Ekebe Mbụme

◼ Ndi eyenete an̄wan ekpenyene ndiyara n̄kpọ ke ibuot edieke enye enịmde ukpepn̄kpọ Bible ke enyịnusụn̄ ufọk owo ndien eyenete eren odu ye enye?

Ke ini asuanetop emi edide n̄wan enịmde ukpepn̄kpọ Bible emi enye esinịmde kpukpru ini ndien asuanetop Obio Ubọn̄ emi edide eren odu do, n̄wan oro ekpenyene ndiyara n̄kpọ ke ibuot. (1 Cor. 11:3-10) Enyọn̄-Ukpeme eke July 15, 2002, page 27, ọdọhọ ete: “Emi edi ikpehe ini ukpepn̄kpọ oro ẹma ẹkebebem iso ẹdiomi emi andinịm ukpepn̄kpọ oro edide adausụn̄. Ke mme utọ idaha emi, ukpepn̄kpọ oro akabade edi ubak ndutịm esop. Edieke n̄wan Ntiense oro ama akana baptism enịmde utọ ukpepn̄kpọ oro ndien eren Ntiense oro ama akana baptism [odu do], enye nte odotde ayayara n̄kpọ ke ibuot.” Se enye edinamde edi oro inamke n̄kpọ m̀mê enye enịm ukpepn̄kpọ emi ke ufọk owo, ke enyịnusụn̄ m̀mê mme itie en̄wen.

Ke n̄kan̄ eken, edieke eyenete an̄wan mîbatke kan̄a ukpepn̄kpọ oro enye enịmde ye owo ke enyịnusụn̄ nte ukpepn̄kpọ Bible, enye ikpenyeneke ndiyara n̄kpọ ke ibuot ke ini odude ye asuanetop Obio Ubọn̄ emi edide eren, idem ọkpọkọm enye afiak aka man okowụt nte ẹsinịmde ukpepn̄kpọ Bible, mîdịghe man ekeneme n̄kpọ ke kiet ke otu n̄wed oro isidade inịm ukpepn̄kpọ Bible. Sia edide ẹsinam mfiakn̄ka ediwak ini mbemiso ẹtọn̄ọde ndibat ukpepn̄kpọ oro ẹnịmde ke enyịnusụn̄ nte ukpepn̄kpọ Bible, oyoyom mme asuanetop emi ẹdide iban ẹtim ẹkere ẹnyụn̄ ẹda eti ibuot ẹbiere ini oro mmọ ẹkpetọn̄ọde ndiyara n̄kpọ ke ibuot.