Ndi Ayama Ndinam Ukpụhọde?
1. Nte n̄kpọ okpụhọrede ke ererimbot mfịn, nso ukpụhọde ke oyom inam n̄ko?
1 Ke 1 Corinth 7:31, Bible emen ererimbot odomo ye itie edinam oro ẹsimade ndikpụhọ mme edinam ye mbon edinam. Nte n̄kpọ okpụhọrede ke ererimbot mfịn, oyom nnyịn ikpụhọ usụn̄ ukwọrọikọ nnyịn, ndutịm nnyịn, ye usụn̄ unyene nneme nnyịn ke ini ke ini. Ndi ayama ndinam ukpụhọde?
2. Ntak emi oyomde inam ukpụhọde man isan̄a ikpat kiet ye esop Abasi?
2 Usụn̄ Ukwọrọikọ Fo: Esop Abasi ẹsinam mme ukpụhọde kpukpru ini. Akpa ini emi Jesus ọkọdọn̄de mme mbet esie ẹkekwọrọ ikọ, enye ọkọdọhọ mmọ ẹkûkama okụk ke ekpatokụk mmọ, ẹkûnyụn̄ ẹkama ekpri ekpat udia. (Matt. 10:9, 10) Edi nte ini akakade, enye ama okpụhọ item emi sia ọkọfiọkde ete ke mme owo ẹyesua mbet esie ye nte ke ukwọrọikọ mmọ ayatara esịm mme efakutom en̄wen. (Luke 22:36) Ke ediwak isua ikie emi ẹkebede, esop Jehovah ẹma ẹkwọrọ ikọ ke nsio nsio usụn̄, utọ nte, ndikama mme kad unọ ikọ ntiense, ndisuan etop ke ekebe utịn̄ikọ, ye ndida ubomisọn̄ usuanetop nsuan etop, etiene se ẹkeyomde ini oro. Sia mme owo mîsiwakke ndidu ke ufọk ke ediwak itie mfịn, ẹsiwak ndidọhọ nnyịn inam an̄wan̄wa unọ ikọ ntiense ye ikọ ntiense ido nneme idian ye utom ukwọrọikọ eke ufọk ke ufọk. Ẹsịn udọn̄ ẹnọ nnyịn n̄ko ẹte isikwọrọ ikọ ke ufọk ke ufọk ke mbubreyo edieke mme owo mîsidụhe ke ufọk ke usenubọk ye uwemeyo ke ntak utom. Nte chariot Jehovah eke enyọn̄ akade iso anam ukpụhọde, ndi afo ke asan̄a ikpat kiet ye enye?—Ezek. 1:20, 21.
3. Didie ke ndikpụhọ nneme nnyịn edinam inen̄ede ikụt unen ke efakutom nnyịn?
3 Usụn̄ Unyene Nneme Fo: Nso idi akpan n̄kpọ emi afịnade mme owo ke edem mbufo? Ndi nsọn̄ọn̄kpọ, mfịna ubon, ndịk, m̀mê ekọn̄? Ọfọn ifiọk se ifịnade mme owo ke efakutom nnyịn ke ndondo emi ye nte n̄kpọ ẹtiede do, man ikeme nditịm nneme emi odotde. (1 Cor. 9:20-23) Ke ini mme enyeneufọk ẹtịn̄de n̄kpọ oro afinade mmọ, utu ke ndiyom ekpri ikọ ntịn̄ mbe, ndien ika iso ke ibuotikọ oro iketịmde, akpakam ọfọn akan ndikpụhọ ntịn̄ se ifịnade mmọ.
4. Ntak emi oyomde inam ukpụhọde usọp usọp?
4 Ibighịke, mme “idaha” ererimbot emi ẹmọn̄ ẹsịm utịt, ndien akwa ukụt ọyọtọn̄ọ. “Ini emi osụhọde iniọn̄ke aba.” (1 Cor. 7:29) Ke ntre, oyom inam ukpụhọde inyụn̄ inam ntre usọp usọp, man ikeme ndinam kpukpru se ikekeme ke ekpri ini emi osụhọde!