Edu Oro Ọnọde Abasi Ubọn̄
1. Mme owo ẹsisan̄a didie ẹfiọk ke Mme Ntiense Jehovah ẹdi ndidụk mbono district?
1 Ke ini idụkde mbono district, mme owo ẹsifiọk. Ke ediwak obio mbono, ufọkutom usuanetop esitọt nte ke nnyịn imedi ndidụk mbono. Mbon oro ẹdụkde mbono ẹsiyọhọ mme ufọkisen ye itie unyamudia, ndien mbon oro ẹdụn̄de ke mbọhọ oro ẹsikụt ediwak isenowo emi ẹdiande kad idiọn̄ọ mbono ke ọfọn̄ mmọ. Se itienede mi ẹdi ndusụk n̄kpọ oro ẹtide nnyịn emi ẹdin̄wamde nnyịn ida nti edu nnyịn inọ Abasi ubọn̄ ke adan̄aemi idude ke obio mbono.—1 Pet. 2:12.
2. Didie ke nnyịn ndisịne ọfọn̄ oro owụtde iso o-bụt ekeme ndinọ Abasi ubọn̄ ke adan̄aemi idude ke obio mbono?
2 Ọfọn̄ Oro Owụtde Iso O-bụt: Mme owo ẹsima ke ini ẹkụtde nte nnyịn isịnede ọfọn̄ oro owụtde iso o-bụt idụk mbono. Edi mmọ ẹkeme ndinen̄ede mma n̄kan ke ini isịnede ọfọn̄ oro owụtde iso o-bụt ika ufọkisen, ika ndidia udia ke itie unyamudia, ika ndidep n̄kpọ, m̀mê mme ebiet en̄wen. Okposụkedi emi nnyịn mîdisịneke ọfọn̄ akpan edinam ika mme itie ntre, se ededi oro isịnede ikpetiehe nsuahade nsuahade, edi ana owụt iso o-bụt, onyụn̄ enyene uku. Mbon oro ẹkụtde nnyịn ẹkpenyene ndikụt ke nnyịn imokpụhọde ye mbon oro mîdịghe mme andinịm ke akpanikọ. (Rome 12:2) N̄ko, nnyịn inyene ndidian kad idiọn̄ọ mbono nnyịn, koro emi ayanam ẹdiọn̄ọ ke imenyene mbono, ọnọ nnyịn ifet ndinọ ikọ ntiense, onyụn̄ anam mbon en̄wen oro ẹdụkde mbono ẹdiọn̄ọ nnyịn.
3. Didie ke ikeme ndiwụt ke imenyene ime ye eti ido?
3 Ime ye Eti Ido: Ke utọ ini emi ediwak owo ke ererimbot ẹdide mme ama idem ye mme anana esịtekọm mi, eyenen̄ede enem mme owo, utọ nte, mme anamutom ke ufọkisen ye ke itie unyamudia ndikụt nte nnyịn imede ime inyụn̄ inyenede eti ido. (2 Tim. 3:1-5) Ke ini imụmde itie inịm m̀mê ibetde ndibọ mme n̄kpọ oro ẹsiode ke mbono, nnyịn ikpoyomke ufọn idem nnyịn, edi ikpoyom ufọn mbon en̄wen. (1 Cor. 10:23, 24) Ke eren kiet emi enyenede udọn̄ ama okodụk mbono district ke akpa ini, enye ama ọdọhọ ete, “Ntịghi n̄kpọ ndomokiet oro ẹkekwọrọde usen oro, edi ndifreke nte Mme Ntiense ẹkenamde n̄kpọ.”
4. Ntak emi ikpekerede ndinam utom unyịmesịt ke mbono edieke ikemede?
4 Mme Anamutom Unyịmesịt: Ẹdiọn̄ọ ata mme Christian ke mmọ ndinyene edu unam utom ke unyịmesịt. (Ps. 110:3) Ndi emekeme ndin̄wam ke mbono district? Ke mbono district kiet, nditọete iren ye iban emi ẹkedide n̄kpọ nte owo 600, ẹma ẹnọ idemmọ unyịme unyịme ndinam itie mbono asana mbemiso ẹtọn̄ọde mbono. Owo kiet emi anamde utom ke itie oro ẹkebọde ẹnịm mbono oro ama ọdọhọ ete: “Akananam nnyịn ikwe utọ n̄kpọ emi! Ọsọsọn̄ ndinịm ke kpukpru mme owo emi ẹdi mme anamutom unyịmesịt.” Nnyịn itie ye ọkpọsọn̄ udọn̄ ibet mbono district eke 2013 ye ifet oro idinyenede ndinọ Abasi ubọn̄ nnyụn̄ n̄kpan̄ utọn̄ n̄kpep n̄kpọ nto enye.
[Ekebe ke page 4-5]
Se Ẹtide Owo Ẹban̄a Mbono District Eke 2013
◼ Mme Ini Ndutịm: Ke usen mbita emi, ndutịm editọn̄ọ ke usenubọk ke n̄kanika ebede 9 ke minit 20. Kpukpru nnyịn ikpenyene ndidu ke itie nnyịn ke ini emi man ndutịm ekeme nditọn̄ọ ke ido nte eyede. Ke Friday ye Saturday, mbono edisuana ke ayakde minit duop ndimia n̄kanika ition mbubreyo; ndien ke Sunday, ke ayakde minit 25 ndimia n̄kanika 4 mbubreyo.
◼ Itie Ubon N̄kpọisan̄: Ke kpukpru an̄wa mbono itie oyodu ke mfọn ọnọ mme andidụk mbono ndinịm n̄kpọisan̄ mmọ etiene ini oro mmọ ẹdide. Mme adaidaha ẹyedu ndiwụt mme owo ebiet ndibon n̄kpọisan̄. Mbọk ẹtiene ndausụn̄ mbon oro ẹsede ẹban̄a nte ẹbonde n̄kpọisan̄.—1 Cor. 13:4, 5.
◼ Edimụm Itie Nnịm: N̄kukụre mbon oro ẹkemede ndimụm itie nnịm nnọ ẹkpedi mbon oro ẹdụn̄de ye nnyịn m̀mê mbon oro ẹsan̄ade ye nnyịn ke n̄kpọisan̄ nnyịn, m̀mê mbon oro nnyịn isụk ikpepde mmọ Bible.—1 Cor. 13:5.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itie mbono man ẹkedep udia ke ini nduọkodudu uwemeyo. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdụk efe mbono.
◼ Mme Etịbe: Nnyịn imekeme ndiwụt esịtekọm mban̄a ndutịm oro ẹnamde ke mbono emi ebe ke nditịp n̄kpọ ke imaesịt ke itie mbono kaban̄a utom ofụri ererimbot. Ẹkpenyene ndiwet “Watch Tower,” nte ikọ iba, ke babru ubọ okụk ke ban̄k, oro ẹnọde. Ẹkeme ndida debit card m̀mê credit card nnọ etịbe n̄ko.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itie mbono, mbọk ẹneme ye adaidaha oro odude ekpere, emi edisọpde an̄wam man ẹmen owo udọn̄ọ oro ẹka Itieutom Akpa Usọbọ emi mme ọnọ usọbọ oro ẹdotde ẹkemede ndise nte idem esie ọdiọkde eketre nnyụn̄ nnọ un̄wam.
◼ Ibọk Usọbọ: Edieke edide afo emenyene san̄asan̄a ibọk oro esidade, mbọk kụt ete ke amakama enye awak ekem, koro owo mîdinyeneke orụk ibọk emi ke itie mbono. Ẹkpenyene ndiduọn̄ọ abiabon ye n̄kpọ ukịmibọk mbon oro ẹdọn̄ọde ikịm an̄wan n̄kụhọ ke ebiet oro ẹsiduọn̄ọde mme n̄kpọ oro ẹkemede ndinọ owo unan utu ke ndidọn̄ mmọ ke n̄kpọ udọn̄ mbio itie mbono ye eke itieidụn̄.
◼ Ikpaukot: Kpukpru isua, ikpaukot esinọ mme owo unan, akpan akpan n̄kokon̄ ikpaukot. Ntre ọkpọfọn afo esịne ukeuke ikpaukot oro ekemde fi, emi ediyakde fi asan̄a ifụre ifụre mbak ududa unan.
◼ Ukpatn̄kpọ Nseknditọ ye Mme Akpakaha: Owo ikpenyeneke ndida ukpatn̄kpọ nseknditọ ye mme akpakaha ndi itie mbono. Edi ẹkeme ndida n̄kpọitie nseknditọ oro ẹkemede ndinịm n̄kpere ete ye eka ndi.
◼ Ufuọn̄: Oyowụt mfọnido edieke iduọkde esisịt m̀mê itrede-tre ndiduọk perfume emi ọsọn̄de utebe mbak edifịna mbon oro ẹnyenede utọ udọn̄ọ nte ikọn̄ obun̄wek.—1 Cor. 10:24.
◼ Babru Please Follow Up (S-43): Ẹkpenyene ndida babru Please Follow Up n̄wet n̄kpọ mban̄a owo ekededi emi owụtde udọn̄, oro ẹkwọrọde ikọ ẹnọ ke ido nneme ke ini mbono. Ẹmekeme ndiyak babru oro ẹma ẹkewet n̄kpọ ẹyọhọ nnọ Itieutom Unọ N̄wed mîdịghe ẹyak ẹnọ ewetn̄wed esop mbufo ke ẹma ẹkenyọn̄ọ mbono.
◼ Itie Unyamudia ye Mme Anyam N̄kpọ: Yak nti edu fo ọnọ enyịn̄ Jehovah ubọn̄ ke itie unyamudia. Sịne n̄kpọ ke usụn̄ oro owụtde ke afo edi asan̄autom Abasi. Iwụtke eti ibuot ndikedep n̄kpọ ke ini edinam osụk akade iso.
◼ Mme Ufọkidụn̄:
(1) Mbọk ẹkûbọ mme ubet ẹwak ẹkan se mbufo ẹyomde, ẹkûnyụn̄ ẹyak ẹdụn̄ ke ubet ẹwak ẹkan ibat oro ẹdọhọde ẹdụn̄.
(2) Kûdọhọ ke iyomke ubet ufọkisen oro ẹkenịmde ẹnọ fi ibọhọke n̄kpọ etịbe, nyụn̄ sọsọp sian mbonutom ufọkisen edieke n̄kpọ etịbede, man ẹkeme ndida mmọ nnọ mbon oro ẹyomde ufọkidụn̄. (Matt. 5:37) Ekeme ndidi owo idifiakke ikpọn̄ okụk oro akawakde ekpe inọ fi edieke ntọt oro ọdọhọde ke uyomke ubet oro aba mîyọhọke usen iba.
(3) Men ukpatn̄kpọ umen mbiomo ke ufọkisen ke ini eben̄ede idem ndida enye nnam n̄kpọ, nyụn̄ men kenịm ndondo oro okụrede man mbon en̄wen ẹkpekụt ẹmen.
(4) Afo emekeme ndiyom ekpri n̄kpọ nnọ mbonutom ufọkisen oro ẹn̄wamde fi ẹmen mbiomo ye owo oro esede aban̄a ubet oro afo odude.
(5) Ẹtem udia n̄kukụre ke mme ebiet oro ẹdọhọde ẹtem. Edieke itemde udia ke ini edinam osụk akade iso, emi ediwọrọ ke nnyịn iwụtke esịtekọm iban̄a mme n̄kpọ eke spirit.
(6) Kûmen mme n̄kpọ oro ẹnịmde ẹnọ mme andidụn̄ ufọkisen utọ nte, uyo, swid, tea m̀mê mmịn, ukan nte akpanade emen.
(7) Ẹwụt mme mbun̄wụm spirit kpukpru ini oro ẹnamde n̄kpọ ye mme anamutom ufọkisen ye mbon Itieutom Unọ Ufọkidụn̄. Mmọ ẹse ẹban̄a ata ediwak isenowo. Ntre mmọ ẹyema edieke ifọnde ido, inyene ime, inyụn̄ inam n̄kpọ ke eti ibuot.
(8) Mme ete ye eka ẹkpenyene ndikpeme nditọ mmọ kpukpru ini ke ufọkisen, ke dọmitri, m̀mê ke itie ekededi.
(9) Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄. Ẹdụn̄ ke ebiet oro ẹnọde mbufo. Nditọete iren ikpenyeneke ndidu tutu eyo ọsọn̄ m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo.
(10) Edieke mfịna odude ke ebiet oro odụn̄de, kụt ete ke ọmọsọsọp asian Itieutom Unọ Ufọkidụn̄ ke ini osụk odude ke an̄wa mbono man mmọ ẹn̄wam fi.
◼ Utom Unyịmesịt: Owo ekededi oro akpamade ndinọ idem unyịme unyịme ekpenyene ndika Itieutom Utom Unyịmesịt ke mbono. Nditọwọn̄ oro mîyọhọke kan̄a isua 16 ẹkeme ndinam utom ye ete m̀mê eka m̀mê owo oro akamade mmọ, mîdịghe ẹnam ye akwa owo emi ete m̀mê eka m̀mê owo oro akamade mmọ enyịmede.