Nte Ọkpọbọde Ufọn Oto Otu An̄wautom Mbufo
1. Mme ufọn ewe oro ikesibọde ke ini ndutịm Ukpepn̄kpọ N̄wed Esop ke nnyịn isụk ibọ idahaemi ke otu an̄wautom?
1 Ndi amataba ndusụk ikpehe Ukpepn̄kpọ N̄wed Esop? Mme owo ẹkesidụk ke n̄kpri otu ẹnyụn̄ etịn̄ ikọ ifụre ifụre. Emi ama esinam ikeme ndinyene mme ufan oro ẹn̄wamde nnyịn isọn̄ọ ida ke mbuọtidem. (N̄ke 18:24) Esenyịn Ukpepn̄kpọ N̄wed Esop ama esifiọk mme idaha nnyịn owo kiet kiet onyụn̄ ekeme ndinọ nnyịn nsịnudọn̄ oro iyomde. (N̄ke 27:23; 1 Pet. 5:2, 3) Mme ufọn emi ẹsụk ẹdodu ke otu an̄wautom oro nnyịn ibuanade.
2. Didie ke ikeme ndinam usio-ukot man inyene mme ufan ke otu an̄wautom nnyịn emi ẹkemede ndin̄wam nnyịn isọn̄ọ ida ke mbuọtidem?
2 Nam Usio-Ukot: Otu an̄wautom awak ndidi ukem ke ibat nte mme otu ukpepn̄kpọ n̄wed ẹkesidide. Edieke isan̄ade ye kiet eken ke an̄wautom, emi ekeme ndinam idi ufan. (Phil. 1:27) Owo ifan̄ ke otu an̄wautom mbufo ke afo asan̄a kiet kan̄a? Ndi emekeme ‘nditat esịt fo’ ke afan̄ emi? (2 Cor. 6:13) N̄ko, ke ini ke ini, nnyịn imekeme ndidọhọ owo ke otu an̄wautom nnyịn editiene nnyịn abuana ke mbubreyo Utuakibuot Ubon m̀mê editiene nnyịn adia udia. Ke ndusụk esop, otu an̄wautom ẹsinam udia ke adiana ke adiana ẹnọ etịn̄ikọ oro otode-to edi. Ke urua oro mmọ ẹnyenede ndinam emi, otu emi ẹyesop idem ọtọkiet edia udia ẹnyụn̄ ẹnọ kiet eken nsịnudọn̄ inamke n̄kpọ m̀mê etịn̄ikọ oro ekeme ndidu ye mmọ m̀mê ikemeke.
3. Mme ifet ewe ke inyene ndibọ nsịnudọn̄ ke otu an̄wautom nnyịn?
3 Okposụkedi ofụri esop ẹsisopde idem ọtọkiet idahaemi usen iba ke urua, emi iwọrọke ite ke owo iditịmke inọ mme asuanetop ntịn̄enyịn. Ẹmek mme esenyịn ke otu kiet kiet man ẹnọ owo kiet kiet nsịnudọn̄ ye ukpep ke an̄wautom. Edieke esenyịn otu mbufo mîsan̄ake ye afo akanam ke an̄wautom, ntak mûdọhọke ke imọn̄ isan̄a ye enye? N̄ko, esenyịn utom esibuana ke an̄wautom ye nsio nsio otu ke utịturua kiet ke ọfiọn̄ kiet kiet. Ke mme esop oro owo mîwakke emi ẹnyụn̄ ẹnyenede otu an̄wautom ifan̄, enye ekeme ndidiomi ndika n̄kese otu kiet kiet ikaba ke isua. Ndi amanam ndutịm man etiene abuana ke an̄wautom ini emi enye edidide ndise otu mbufo?
4. (a) Didie ke ẹsitịm mbono an̄wautom? (b) Ntak emi ikpekerede ndiyak ẹsinịm mbono an̄wautom ke ufọk nnyịn?
4 Esifọn otu kiet kiet ẹsop idem nsio nsio ẹtịm idem ẹwọrọ an̄wautom ke mme utịturua. Ndinyene ediwak itie ndisop idem n̄wọrọ an̄wautom ke ukem ini ekeme ndinam emem utom ọnọ mme asuanetop ndisịm itie mbono an̄wautom m̀mê efakutom. Ẹkeme ndisọsọp ndian mme asuanetop nnyụn̄ nnam mmọ ẹka efakutom ye unana ubiatini. N̄ko, emi ayanam emem utom ọnọ esenyịn otu nditịn̄ enyịn nse mbon oro ẹdude ke otu esie. Edi nte n̄kpọ etiede ekeme ndinam otu iba m̀mê ẹwakde ẹkan oro ẹsop idem ọtọkiet. Edieke ofụri esop ẹsopde idem ọtọkiet ndiwọrọ an̄wautom ke akpa Saturday ke ọfiọn̄ m̀mê ke Ukpepn̄kpọ Enyọn̄-Ukpeme okụrede, ọkpọfọn otu kiet kiet ẹtie ọtọkiet ẹnyụn̄ ẹnọ esenyịn otu minit ifan̄ ndidian owo ke otu esie mbemiso ẹberi mbono an̄wautom.—Se ekebe oro “Ndi Emekeme Ndiyak Ẹnịm ke Ufọk Fo?”
5. Okposụkedi emi ndutịm Ukpepn̄kpọ N̄wed Esop mîdụhe aba, nnyịn ikeme ndinyene mbuọtidem ke nso?
5 Okposụkedi emi ndutịm Ukpepn̄kpọ N̄wed Esop mîdụhe aba, Jehovah ke akaiso ndinọ nnyịn kpukpru se iyomde man inam uduak esie. (Heb. 13:20, 21) Jehovah ke ese aban̄a nnyịn inyụn̄ iyakke baba n̄kpọ kiet anana nnyịn. (Ps. 23:1) Nnyịn imesinyene ediwak edidiọn̄ ito otu an̄wautom nnyịn. Edieke inamde usio-ukot inyụn̄ ‘itọde ke ntatubọk,’ nnyịn ‘iyọdọk uwak uwak.’—2 Cor. 9:6.
[Ekebe ke page 6]
Ndi Emekeme Ndiyak Ẹnịm ke Ufọk Fo?
Ndusụk esop ẹsinam otu iba m̀mê ẹwakde ẹkan oro ẹdiana kiet ẹwọrọ an̄wautom ke utịturua sia itie mîwakke ikem se otu kiet kiet ẹsopde idem. Mbono an̄wautom edi ubak ndutịm esop, ntre ndiyak ẹnịm mbono emi ke ufọk nnyịn edi ata n̄kpọ ukpono. Ndi emekeme ndiyak ẹnịm enye ke ufọk fo? Kûdọhọ ke ufọk fo iyehe. Mbiowo ẹyekere ẹban̄a ebiet emi ufọk fo odude ye mme n̄kpọ eken oro mmọ ẹkesikerede ẹban̄a ke ini ẹyomde itie ndinịm Ukpepn̄kpọ N̄wed Esop. Edieke edimade ẹnịm mbono an̄wautom ke ufọk fo, sian esenyịn otu an̄wautom mbufo.