Nso Isinam Nnyịn Ikwọrọ Ikọ?
1. Nso ebuana ke ima enyene ye utom ukwọrọikọ nnyịn?
1 Edikwọrọ eti mbụk Obio Ubọn̄ Abasi edi ata akpan utom oro nnyịn ikemede ndinam mfịn. Ke akpanikọ, utom emi ke ida iwụt ke imanam ikpọ ewụhọ iba emi: ndima Jehovah nnyụn̄ mma mbọhọidụn̄ nnyịn. (Mark 12:29-31) Ima enen̄ede anam nnyịn ikeme ndisịn ifịk n̄kwọrọ ikọ.—1 John 5:3.
2. Didie ke utom ukwọrọikọ nnyịn owụt ke imama Jehovah?
2 Ima Oro Imade Jehovah: Ima oro imade edima Ufan nnyịn, Jehovah, anam nnyịn iyom nditịn̄ ikọ ke ibuot esie. N̄kpọ nte isua 6,000 edi emi tọn̄ọ nte Satan ọkọdọk Jehovah edidọk. (2 Cor. 4:3, 4) Mmọdo, mme owo ẹdọhọ ke Abasi esitụhọde mme anamidiọk ke hell oro asakde ikan̄, nte ke enye edi Abasi-Ita-ke-Kiet oro mîn̄wan̄ake owo, ye nte ke enye ikereke iban̄a owo. Ediwak owo ẹkam ẹdọhọ ke Abasi idụhe. Enen̄ede ọdọn̄ nnyịn ndinam mme owo ẹfiọk akpanikọ oro aban̄ade Ete nnyịn eke heaven. Nnyịn ndisịn ifịk ke utom ukwọrọikọ anam Abasi adat esịt onyụn̄ anam Satan okụt edikpu.—N̄ke 27:11; Heb. 13:15, 16.
3. Didie ke utom ukwọrọikọ nnyịn owụt ke imama mbọhọidụn̄ nnyịn?
3 Ima Mbọhọidụn̄: Ini ekededi oro inọde owo ikọ ntiense, nnyịn iwụt ke imama enye. Ẹnen̄ede ọdọn̄ mme owo ndikop eti mbụk ke ndiọkeyo emi. Ediwak owo ẹtie nte mbon Nineveh eke eyo Jonah emi ‘mîkọfiọkke ukpụhọde ke ufọt ubọk nnasia ye ufien mmọ.’ (Jonah 4:11) Utom ukwọrọikọ nnyịn ekpep mme owo nte ẹkpedude eti uwem ẹnyụn̄ ẹkopde inemesịt. (Isa. 48:17-19) Enye anam mmọ ẹnyene idotenyịn. (Rome 15:4) Edieke mme owo ẹkpan̄de utọn̄ ẹnyụn̄ ẹnamde se mmọ ẹkpepde, “ẹyenyan̄a” mmọ.—Rome 10:13, 14.
4. Nso ke Jehovah mîdifreke?
4 Nti nditọ inyeneke-nyene akpan ini oro mmọ ẹmade mme ete ye eka mmọ. Mmọ ẹsidomo ndinam emi kpukpru ini. Kpasụk ntre, ata ima oro imade Abasi ye mbọhọidụn̄ nnyịn ayanam nnyịn ida ifet ekededi oro inyenede inọ ikọ ntiense kpukpru ini, idịghe ke mme usen oro ẹnịmde ndinọ ikọ ntiense kpọt. Nnyịn iyọkwọrọ ikọ, ikpaha mba. (Utom 5:42) Jehovah idifreke utọ ima oro tutu amama.—Heb. 6:10.