Ekebe Mbụme
◼ Adan̄a didie ke asuanetop oro mînaha baptism enyene ndisidụk mbono esop nnyụn̄ n̄wọrọ an̄wautom mbemiso enye odotde ndina baptism?
Ata akpan ubiere oro owo enyenede ndinam edi enye ndibiere ndina baptism. Mmọdo, mbemiso owo odotde ndina baptism ana enye ọdiọn̄ọ se Abasi oyomde oto enye. Adianade do, enye enyene ndiwụt ke ima ibebiere ndidu uwem ekekem ye mme n̄kpọ oro Abasi oyomde.
Ẹnọ mme Christian ewụhọ ẹte ẹkûsịn ndisop idem ọtọkiet, ntem anaedi asuanetop oro mînaha baptism mi esidomo ndidụk mme mbono esop kpukpru ini. (Heb. 10:24, 25) Enye n̄ko enyene ndisitiene nnọ ibọrọ. Eyedi enye esịn enyịn̄ ke Ufọkn̄wed Utom Ukara Abasi, okposụkedi mîdịghe tutu enye ananam emi mbemiso enye odot ndina baptism.
N̄ko-n̄ko, sia ẹnọde mme Christian utom ẹte ekwọrọ eti mbụk ẹnyụn̄ ẹnam mme mbet, asuanetop oro mînaha baptism enyene ndisiwọrọ an̄wautom kpukpru ini mbemiso anade baptism. (Matt. 24:14; 28:19, 20) Enye ekpenyene ndikwọrọ ikọ ọfiọn̄ ifan̄ mbemiso ekemede ndina baptism? Ọkpọfọn ẹnọ enye ini oro ekemde man enye owụt ke imọ imenen̄ede ibiere ndisịn ifịk n̄kwọrọ ikọ kpukpru ọfiọn̄. (Ps. 78:37) Edi, ọtọn̄ọde ke ini emi enye ọkọtọn̄ọde ndiwọrọ an̄wautom tutu esịm ini emi enye odotde ndina baptism ikpenyeneke ndiniọn̄ n̄kaha, ekeme ndidi ọfiọn̄ ifan̄. Hour ifan̄ ke enye ọkpọnọ ke ọfiọn̄? Owo inịmke ibat. Mbiowo ẹkpenyene ndida eti ibuot ndụn̄ọde idaha mme asuanetop kiet kiet.—Luke 21:1-4.
Mbiowo (m̀mê mme asan̄autom unamutom ke mme esop oro mbiowo mîwakke), emi ẹsobode ye owo oro oyomde ndina baptism, ẹkpenyene nditi nte ke mme owo ẹdi nsio nsio, ẹkpenyụn̄ ẹnyene ndida eti ibuot mbiere m̀mê owo emi odot ndina baptism. Se mmọ ẹkpesede ekpedi m̀mê enen̄ede ọdọn̄ owo emi ndidi kiet ke otu Mme Ntiense Jehovah, m̀mê enye onyụn̄ owụt esịtekọm ke ifet oro enye enyenede ndidu ke esop Jehovah nnyụn̄ ntiene nnam utom ukwọrọikọ. Mbiowo ẹfiọk ke owo emi inen̄ekede inyene ifiọk kan̄a iban̄a n̄kpọ Abasi, inyụn̄ inyeneke kan̄a usọ nte mme ọkwọrọ eti mbụk oro ẹnyenede mbufiọk, emi ẹma ẹkena baptism. Edieke mbiowo ẹkụtde ke owo emi idotke kan̄a ndina baptism, mmọ ẹkpenyene ndida N̄wed Abasi nsian enye ntak oro mmọ ẹdọhọde ke enye idotke ẹnyụn̄ ẹnam ndutịm man ẹn̄wam enye ke n̄kan̄ eke spirit.