Oyom Ifịk Ifịk Mme Ọkwọrọ Ikọ Ẹsibọn̄ Akam Ẹnyụn̄ Ẹtie Ẹkere N̄kpọ
1. Nso ikanam Jesus okûwọn̄ọde ntịn̄enyịn ọkpọn̄ akpan utom esie?
1 Jesus ama ada ofụri mbubreyo kiet ọkọk mme owo udọn̄ọ onyụn̄ ebịn demon osion̄o mme owo ke idem. Ke ndan̄nsiere, ke ini mme mbet esie ẹkụtde enye, mmọ ẹdọhọ enye ẹte: “Kpukpru owo ke ẹyom fi.” Ke nditịn̄ ntem, mmọ ẹkeyom enye aka iso anam mme utịben̄kpọ. Edi Jesus ikayakke oro ọwọn̄ọde enye ntịn̄enyịn ọkpọn̄ ata akpan utom esie, oro edi, edikwọrọ eti mbụk. Enye ama ọbọrọ mmọ ete: “Ẹyak nnyịn ika ebiet en̄wen, ikodụk ke mme obio oro ẹdude ẹkpere, man n̄kwọrọ ikọ do n̄ko, koro n̄kọwọrọ ndi kaban̄a uduak emi.” Nso ikan̄wam Jesus aka iso owụk ntịn̄enyịn ke utom esie? Enye ama ababak edemede ọbọn̄ akam onyụn̄ etie ekere n̄kpọ. (Mark 1:32-39) Didie ke ndibọn̄ akam nnyụn̄ ntie n̄kere n̄kpọ ekeme ndin̄wam nnyịn isịn ifịk ikwọrọ ikọ?
2. Nso ke ikpetie ikere emi edinamde ika iso isịn ifịk ikwọrọ ikọ?
2 Nso ke Ikpesitie Ikere? Jesus ama okụt ke ẹma ‘ẹfiomo mme owo ẹnyụn̄ ẹsuan mmọ nte erọn̄ eke mînyeneke andikpeme.’ (Matt. 9:36) Kpasụk ntre n̄ko, nnyịn imekeme nditie n̄kere adan̄a nte anade mme owo ẹkop eti mbụk. Imonyụn̄ ikeme ndikere mban̄a adan̄a nte ini omụhọde. (1 Cor. 7:29) Nnyịn imekeme ndikere mban̄a mme utom Jehovah ye mme edu esie, akwa ifet emi inyenede ndidi Mme Ntiense Jehovah, ye mme ọsọn̄urua n̄kpọ eke spirit oro ikpepde ke Ikọ Abasi, emi mme owo ke efakutom nnyịn mîfiọkke.—Ps. 77:11-13; Isa. 43:10-12; Matt. 13:52.
3. Ini ewe ke ikpesitie ikere?
3 Ini Ewe ke Ikpesitie Ikere N̄kpọ? Ukem nte Jesus akanamde, ndusụk owo ẹsibak edemede ke ini ebiet odobode. Ndusụk owo ẹsitie ẹkere n̄kpọ ke mbubreyo, mbemiso ẹdụkde idap. (Gen. 24:63) Imekeme ndifak ufan̄ ntie n̄kere n̄kpọ kpa ye inyenede ekese ndinam. Ndusụk owo ẹsinam emi ke ini ẹsịnede ke n̄kpọisan̄ ẹka isan̄. Ndusụk owo ẹsisio ini ke ini nduọkodudu uwemeyo mmọ ẹtie ẹkere n̄kpọ. Ediwak owo ẹsikụt ke nditie n̄kere n̄kpọ, idem ọkpọkọm ke minit ifan̄, mbemiso ẹwọrọde an̄wautom, esin̄wam mmọ ẹkwọrọ ikọ ifịk ifịk ye uko uko.
4. Ntak emi ikpesitiede ikere n̄kpọ?
4 Ndibọn̄ akam nnyụn̄ ntie n̄kere n̄kpọ ayanam nnyịn itetịm ima ndinam n̄kpọ Jehovah, ida utuakibuot nnyịn ke ata akpan n̄kpọ, onyụn̄ ọsọn̄ọ nnyịn idem ndika iso n̄kwọrọ ikọ. Nditie n̄kere n̄kpọ ama enyene ufọn ọnọ Jesus, Akwa Isụn̄utom Abasi, oyonyụn̄ enyene ufọn ọnọ nnyịn n̄ko.