Kûdodop Uyo Usan̄a ke An̄wautom
1. Didie ke ikpekpebe apostle Paul ke ini isan̄ade ye mbon en̄wen ke an̄wautom?
1 Apostle Paul akada ini oro enye okodude ye ekemmọ mme andinịm ke akpanikọ nte ifet ‘ndisịn udọn̄ nnọ kiet eken.’ (Rome 1:12) Ndi afo emesida ini oro afo asan̄ade ye asuanetop en̄wen ke an̄wautom esịn udọn̄ ọnọ onyụn̄ an̄wam enye? Utu ke ndidodop uyo nsan̄a ke an̄wautom, ntak mûdaha ini oro utịn̄ se ikan̄wamde fi okụt unen ke utom ukwọrọikọ unọ nsan̄a fo?
2. Nso ke ikeme ndinam man in̄wam owo oro isan̄ade kiet ke an̄wautom enyene uko, ndien ntak anade inam emi?
2 Nam Nsan̄a Fo Enyene Uko: Ndusụk mme asuanetop inyeneke uko ndida ke iso owo ntịn̄ ikọ. Nte mmọ ẹtịn̄de ikọ m̀mê ẹkamade iso esiwụt emi. Nnyịn ndida ofụri esịt ntoro mmọ ayanam mmọ ẹnyene uko. Mme usụn̄ en̄wen ewe ke ikeme ndinam mmọ ẹnyene uko? Esenyịn kiet oro asan̄ade-san̄a esiwak nditịn̄ se ikesinamde idem enyek enye ke an̄wautom ye nte enye ekesibọn̄de akam man akan utọ ndịk oro. Eyenete en̄wen etịn̄ n̄ko se ikan̄wamde enye enyene uko ete: “N̄kesitọn̄ọ ke ndituak inua imam. Ndusụk ini mmesibọn̄ akam nte Abasi an̄wam mi ndiọn̄ọ se ntịn̄de.” Ndi odu se ikan̄wamde fi enen̄ede enyene uko ke an̄wautom? Edieke edide ntre, tịn̄ enye nọ nsan̄a ukwọrọikọ fo.
3. Nso ke ikeme ndineme ye nsan̄a nnyịn ke an̄wautom man an̄wam enye ọkwọrọ ikọ ọfọn?
3 Tịn̄ Nte Afo Esikwọrọde Ikọ: Ndi odu mmemmen usụn̄ emi akadade ọtọn̄ọ nneme, utọ nte mbụme m̀mê se itịbede ke obio? Ndi ama anam ekpri ukpụhọde ke usụn̄ unyene nneme oro ẹnọde ndien enye enem owo emi ọkọkwọrọde ikọ ọnọ? Tịn̄ nọ owo emi asan̄ade kiet. (N̄ke 27:17) Ke ini ẹsan̄ade kiet ẹka mfiakn̄ka, afo emekeme nditịn̄ se edinemede ye owo oro ye nte aduakde ndineme. Ke ẹma ẹkenịm ukpepn̄kpọ Bible ẹkụre, emekeme nditịn̄ se ikanamde etịn̄ se eketịn̄de, okot itie Bible emi okokotde, m̀mê ada usụn̄ unọ ukpep oro akadade ọbọrọ mbụme eyen ukpepn̄kpọ.
4. Ntak emi ikpamade ndin̄wam nditọete nnyịn ke an̄wautom?
4 Mme ọkwọrọikọ ke eyo mme apostle ikan̄wamke mbon an̄wa kpọt. Mmọ ẹma ẹsin̄wam ẹnyụn̄ ẹsọn̄ọ nditọete mmọ idem. (Utom 11:23; 15:32) Apostle Paul ama ọnọ ekpri Timothy ukpep onyụn̄ ọdọhọ enye ada se enye ekekpepde oro ekpep mbon en̄wen. (2 Tim. 2:2) Ke ini nnyịn itide ndinam eti n̄kpọ nnọ nditọete nnyịn ke an̄wautom, iyanam esịt etetịm enem mmọ, in̄wam mmọ etịm ẹkụt unen ke utom ukwọrọikọ, inyụn̄ inam esịt enem Ete nnyịn eke heaven.—Heb. 13:15, 16.