“Ẹtie ke Emem ye Kpukpru Owo”
1. Ewe item Bible ke nnyịn ikpada isịn ke edinam ke ini isobode ye mme enyeneufọk oro ẹyatde esịt?
1 Ikọt Jehovah ẹdi mbon oro ẹmade emem ndien utom ukwọrọikọ nnyịn edi utom emem. (Isa. 52:7) Edi, ndusụk ini, nnyịn imesisobo ye mbon oro ẹyatde esịt ke ntak emi nnyịn iwahade ufọk mmọ. Nso idin̄wam nnyịn itie emem emem ke mme utọ idaha ntre?—Rome 12:18.
2. Ntak emi edide akpan n̄kpọ ndida ikike nnam n̄kpọ?
2 Da Ikike Nam N̄kpọ: Okposụkedi emi ndusụk owo ẹsiyatde esịt ke ntak emi mmọ ẹsuade akpanikọ, mbon eken ẹsikop idiọkesịt ke ntak efen idịghe ke ntak etop nnyịn. Ekeme ndidi nnyịn iwaha ufọk mmọ ke ini oro mmọ mîkodorike enyịn. Ọkpọkpọ mfịna ekeme ndinam enyeneufọk ayat esịt. Idem ọkpọkọm edi eti mbụk anam enye ayat esịt, nnyịn inyene nditi nte ke ekeme ndidi ntak oro ẹketụnde enye usụn̄ anam enye anam n̄kpọ ntre. (2 Cor. 4:4) Ndida ikike nnam n̄kpọ ayan̄wam nnyịn isụhọde esịt ikûnyụn̄ iyat esịt ke nte enye anamde n̄kpọ.—N̄ke 19:11.
3. Didie ke ikpowụt ke imokpono enyeneufọk?
3 Kpono Enyeneufọk: Ediwak owo ke efakutom nnyịn ẹsisọn̄ọ ẹyịre ke se mmọ ẹnịmde ke akpanikọ. (2 Cor. 10:4) Mmọ ẹnyene unen ndibiere m̀mê mmimọ iyakpan̄ utọn̄ inọ nnyịn m̀mê idikpan̄ke. Nnyịn ikpedehedei isak enyeneufọk ke se enye enịmde ke akpanikọ m̀mê ndinam etie nte ke nnyịn imọfiọk Bible ikan enye. Edieke owo ọdọhọde ikpọn̄ ufọk imọ, akpana ikpọn̄ ukpono ukpono.
4. Nso ke nditịn̄ ikọ inem inem ọwọrọ?
4 Tịn̄ Ikọ Inem Inem: Ọkpọkọm owo etịn̄ ikọ uyat uyat ye nnyịn, inyene ndibọrọ enye sụn̄sụn̄ ye inem inem. (Col. 4:6; 1 Pet. 2:23) Utu ke nnyịn ndifan̄a n̄kpọ ye enyeneufọk, ọkpọfọn idomo ndineme n̄kpọ oro nnyịn ye enyeneufọk inyịmede. Imekeme ndibụp enye se inamde enye ayat esịt. Edi ndusụk ini esifọn itre nneme mbak nnyịn idinam esịt ọdọdiọn̄ ayat enye.—N̄ke 9:7; 17:14.
5. Nso ufọn ke idinyene edieke inamde n̄kpọ emem emem ke ini ikwọrọde ikọ?
5 Edieke inamde n̄kpọ emem emem, enyeneufọk eyeti nte ikanamde n̄kpọ onyụn̄ akpan̄ utọn̄ ini efen oro owo en̄wen akade ndikwọrọ ikọ nnọ enye. (Rome 12:20, 21) Ọkpọkọm enye isụk inyịmeke ndikop, usen kiet enye ekeme ndikabade ndi eyenete nnyịn. (Gal. 1:13, 14) Edide enyeneufọk ama akpanikọ m̀mê imaha, nnyịn iyokpono Jehovah inyụn̄ inam ukpepn̄kpọ nnyịn enyene uku edieke nnyịn mîyatke esịt edi inam n̄kpọ emem emem.—2 Cor. 6:3.