Ẹnam N̄kpọ ke Mbufiọk ke Adan̄aemi Ẹdude ke An̄wautom
1. Ntak emi oyomde ida mbufiọk inam n̄kpọ ke an̄wautom?
1 Mme asan̄autom Abasi ẹkwọrọ ikọ “ke n̄kakwan̄a emana” emi “nte erọn̄ ke ufọt mme wolf.” (Phil. 2:15; Matt. 10:16) Ndiọi mbụk emi ẹban̄ade ntịme mbio obio, afai mbon ntịme, ye ibak ibak ẹdimụm owo ke ukat, ẹwak etieti. Emi ẹwụt ke mme idiọkowo ke ẹdọdiọn̄ “ẹdiọk ẹka iso.” (2 Tim. 3:13) Mme ewe edumbet Bible ke idida isịn ke edinam man ẹn̄wam nnyịn ‘inyene mbufiọk’ ke an̄wautom?—Matt. 10:16.
2. Mme idaha ewe ẹkeme ndinam owo ọkpọn̄ ẹfakutom esie aka ọkọkwọrọ ikọ ke ebiet en̄wen?
2 Da Mbufiọk Nam N̄kpọ: Mme N̄ke 22:3 ọsọn̄ọ etịn̄ ke owụt ifiọk owo ‘ndidịbe’ mbọhọ afanikọn̄. Du ke ukpeme! Mme idaha ẹkeme ndikpụhọde inikiet inikiet ke ebiet oro ekesitiede emem emem. Emekeme ndikụt nte mme bodisi ẹtọn̄ọde ndidu ke efak m̀mê nte otu owo ẹdade ke nsio nsio itie ke efak. Ndusụk ini enyeneufọk emi ọfọnde ido ekeme ndidọhọ fi ke mfịna odu. Utu ke ndituak nda nyom ndifiọk se idide mfịna, owụt ifiọk ndisọsọp n̄kpọn̄ ebiet oro n̄kọkwọrọ ikọ ke ebiet en̄wen.—N̄ke 17:14; John 8:59; 1 Thess. 4:11.
3. Didie ke ẹkeme ndida edumbet oro odude ke Ecclesiastes 4:9 mbuan ke utom ukwọrọikọ nnyịn?
3 Kûsan̄a Ikpọn̄: Ecclesiastes 4:9 ọdọhọ ke “owo iba ẹfọn ẹkan owo kiet.” Okposụkedi emi afo ekesisan̄ade ikpọn̄ ifụre ifụre ke an̄wautom, ndi ke osụk ọfọfọn ndinam ntre idahaemi? Ke osụk ọfọfọn ke ndusụk ebiet. Edi ke mme ebiet efen, ifọnke eyenete an̄wan m̀mê uyen ndisan̄a ikpọn̄ n̄kwọrọ ikọ ke ufọk ke ufọk, akpan akpan ke mbubreyo. Mme n̄kpọ oro ẹsitịbede ẹwụt ke nsan̄a emi etịmde ọnọ ntịn̄enyịn esinen̄ede enyene ufọn. (Eccl. 4:10, 12) Anam anam afo ese m̀mê n̄kpọ etie didie ye mbon eken oro mbufo ẹsan̄ade kiet. Nam edi ido fo ndisisian mbon eken nte ke ọmọn̄ ọkpọn̄ efakutom.
4. Didie ke ikpanam n̄kpọ man ikụt ite ke kpukpru owo ke esop idụkke mfịna?
4 Edi utom mbiowo emi “ẹkpemede ukpọn̄ mbufo” ndinọ ndausụn̄ ntiene nte mme n̄kpọ ẹtiede ke n̄kann̄kụk. (Heb. 13:17) Jehovah ọn̄wọn̄ọ ndidiọn̄ nnyịn nte nnyịn isụkde idem inyụn̄ iberede ye mmọ ọyọhọ ọyọhọ. (Mic. 6:8; 1 Cor. 10:12) Kpukpru mme asan̄autom Abasi ẹkpekam ẹnọ ikọ ntiense uforo uforo ke efakutom nnyịn, ke adan̄aemi ẹnamde n̄kpọ ke mbufiọk kpukpru ini.