Da Mme Prọfet nte Uwụtn̄kpọ—Jonah
1. Nti edu ewe ke Jonah ekenyene?
1 Nso ke esinyene ke ekikere ke ini etide prọfet Jonah? Ndusụk owo ẹsida enye nte mbe m̀mê owo isọn̄esịt. Edi enye ama osụhọde idem, enyene uko, ye edu n̄waidem. Didie ke ikeme ndida nti edu Jonah emi “nte uwụtn̄kpọ”?—Jas. 5:10.
2. Didie ke ikeme ndikpebe nsụhọdeidem Jonah?
2 Nsụhọdeidem: Ke akpa, Jonah ikakaha efakutom oro ẹkedọhọde enye aka. Emi ikpakpaha owo idem sia ẹkesikot mbon Assyria mbon afai, ẹnyụn̄ ẹkot Nineveh “obio emi ọduọkde iyịp.” (Nah. 3:1-3) Edi Jehovah ama otụnọ Jonah, ndien Jonah ama osụhọde idem onyụn̄ enyịme ndika efakutom oro ke ini ẹkefiakde ẹdọhọ enye aka. (N̄ke 24:32; Jonah 3:1-3) Kpa ye oro enye ekefehede ke akpa, enye ama anam uduak Jehovah. (Matt. 21:28-31) Ndi nnyịn imebiere ndikwọrọ eti mbụk nte Jonah, idem ọkpọkọm ẹtụnọ nnyịn mîdịghe ẹnọ nnyịn ika efakutom oro mme owo mîmaha ndikpan̄ utọn̄?
3. Ewe ikpehe utom ukwọrọikọ fo iyom uko ye n̄waidem?
3 Uko ye N̄waidem: Ke ini idiọk ubiere oro Jonah akanamde ndifehe n̄ka Tarshish okoyomde ndinam uwem mme awat-inyan̄ ẹtak, enye ama enyịme ndikpa. (Jonah 1:3, 4, 12) Ekem, ke ini enye anamde se ẹkedọn̄de enye ete akanam ke Nineveh, enye ama odụk esịt akwa obio oro okoyom eti itie ndida ntan̄a ubiereikpe Jehovah. Se enye akanamde oro okowụt ke enye edi prọfet Abasi emi enyenede uko, idịghe mbe! (Jonah 3:3, 4) Nso kaban̄a nnyịn mfịn? Oyom inyene uko oro Abasi ọnọde man ikeme ndinọ ikọ ntiense uko uko ke ini ẹkọbọde nnyịn. (Utom 4:29, 31) Oyom n̄waidem man ida ini nnyịn ye se inyenede ikwọrọ ikọ.—Utom 20:24.
4. Ntak emi ikpadade ini itie ikere nti uwụtn̄kpọ oro mme prọfet Jehovah ẹkenịmde?
4 Ini ekededi oro okotde mbụk emi aban̄ade kiet ke otu mme prọfet Jehovah, afo ọyọbọ ufọn edieke afo adade nte ke afo odu do ye nte ke afo ke n̄kpọ oro etịbe ọnọ. Bụp idemfo ete: ‘Didie ke n̄kpakanam n̄kpọ? Didie ke n̄keme ndikpebe nti edu esie emi?’ (Heb. 6:11, 12) Mme ibuotikọ en̄wen emi ẹdidude ke Utom Obio Ubọn̄ Nnyịn ke ini iso ẹyeneme nti n̄kpọ efen efen oro ikemede ndikpep nto mme anam-akpanikọ prọfet Jehovah en̄wen.