Ndisan̄a ke Usụn̄ Un̄wana Emi Akade Iso Ayama
Jehovah edi Enye emi un̄wana eke spirit otode. (Ps. 43:3) Ke adan̄aemi ofụri ererimbot akade iso ndidu ke makmak ekịm, ata Abasi aka iso ndinọ ikọt esie un̄wana. Nso idi utịp un̄wana emi? Bible ọbọrọ ete: “Usụn̄ nti owo ebiet un̄wana eke asiahade, aka iso ayama, tutu esịm ufọt uwemeyo.” (N̄ke 4:18) Un̄wana otode Jehovah aka iso ndiyama ke usụn̄ ikọt esie. Un̄wana emi anam mmọ ẹnam n̄kọri ke esop, ke ukpepn̄kpọ, ye ke ido uwem. Ẹyak ineme nte mbụk mme andituak ibuot nnọ Jehovah mfịn owụtde ke emi edi akpanikọ.
Ererimbot oro akande nnyịn okụk odu ke makmak ekịm. Nte Jehovah akade iso ndinam un̄wana ayama ọnọ ikọt esie, ukpụhọde ọdọdiọn̄ odu ke ufọt ikọt esie ye mbon ererimbot. Nso ufọn ke un̄wana emi anam ọnọ nnyịn? Edi akpanikọ, kpa nte utuenikan̄ oro anamde ẹkụt ukpe ke n̄kịmn̄kịm ọkpọusụn̄ mîkemeke ndisịri ukpe oro, un̄wana Ikọ Abasi isimenke n̄kpọ iduọ ifep. Edi, enye enen̄ede an̄wam nnyịn ifep mme n̄kpọ iduọ emi man ika iso isan̄a ke usụn̄ un̄wana emi akade iso ayama. Mmọdo, ẹyak ika iso inen̄ede itịn̄ enyịn ke ntịn̄nnịm ikọ Jehovah, “kpa nte utuenikan̄ eke ayamade ke n̄kịmn̄kịm ebiet.”—2 Pet. 1:19.