Mmanie Ẹdima Ndikot Ibuotikọ Emi?
1. Ke ini ikotde Enyọn̄-Ukpeme ye Ẹdemede! nso ke ikpekere iban̄a, ndien ntak-a?
1 Ẹtịm Enyọn̄-Ukpeme ye Ẹdemede! man ẹnyene ufọn ẹnọ kpukpru owo ke ererimbot. Mmọdo, mme ibuotikọ mmọ ẹneme nsio nsio n̄kpọ. Nte nnyịn ikotde ibuotikọ kiet kiet ke mme magazine emi, ikpenyene ndikere m̀mê mmanie ẹdima ndikot mmọ, ndien ekem ida mme magazine emi isọk mmọ.
2. Mme ibuotikọ ewe ke mme magazine nnyịn ẹkeme ndidemede mbon efen udọn̄?
2 Ndi Enyọn̄-Ukpeme eke ndondo emi eneme n̄kpọ ke Bible emi afo ye nsan̄autom fo ẹma ẹkeneneme ẹban̄a? Ndi odu ibuotikọ oro aban̄ade uwem ubon oro akpadade an̄wam iman fo? Ndi ọmọdiọn̄ọ owo emi oyomde ndika idụt oro ẹtịn̄de ẹban̄a ke Ẹdemede!? Ndi enyene mme itie mbubehe m̀mê mme itieutom ukara ke efakutom mbufo emi ẹdimade se idude ke kiet ke otu mme magazine nnyịn? Ke uwụtn̄kpọ, magazine oro etịn̄de aban̄a mme mfịna n̄kani owo eyenen̄ede ọfọn ye n̄kani owo ye mbon oro ẹsede mmọ enyịn. Mme itieutom oro ẹsinamde mme owo ẹnịm ibet ẹkeme ndima ibuotikọ magazine oro aban̄ade afai.
3. Tịn̄ se iketịbede oro owụtde ufọn edida akpan nsiondi magazine nnyịn nsọk mbon oro nnyịn ikerede ke ẹkeme ndima mme ibuotikọ oro ẹnemede.
3 Mme Utịp: Ke ebe ye n̄wan kiet ke South Africa ẹma ẹkebọ Ẹdemede! [Ikọmbakara] eke October 2011, emi ibuotikọ edide “How to Raise Responsible Children,” mmọ ẹma ẹkot ufọkn̄wed 25 ke efakutom esop mmọ. Edịp ye iba ke otu emi ẹma ẹbọ magazine emi ẹnyụn̄ ẹdeme ẹnọ nditọ ufọkn̄wed. Ebe ye n̄wan efen ke idụt oro ẹma ẹnam ukem oro n̄ko ẹnyụn̄ ẹnịm ediwak magazine emi ke mme ufọkn̄wed ke efakutom mmọ. Mme andikpep ke ufọkn̄wed kiet ke otu oro ẹma ẹbiere ndida magazine oro nnọ mbufa nditọ ufọkn̄wed ukpep kpukpru urua, nnyụn̄ nsịn enye ke otu mme n̄wed oro mmọ ẹnyenede ndikot. Ebe ye n̄wan emi ẹma ẹtịn̄ n̄kpọ emi ẹnọ esenyịn circuit mmọ. Ndien enye ama esịn udọn̄ ọnọ mme esop ke circuit esie ete ẹnam kpa ntre ke mme ufọkn̄wed oro ẹdude ke mme efakutom mmọ. Ediwak mmọ ẹma ẹnam ntre ẹnyụn̄ ẹdọhọ n̄kọk itieutom ẹfiak ẹnọ mmimọ magazine emi tutu edi se ẹfiakde ẹmịn̄ magazine emi!
4. Ntak emi anade inọ adan̄a ediwak owo nte ikekeme mme magazine nnyin?
4 Mme magazine nnyịn ẹsineme se mme n̄kpọntịbe eke ndondo emi ẹnen̄erede ẹwọrọ, ẹnyụn̄ ẹduri ntịn̄enyin nnyin ẹwụt Bible ye Obio Ubọn̄ Abasi. Mmọ ẹdi n̄kukụre magazine ke isọn̄, emi ‘ẹkwọrọde edinyan̄a.’ (Isa. 52:7) Ntre, nnyịn inyene ndinọ adan̄a ediwak owo nte ikekeme mme magazine nnyịn. Eti usụn̄ kiet ndinam emi edi ndibụp idem nnyịn ite, ‘Mmanie ẹdima ndikot ibuotikọ emi?’