Ẹkpan̄ Utọn̄ Ẹnyụn̄ Ẹkpep N̄kpọ
1. Ntak oyomde inen̄ede isịn ukeme ikpan̄ utọn̄ inyụn̄ ikpep n̄kpọ ke mbono district?
1 Ibịghike, mbono district eke 2013 ọmọn̄ ọtọn̄ọ. Ẹnanam ẹkese utom ke nditịm ndutịm mbono oro edisede aban̄a mme idaha oro ẹdemerede ke ofụri ererimbot idahaemi. Ndi amanam ndutịm ndidụk mbono ke ofụri usen ita emi? Ikpọ mbono ẹkeme ndinyene ediwak n̄kpọ oro ọwọn̄ọrede ntịn̄enyịn mme owo, ntre oyom isịn ukeme ikpan̄ utọn̄ ke ini edinam. Sia mme ini ikpehe edinam ẹniọn̄de ẹkan ini mbono esop, ana ẹkpan̄ utọn̄ ke anyan ini ẹkan nte ẹsikpan̄de ke ini mbono esop. N̄ko, isan̄ uka mbono ye mme n̄kpọ eken ẹkeme ndinam owo akpa mba. Nso idin̄wam nnyịn ika iso itịn̄ enyịn man ikpan̄ utọn̄ inyụn̄ ikpep n̄kpọ?—Deut. 31:12.
2. Didie ke ikeme nditịm esịt nnyịn mben̄e se ẹdinemede ke mbono district?
2 Mbemiso Mbono Ọtọn̄ọde: Ẹyesịn ndutịm mbono district ke ikpehe Intanet nnyịn, www.jw.org/efi. Emi eyesịne ibuotikọ kpukpru utịn̄ikọ, ye akpan itie N̄wed Abasi kiet m̀mê iba oro ibuotikọ kiet kiet enemede. Edieke edide imesidụk Intanet, ndibem iso ndụn̄ọde mme ibuotikọ emi ayan̄wam nnyịn itịm esịt nnyịn iben̄e se ẹdinemede. (Ezra 7:10) Ke ini mbubreyo Utuakibuot Ubon mbufo, ndi emekeme ndisio ini nneme n̄kpọ mban̄a mbono emi man enen̄ede ọdọn̄ kpukpru owo ke ubon ndidụk?
3. Nso idin̄wam nnyịn itịm ikpan̄ utọn̄?
3 Ke Ini Edinam: Edieke ekemede, ọkpọfọn aka ekeken̄ idem mbemiso ẹtọn̄ọde ikpehe edinam kiet kiet. Nịme fon fo mbak enye editịmede fi edieke owo okotde m̀mê ọnọde fi etop mîdịghe mbak afo uduyom ndinọ owo etop ke ini edinam. Edieke enyenede eti ntak nditre ndinịme fon fo, sụhọde uyo esie mbak enye editịmede mbon en̄wen edieke owo okotde fi. Edieke akamade ekpri kọmputa ke ini edinam, kûyak enye ọwọn̄ọde ntịn̄enyịn mbon en̄wen. Fep ndidia n̄kpọ m̀mê ndin̄wọn̄ n̄kpọ ke ini edinam. (Eccl. 3:1) Wụk enyịn se etịn̄ikọ. Ke ini ẹkotde itie N̄wed Abasi, tiene se ke Bible fo. Wet mbio mbio akpan n̄kpọ.
4. Didie ke mme ete ye eka ẹkeme ndin̄wam nditọ mmọ ẹkpan̄ utọn̄ ẹnyụn̄ ẹkpep n̄kpọ?
4 Imoyom nditọ nnyịn n̄ko ẹkpan̄ utọn̄ ẹnyụn̄ ẹkpep n̄kpọ. Mme N̄ke 29:15 ọdọhọ ete: “Eyen emi ẹyakde ẹnọ usụn̄ esie eyesuene eka esie.” Ntre, ọfọn mme ubon ẹtie ọtọkiet man mme ete ye eka ẹkụt ke nditọ mmọ ke ẹkpan̄ utọn̄ ke ini edinam, utu ke mmọ ndineme nneme, nnọ owo etop, mîdịghe ẹsan̄a ẹkanade itie mbono. Idem ọkpọkọm mmọ ẹkpri ẹkaha ndifiọk kpukpru se ẹtịn̄de, ẹkeme ndikpep mmọ nditie sụn̄ n̄kpan̄ utọn̄, nnyụn̄ ntre ndide idap.
5. Ntak ọfọnde idụn̄ọde se ikokopde ke mbono, ndien didie ke ikpanam emi?
5 Kpukpru Usen ke Mbono Ama Akasuana: Kûdu ke an̄wa tutu eyo ọsọn̄. Bak dụk idap man enen̄ede ọduọk odudu. Ama odụn̄ọde se afo okokopde, udusọpke ufre. Ntem, ọkpọfọn ẹda minịt ifan̄ kpukpru mbubreyo ẹtie ọtọkiet nte ubon ẹneme se ẹkekopde. Edieke asan̄ade ye mme ufan fo aka itie unyamudia, kama n̄wed emi ekewetde mme akpan n̄kpọ nyụn̄ neme akpan n̄kpọ kiet m̀mê iba emi ekenen̄erede ama. Ke ẹma ẹkenyọn̄ mbono ẹsịm ufọk, ẹmekeme ndisio ini ke mbubreyo Utuakibuot Ubon mbufo ẹneme nte ubon mbufo ẹdinamde se ẹkekopde ke mbono. Ẹmekeme n̄ko ndida ini kpukpru urua nneme se ẹkesiode ke mbono.
6. Ndi nnyịn ndinyụn̄ ndu ke itie mbono kpọt ekem? Nam an̄wan̄a.
6 Udia inyeneke ufọn ndomokiet ibọhọke owo adia, enye onyụn̄ ataha owo ke idịbi. Kpasụk ntre ke edi ye udia eke spirit oro ẹdinọde ke mbono district. Nnyịn ikpakam inen̄ede ibọ ufọn ke mbono emi ke ndidụk kpukpru ikpehe edinam, ntịm n̄kpan̄ utọn̄, nnyụn̄ nnam se ikpepde.