “N̄kparawa Owo, Ẹbuọt Idem ye Jehovah!” ye “Paradise eke Spirit Nnyịn—Ndutịm Jehovah Kaban̄a Ubọhọ.”
3. Didie ke ikeme ndibọ ọyọhọ ufọn nto edidụk usen akpan mbono?
3 Nte Ikemede Ndibọ Ufọn: Ke ẹma ẹkesiak usen mbono mbufo, nam ndutịm man ekeme ndidụk, nyụn̄ kot nditọ ukpepn̄kpọ Bible fo ẹtiene ẹdidụk. Man ‘in̄wụm mfri ke ime,’ ana imụm se ikotde isịn ke esịt. (Luke 8:15) Ntre nen̄ede kpan̄ utọn̄ ke se ẹnemede, nyụn̄ wet mme akpan n̄kpọ mbio mbio ọkọrọ ye mme item oro aduakde ndida nnam n̄kpọ ke uwem ye ke utom ukwọrọikọ fo. Ke mbono ama akasuana, da ini neme ndutịm usen oro nte ubon, nyụn̄ kere ban̄a mme akpan usụn̄ oro afo ye ubon fo ẹkemede ndida se ẹkenemede nsịn ke edinam.
4. Ntak emi ọkpọdọn̄de nnyịn ndidụk usen akpan mbono oro edide?
4 Ukem nte edinem udia oro ọnọde odudu, ẹda ima ye ọniọn̄ ẹtịm usen akpan mbono eke isua 2011. Jehovah akpakam ọdiọn̄ ukeme oro afo esịnde ndidụk nnyụn̄ mbọ ufọn nto “udia ke nnennen ini” oro ẹdade ẹbọk mme asan̄autom Christian ke n̄kan̄ eke spirit.—Matt. 24:45.