Kpeme Ekikere Fo

1. Nso idi ibuotikọ mbono circuit isua 2013, ndien nso idi uduak ndutịm emi?

¹ Jesus ekekpep mme mbet esie ete ẹma Jehovah ke ofụri esịt, ukpọn̄, ye ekikere mmọ. (Matt. 22:37, 38) Ẹdiomi mme mbono district isua 2012 ye mbono circuit ye akpan usen mbono isua 2013 man ẹn̄wam nnyịn inam owo emi nnyịn idide ke esịt ọsọn̄ idem. Nte mbufo ẹfiọkde, ibuotikọ mbono district nnyịn eke 2012 edi “Kpeme Esịt Fo!” Ibuotikọ ndutịm usen akpan mbono isua 2013 edidi “Kpeme Ubieresịt Fo.” Ndien mbono circuit oro editọn̄ọde ke January 2013 edineme ibuotikọ oro ọdọhọde “Kpeme Ekikere Fo,” emi otode Matthew 22:37. Ẹdiomi ndutịm emi man an̄wam nnyịn owo kiet kiet idụn̄ọde mme ekikere nnyịn inam mmọ ẹnen̄ede ẹnem Jehovah esịt.

2. Nnyịn ikpenyene ndiyom mme ibọrọ mbụme ewe ke ini ndutịm mbono?

² Se Ẹdinemede: Nte nnyịn ikpan̄de utọn̄ ke ini idụkde mbono circuit, nnyịn ikpenyene ndiyom mme ibọrọ mbụme emi, oro ẹwụtde mme akpan n̄kpọ oro ẹnemede:

• Didie ke ikeme nditre ndinyene ‘ekikere owo’?

• Didie ke ikeme ndin̄wam mfụhọde ufụhọn̄kpọ oro anamde ekikere mbon oro mînịmke ke akpanikọ ekịm?

• Edu ukere n̄kpọ ewe ke oyom inyene?

• Nso idi mme ufọn editie n̄kere nti n̄kpọ?

• Didie ke ikeme ndiyak Jehovah akara ekikere nnyịn?

• Didie ke mme ebe, ibanndọ, mme ete ye mme eka, ye nditọ ẹkeme ndinam ubon ẹkop inemesịt?

• Didie ke ikeme ndiben̄e idem nnọ usen Jehovah?

• Nditịm ekikere nnyịn ndinam utom ọwọrọ nso?

• Nso ufọn ke mbon oro ẹnamde se mmọ ẹkpepde ẹnyene?

3. Ntak edide akpan n̄kpọ ndidụk mbono usen iba emi, ntịm n̄kpan̄ utọn̄, nnyụn̄ nda se ikpepde nsịn ke edinam?

³ Satan ke an̄wana onyụn̄ oyom ndibiat ekikere nnyịn. (2 Cor. 11:3) Mmọdo, ana nnyịn ikpeme inyụn̄ ikara ekikere nnyịn. Oyom ika iso inyene ekikere Christ inyụn̄ in̄wana ibiọn̄ọ odudu idiọk ererimbot emi. (1 Cor. 2:16) Ke ntre, nam ndutịm man odụk mbono circuit usen iba emi. Tim kpan̄ utọn̄. Ndida nti item oro ẹdinọde do nsịn ke edinam ayan̄wam nnyịn ifak ọfọn̄ esịt nnyịn ndinam ifịk ifịk utom Obio Ubọn̄.—1 Pet. 1:13.