Ufọkn̄wed Utom Ukara Abasi Eke 2015 Ayan̄wam Nnyịn Ikpep Mme Owo N̄kpọ Enen̄ede Ọfọn

¹ David andiwet psalm ekewet ete: “Yak ikọ inua mi ye se esịt mi ekerede ẹnem fi, O Jehovah Akwa Itiat mi ye Andifak mi.” (Ps. 19:14) Nnyịn n̄ko imoyom ikọ nnyịn enem Jehovah esịt, sia nnyịn imama ifet oro inyenede nditịn̄ n̄kpọ mban̄a Abasi ke esop ye ke ini ikwọrọde ikọ. Ufọkn̄wed Utom Ukara Abasi edi usụn̄ kiet emi Jehovah adade ekpep nnyịn ndikwọrọ ikọ. Ẹsinịm ufọkn̄wed emi kpukpru urua ke se ibede esop 111,000 ke ofụri ererimbot. Enye an̄wam nsio nsio nditọete iren ye iban ke ofụri ererimbot ẹnen̄ede ẹdot ndikwọrọ eti mbụk. Mmọ ẹsida mbukpek ye mbufiọk ẹkpep mme owo n̄kpọ, ẹnyụn̄ ẹnam emi uko uko.—Utom 19:8; Col. 4:6.

² Ndusụk n̄kpọ emi idinamde ke ufọkn̄wed ke 2015 ẹdito ekpri n̄wed Se Isịnede ke N̄wed Abasi ye Enyọn̄-Ukpeme. Ẹkpụhọ ini oro ẹnọde ẹda ẹnam Akpa Utịn̄ikọ ye Mme Akpan N̄kpọ Oro Ẹtode Edikot Bible. Ẹneme emi ye nte ẹdinịmde ufọkn̄wed emi ke mme ikpehe ekikere oro ẹtienede.

³ Mme Akpan N̄kpọ Oro Ẹtode Edikot Bible: Nditọete oro ẹdinamde emi ẹdida minit iba ineme n̄kpọ kiet emi enyenede ufọn ke Edikot Bible urua kiet kiet. Ọyọfọn mmọ ẹnen̄ede ẹtịm idem man ẹkeme ndida minit iba oro nneme n̄kpọ emi edin̄wamde esop. Mmọ ẹyesụhọ minit itiokiet man otuowo ẹda sekọn 30 m̀mê osụhọrede akan oro ẹtịn̄ se mmọ ẹmade ke edikot Bible urua oro. Oyom inen̄ede itịm idem inyụn̄ ifara ke idem man ikeme ndida sekọn 30 ntịn̄ n̄kpọ oro enyenede ufọn. Eti ukpep ke ẹnọ nnyịn emi. Emi n̄ko ayanam nditọete nnyịn ẹtiene ẹtịn̄ se mmọ ẹnyenede.

⁴ Akpa Utịn̄ikọ: Ini oro ẹnọde ndida n̄kot Bible edidi minit ita m̀mê osụhọrede akan oro, ndien se ẹdikotde idiwakke. Mbon oro edikotde Bible ẹkpenyene ndikot ebiet oro ẹnọde mmọ ediwak ini, ẹkot uyo ọwọrọ, ẹkot ikọ ọdọnọ, ẹkot nnennen se idude ke n̄wed, man an̄wan̄a otuowo. Ẹyom kpukpru ikọt Jehovah ẹsikot n̄wed ọfọn sia emi edi akpan n̄kpọ ke esop Abasi. Ẹsinem nnyịn ndikụt nte ediwak nditọ nnyịn ẹkotde n̄wed ọfọn. Imọkọm mme ete ye eka oro ẹsịnde ukeme ẹn̄wam nditọ mmọ ẹkot n̄wed ọfọn.

⁵ Udiana Utịn̄ikọ: Utịn̄ikọ emi edidi minit ition, ndien ẹdinọ eyenete an̄wan. Enye ekpenyene ndineme n̄kpọ mban̄a ibuotikọ oro ẹnọde. Edieke ibuotikọ esie otode Se Isịnede ke N̄wed Abasi, enye ekpenyene ndida kiet ke otu usụn̄ emi ẹsikwọrọde ikọ ke efakutom mbufo anam emi. Edi edieke aban̄ade owo ke Bible, enye ekpenyene ndinen̄ede ndụn̄ọde se ẹtịn̄de ẹban̄a owo oro ke Enyọn̄-Ukpeme, emek itien̄wed oro odotde, onyụn̄ etịn̄ se ikpepde ito owo oro. Enye ekeme ndisịn itie N̄wed Abasi efen emi asan̄ade ye ibuotikọ esie. Esenyịn ufọkn̄wed ọyọnọ enye enyeneufọk.

⁶ Utịn̄ikọ Ọyọhọ 3: Utịn̄ikọ emi edidi minit ition, ndien ẹdinọ eyenete eren m̀mê an̄wan. Ke ini ẹnọde eyenete an̄wan, enye edinam ukem nte ẹdọhọde ẹnam ke Udiana Utịn̄ikọ. Edi ke ini ẹnọde eyenete eren, ndien se enye edinemede oto Enyọn̄-Ukpeme, enye edinọ nte utịn̄ikọ. Enye ekpenyene ndinam se enye etịn̄de asan̄a ye ibuotikọ, emek itien̄wed oro odotde, onyụn̄ etịn̄ se ikemede ndikpep nto se enye enemede.

⁷ Usụn̄ En̄wen Emi Nditọete Iren Ẹdinamde Utịn̄ikọ Ọyọhọ 3: Ke ini ẹnọde eyenete eren ibuotikọ emi otode Se Isịnede ke N̄wed Abasi, enye edinam nte enịm ukpepn̄kpọ ubon m̀mê nte ọkwọrọ ikọ ọnọ owo. Esenyịn ufọkn̄wed esiwak ndimek nte ẹdinamde utịn̄ikọ emi onyụn̄ emek enyeneufọk. Owo ke ubon eyen ufọkn̄wed m̀mê eyenete eren ke esop ekpedi enyeneufọk. Enye ekeme ndisịn itie N̄wed Abasi efen emi asan̄ade ye ibuotikọ esie, emi edinamde ẹkụt ntak emi ẹnọde ndusụk item ke Bible. Ẹkeme ndidọhọ ebiowo anam emi ndusụk ini. Ebiowo oro ekeme ndimek nte enye edinamde onyụn̄ emek enyeneufọk ke idem esie. Ẹyenem mme owo ke esop ndikụt nte ebiowo edidade ubon esie m̀mê eyenete efen ke esop owụt nnyịn nte ẹkpekpepde n̄kpọ.

⁸ Item: Esenyịn ufọkn̄wed ayada minit iba otoro eyen ufọkn̄wed onyụn̄ ada se idude ke Bọ Ufọn to Ukpepn̄kpọ Ufọkn̄wed Utom Ukara Abasi owụt ebiet emi oyomde eyen ufọkn̄wed anam ọfọn. Ke ini esenyịn ufọkn̄wed okotde eyen ufọkn̄wed edinam n̄kpọ, enye ididọhọke ke imọ ise enye ke emi m̀mê oko. Edi ke ini eyen ufọkn̄wed okụrede, esenyịn ufọkn̄wed ọyọkọm enye ke se enye akanamde ọfọn, etịn̄ se ẹkesede enye, onyụn̄ etịn̄ ntak emi imọ idọhọde ke enye ama anam ọfọn. Mîdịghe enye etịn̄ ntak emi edifọnde eyen ufọkn̄wed oro afiak anam n̄kpọ aban̄a se ikesede enye, edi enye ekpenyene ndinam emi ukpono ukpono.

⁹ Babru item nditọ ufọkn̄wed odu ke page 79 esim 81 ke n̄wed Ufọkn̄wed Utom. Ke mbono esop asuanade, esenyịn ufọkn̄wed oyobụp eyen ufọkn̄wed m̀mê enye ama anam utom oro odude ke utịt ukpepn̄kpọ oro ẹkesede enye, ndien esenyịn ufọkn̄wed eyesịn idiọn̄ọ oro odotde ke n̄wed eyen ufọkn̄wed. Ẹkeme n̄ko ndida ini oro m̀mê ini en̄wen nnọ enye item efen oro edin̄wamde enye. Eyen ufọkn̄wed ekpenyene ndifiọk nte ke item ekededi oro ẹnọde imọ edi man ẹn̄wam imọ inam ọfọn ke esop Abasi.—1 Tim. 4:15.

¹⁰ Edieke eyen ufọkn̄wed adiade ini, esenyịn ufọkn̄wed m̀mê andin̄wam enye ekpenyene ndimia n̄kanika m̀mê ndinam n̄kpọ en̄wen emi owụtde ke ini esie okụre. Edi yak ẹnam oro ukpono ukpono. Eyen ufọkn̄wed ekpenyene ndisọp n̄kụre se enye etịn̄de nnyụn̄ n̄kpọn̄ mbot utịn̄ikọ.—Se n̄wed Ufọkn̄wed Utom, p. 282, ikp. eki. 4.

¹¹ Ẹyom kpukpru mbon oro ẹdotde ẹsịn enyịn̄ ke Ufọkn̄wed Utom Ukara Abasi. (Se n̄wed Ufọkn̄wed Utom, p. 282, ikp. eki. 6.) Kpukpru se ẹkpepde ke ufọkn̄wed emi anam ikọt Jehovah ẹkwọrọ eti mbụk Obio Ubọn̄ ẹnyụn̄ ẹkpep mme owo n̄kpọ uko uko ye ukpono ukpono, onyụn̄ anam mmọ ẹnyene ima. Jehovah esinen̄ede enem esịt ndikụt nte kpukpru mbon oro ẹbọde ufọn ufọkn̄wed emi ẹtorode enye!—Ps. 148:12, 13; Isa. 50:4.