Da Mme Prọfet Nte Uwụtn̄kpọ—Nahum
1. Nso ke n̄wed Nahum ekpep nnyịn?
1 Obio Nineveh akana ndon kpasụk nte Nahum ekebemde iso etịn̄. Emi owụt ke Jehovah esisio mme asua esie usiene ye nte ke ọkpọkọm asua Abasi okop odudu adan̄a didie, enye ikemeke ndida Jehovah ke iso. (Nah. 1:2, 6) Ndifiak ndụn̄ọde ntịn̄nnịm ikọ Nahum ekpep nnyịn nte ikpanamde utom ukwọrọikọ nnyịn.
2. Didie ke ikeme ndinam etop oro ikwọrọde ọnọ idotenyịn?
2 Dọn̄ Mme Owo Esịt Nyụn̄ Nam Mmọ Ẹnyene Idotenyịn: Edieke owo mîtịmke ise, enye edikere ke n̄wed Nahum aban̄a nsobo emi ẹkebierede ẹnọ Nineveh kpa ibuot obio Assyria eset oro akatan̄de idem etieti. (Nah. 1:1; 3:7) Edi se ẹkebierede emi akakam edi eti mbụk ọnọ ikọt Jehovah. Nahum emi enyịn̄ esie ọwọrọde “Andidọn̄ Esịt” ama ọdọhọ mme Jew ete ke mme asua mmọ ididụhe aba ke mîbịghike! Enye ama onyụn̄ ọdọhọ ke Jehovah edi “ọkpọsọn̄ ebiet ke usen nnanenyịn.” (Nah. 1:7) Mfịn, nnyịn n̄ko ikpenyene ndikwọrọ eti mbụk nnọ mme owo nnyụn̄ n̄n̄wam mmọ ẹbuọt idem ke Jehovah.—Nah. 1:15.
3. Didie ke ikeme ndikpebe Nahum ke ndida uwụtn̄kpọ n̄kwọrọ ikọ?
3 Da Mme Uwụtn̄kpọ Kwọrọ Ikọ: Jehovah ama ọnọ Nahum edisana spirit esie man enye ekeme ndimen nsobo Nineveh ndomo ye nsobo oro enye Assyria ke idemesie okosobode Thebes (No-amon) ke Egypt. (Nah. 3:8-10) Nte nnyịn isụk inemede ye mme owo iban̄a utịt idiọk ererimbot emi, imekeme nditịn̄ n̄ko mme ntịn̄nnịm ikọ Bible oro ẹwụtde ke Jehovah esinam kpukpru se enye ọn̄wọn̄ọde. Ke uwụtn̄kpọ, ke ini mbon Babylon ye mbon Media ẹkedide ndisobo Nineveh ke n̄kpọ nte isua 2,700 emi ẹkebede, akwa edịm ama anam Akpa Tigris ọtọ, ndien emi ama anam ibibene obio oro eketiede nte owo ikemeke ndikan do, owụre. Mmọ ndien ẹma ẹsọsọp ẹkan Nineveh kpa nte Jehovah ekebemde iso etịn̄.—Nah. 1:8; 2:6.
4. Didie ke ikeme nditịn̄ ikọ an̄wan̄a owo ke ini ikwọrọde ikọ?
4 Tịn̄ N̄kpọ An̄wan̄a Owo: Nte Nahum ekewetde n̄wed esie ama an̄wan̄a onyụn̄ enem owo ndikot. Mme akpan n̄kpọ emi enye ekewetde ẹma ẹwọrọ ẹda. (Nah. 1:14; 3:1) Kpasụk ntre, ọfọn nnyịn isitịn̄ se idisọpde in̄wan̄a owo. (1 Cor. 14:9) Akpa ini emi akade ndikwọrọ ikọ, tịn̄ in̄wan̄-in̄wan̄ se idade fi ika do. Nte osụk ekpepde Bible ye mme owo, n̄wam mmọ ẹbuọt idem ke Jehovah ye ke Ikọ esie. N̄wam mmọ ẹkụt ke se ọkwọrọde enen̄ede ebehe mmọ.—Rome 10:14.
5. Nso ikọ ndọn̄esịt ke ikụt ke ntịn̄nnịm ikọ Nahum?
5 N̄wed Nahum enen̄ede owụt nte prọfet oro ọkọbuọtde idem ke ikọ Jehovah esisu kpukpru ini. Nte utịt ererimbot Satan ekperede, nnyịn iyokụt nte ikọ Jehovah emi ọdọn̄de nnyịn esịt: “Nnanenyịn iditọn̄ọke aba ntak idu.”—Nah. 1:9.